Read bassa AYIZAYA 26 Bible Online

AYIZAYA 26 - bassa bible

AYIZAYA 26

¹Ụjita ata ci hwuŋ, atwa zhɛ a zunga azunga ga na cɛnjɛ tu Juda, ɛ hiɛŋ: Ụshɛpwụ ata tu ụ'wụtụ 'yajɛ ukpahiŋ! Agwatana ni ikɛnyi ibwɛ ubwa ba lashaga uba ubwa!

²Kapɛshɛnga ma odubo ụshɛpwụ ata maa udenji ata u tiririri teni, ubwa shɛ udenji ata wa untangana rishe-tɛtɛtana.

³AGWANGWAMA, pana atwa na shikeni dimi na shihaŋsa sha aba keeni atwa na ubu patanɛ-rishe amɛ-olom na ulwa.

⁴Patana ma AGWANGWAMA rishe unyizo-nom; iwɛnɛ po AGWANGWAMA na shɛ Agwatana, ubwa shɛ uparatayɛ unyizo-nom.

⁵Ubwa kezhicinje atwa na jɛjɛ nu bwa a na mama sata; baa njɛ ashɛpwụ ata ukpahiŋ aa namɛ ufwu, bee hwuŋzetenji uba ubwa, aa 'waŋtatangwụ na cɛnjɛ, waa shɛ ya upwupwutu.

⁶Atwa ala aa nda la tuhwulo, o tono tu ya aa kashɛka, ibɛ po okofwo o rukoto uŋ ya nɛ ɛvwɛvwɛjɛ aba.

⁷AGWANGWAMA, gabụ[77] ba ndana atwa tiririri uhwaŋna, uhwaŋna wa atwa ata tiririri kaa nangwụ gbelee.

⁸Oo AGWANGWAMA, tụ bụ shɛlanɛ nu uhwaŋna ashɛrɛya bụ[78] titeyinje ti izeci bu kiri tu ma tu dwa eshe.

⁹Iwɛ bu ma n tɛtaga tebiye nụ ụjita; ahaŋsa mi kaa ma bụ jala nu uvwungwa; aka abɛ jɛmɛ hwuŋ ụshɛrɛya wa atwa unyizo, nazhɛ ɛɛ zhɛ o soso iyi nɛ shɛ tiririri.

¹⁰Okwo ta ba mapana bata ogworozwo iwɛ, e seshi shi kaa tiririri kwukwuŋ. Okwo na cɛnjɛ tu ga ta atwa tiririri, a ta nda waa iyi nɛ 'wanjɛ; aa lacɛ maa e mepi ugombo bu.

¹¹Oo AGWANGWAMA, okwo te bi heŋpi u'ala bụ na azuba, ama atwa i'ime kwụbɛ shɛ kaa o. AGWANGWAMA, nda maa ezuye shɛ aŋ, lono maa a njɛ ụbaụta. Ga ulwapɛ ata ga shɛ iwɛ atwa i'ime bu hwoŋzhinji aŋ. Mbisono aŋ gana na tulubo tu na ebu lubi atwa bụ ti gembi.

¹²Oo AGWANGWAMA, gabụ bi zhɛ ba nda maa ge iyi iti zhɛmanɛ; iyi elele nɛ eti gwushiji, asha tɛnda tụ bụ yaa shɛ.

¹³Oo AGWANGWAMA na shɛ Agwatana tu, shɛgwangwama shɛ na shɛ namɛ swooŋ na bụ, shɛ ba shɛ tu untanganɛ la, ama gobuko gba kaa bɛ shɛ AGWANGWAMA tu.

¹⁴Hwuwayɛ go, o uwo, a zha shɛ kaa a ya ya uraiŋ o; a zha shɛ kaa ɛ hiɛ ya o, gabụ kaa bi peni aŋ ulwapɛ, abɛ njɛ aŋ ufwu du. Gabụ kaa bu 'wericinji titeyinje ta aba hwɛɛ.

¹⁵Oo AGWANGWAMA, gabụ bɛ njɛ maa udenji tu keeni ugombo, ebi keeni tugwungwu tu bwa tuhoricingo upada elele, ibɛ po aa bụ mụnɛ ụjɛrụma.

¹⁶Oo AGWANGWAMA, gabụ bi peni atwa bụ ulwapɛ, nụ ụngwụ-tụhwụga kaa aa njɛ adua no ofwo bu.[79]

¹⁷Oo AGWANGWAMA, gabụ bɛ njɛ maa ta ugana, gana na to biyikwo na ụngwụ tumata to, ba ugana.

¹⁸Tu namɛ nụ ụngwụ ata tụhwụga, ata jala tu'wo, ama i zasa kaa iyi elele ɛti vwɛ o.[80] Tu zasa tụlasụ te elele iwɛ cɛnjɛ tu tu o; Atwa na jɛjɛ na cɛnjɛ tu unyizo kaa 'waŋtatangwụ sụ o.

¹⁹Atwa tu na uwo, ɛ tɛ zhɛ a ya uraiŋ sasana! Tu'waba ta aba[81] ti tɛ zhɛ tɛ ishijɛ. Ahiɛba ata hi zweni nu upwupwutu, zhinjɛ ma, zunga ma azunga nu unyasa. Gana na te cime to lomicingo cɛnjɛ tu unyizo nu uvwungwa, gobwonu du AGWANGWAMA tɛ zhɛ ɛ hicinjɛ atwa na uwo cala cala.

²⁰Ahiɛba atwa mi, tono ma no shimwono shi hiŋ, hi kapanjɛ shidubo. Swakaka ma tugwo uuwa i ci aka na isɛbwɛ ya Agwatana hwuwowu.

²¹AGWANGWAMA zhɛ a banɛ na azuba na shɛ ofwo ubwa u tu nama, ba zhajɛ maa pana atwa unyizo ulwapɛ iwɛ iwɛwɛ ya aba. Ɛ zhɛ ɛ vwɛ atwa na kwụnɛ la atwa ne tusweci uvwi, cɛnjɛ tɛ zha shɛ kaa ta swaka ya mehieŋ mu na ee dudweji la na tuba o.