Read bassa AYIZAYA 25 Bible Online

AYIZAYA 25 - bassa bible

AYIZAYA 25

¹Oo AGWANGWAMA, gabụ bɛ shɛ Agwatana mi; N zhɛ ma bu muna ụjɛrụma, ma shɛtana izeci bu. Bu nduwa iyi tudama ifwugwo; Bɛ njɛ iyi nɛ abu imanganjɛ cala cala na tɛcara.

²Gabụ bu hwuŋzetenji ashɛpwụ ata a'wụtụ a'wụtụ, abɛ njɛ aŋ shisombo, ebu hwuŋzetenji ijilɛni ya aba. Nhwaŋ ma ata atwa i'ime tu mengeni mu zasaba ya o, a zha shɛ kaa a maanana mu ya kwukwuŋ.

³Edenji na 'yajɛ ikɛnyi zhɛ na bụ shɛtana; Ɛ zhɛ na bu sụma inyɛsɛ na ashɛpwụ edenji ata shɛmiaụŋ.

⁴Okofwo, na atwa na mama zasa gezhije no ofwo bu ibɛ po ee benengeni aka ata bu ụbaụta. Gabụ kaa bɛ shɛ umwono aba na aka bu mpiala ma ata mụ 'wụtụ, keeni uhwuŋnu aba u tusuu na aka bo oholobwo. Atwa ata shɛmiaụŋ sukakanɛ aŋ gana ubwadawara na wa nda na aka bu ugbofworo.

⁵Gana ubata, na cɛnjɛ tuhwoo. Ama AGWANGWAMA, gabụ kaa bɛ njɛ maa atwa i'ime tu 'imɛ ilɛmɛ; abɛ njɛ maa ga atwa ata shɛmiaụŋ 'imɛ ilɛmɛ na azunga aba, gana na tu udomu wa nda maa uwaŋna na go vwo gwuriseni.

⁶AGWANGWAMA na Hwuri Kpaaŋ zhɛ a imangana edenji unyizo kpaaŋ iyimɛyɛ ibiye maa ima aŋ ugaiŋ epe, ni Ishɛmɛ gɛ Zayon. Bi zhɛ ba ndana aŋ iyimɛyɛ ibiye, te meni mụ tụ'waulụ ta afwafwa mi biye maa ima aŋ ugaiŋ.

⁷Ni ishɛmɛ gɛ kaa bɛɛ zhɛ bo ushigo usikidi ata ee ge pipi aŋ nu bwa, keeni owowo ata ee ge urigeni edenji elele gana udomu.

⁸AGWANGWAMA Mokondo na Hwuri Kpaaŋ zhɛ ba nda tu'wo ufwu unyizo-nom! Ubwa zhɛ ba wafwaga malaba ne eshe bụtụ be elele, bɛɛ zhɛ kaa bo sugo tutwa ta atwa ubwa nu unyizo hwɛɛ. AGWANGWAMA ni ikɛnyi ibwɛ, ubwa dumwa.

⁹Ụjita ata ci hwuŋ, bụtụ be elele zhɛ bɛ hiɛŋ, Ubwa shɛ Agwatana tu! Ubwa atu patanɛ rishe cebe, iwɛbɛ po bee ti leshiji. Ubwa shɛ AGWANGWAMA! Ubwa atu patanɛ rishe, hwuwayɛ go amɛ tu lemi, unyasa kaa shini shɛmɛ shi tu, iwɛnɛ bee ti bicinji.

¹⁰AGWANGWAMA zhɛ a jilanɛ Ishɛmɛ Zayon, ɛ zhɛ a ta Moab ivwunɛ gana na aa ta ti'enyi ivwunɛ na cɛnjɛ.

¹¹Ɛ zhɛ a mba i'ɛlɛ ya aba gana atwa na zhɛ a nda ataga ne meni, ama Agwatana zhɛ e zucinje aŋ, ibɛ po i'ɛlɛ ya aba zhɛ yo ilo, a zha shɛ a ala maa e meme mbiyeni ya o.[76]

¹²Ubwa zhɛ ba nda ijilɛni ya atwa Moab ufwu hwɛɛ, tu uba ata wa aba oo mo te zeci, bi zhɛ bo ubo aŋ upwupwutu.