Read bassa AYIZAYA 27 Bible Online

AYIZAYA 27 - bassa bible

AYIZAYA 27

¹Ụjita ata ci hwuŋ, AGWANGWAMA zhɛ a shapa utokwobi ata ubwa ụ'wụtụ, na kaa 'yajɛ ikɛnyi, na kaa lacɛmɛ tebiye maa pa buduwo[82] ata bo gozhigo. Ubwa shɛ buduwo ata ba ta ukwuka; maa kwụna du udegbe[83] ata namɛ ni itekwu.

²Jita ata nazhɛ AGWANGWAMA zhɛ a zunga azunga iwɛ itimɛ ibwɛ ya afwafwa nɛ baa 'yajɛ amɛ-olom ni ibɛ[84] bɛ hiɛŋ,

³Gamba ma ngbaraka iŋ, Mo zwogono iŋ meni nom, Ama 'yaka iŋ tụ ụjita tu uwaŋna, iwɛ maa kede bụtụ be elele njɛ aŋ iyi iwɛ o.

⁴N zasa ya isɛbwɛ ni itimɛ ɛtɛ ya afwafwa o. Ama yaa shɛ esepi, ni ikpɛɛnci unshɛ ni itimɛ ɛtɛ, nazhɛ Ngɛɛ zhɛ mo hwoŋzhingo aŋ hwɛɛ.

⁵Yaa shɛ atwa i'ime atwa mi a jala maa Ma jilanɛ aŋ, asha ga njɛ maa Ma 'yaga amɛ-olom na aba. Iiŋ, ga njɛ maa Ma 'yaga amɛ-olom na aba.

⁶Ni ijitɛ ɛtɛ nɛ yee ci[85] atwa Isrɛl, a na shɛ ajalalo Jekob zhɛ a 'yaga tini gana ụ'wụ'wụ, nazhɛ ɛɛ zhɛ a bubaga a nda to tusumbo. Nazhɛ tụ'walụ tu na ee 'weri ti zhɛ to shino unyizo.

⁷AGWANGWAMA suu pwonuo atwa Isrɛl ulwapɛ gana na baa pana atwa i'ime aba? Bu kwụnua aŋ suu gana na baa kwụna atwa na a kwụna aŋ?

⁸Ulwapɛ na AGWANGWAMA a pana atwa ubwa ụ shɛ ti'ima[86] tu na boo lono maa a 'imɛ aŋ nu ujasa maa a shɛ ajama. Baa bacɛnga aŋ gana na uvwugo ụ'wụtụ[87] wa banɛ nu uwaŋna-banụ woo sugo iyi.

⁹Semi aka na atwa Isrɛl njɛ atayɛ ata oto-ụrụpɛ, a na shɛ gana ụhwụla ufwu maa e bwereteji aŋ rukwu rukwu, maa e hwuŋzetenji otukwu ata ụrụpɛ oo hwoŋzhingo iturɛre, ti i'wɛ'wɛ ɛtɛ aa shɛrɛ i shɛ usubwa tuwa ta ata to o ɛɛ hiɛŋ Ashɛra. Aka na ti ijɛ ɛtɛ hwɛɛ zasaba ya, nazhɛ ɛɛ zhɛ a gangana Isrɛl iwɛwɛ ibwɛ.

¹⁰Ụshɛpwụ ata oo mo la ijilɛni oo rungwutwonu, ụ shɛ ya osombo. Atwa beni ee genji uŋ, wee tileni ya gana ụshɛka. Waa shɛ ya ofwo na inɛ ya yaga, ofwo na oo rungo aa ta ụhinjanụ.

¹¹Shɛ'walụ shɛ i'wɛ'wɛ ɛtɛ shi hwetegeni sha sashangwụ, ibɛ po eyikwo a dwaga iŋ ya aa shana ulwa. Iwɛnɛ ta atwa ata zasa ya iyi elele nɛ ee eshiciji. Agwatana na karɛ aŋ kaa zha shɛ a nda uwanyi aba maa kwụba inyɛmɛnyɛmɛ ya aba o.

¹²Nụ ụjita ata, AGWANGWAMA zhɛ ɛ zɛrijɛ atwa ubwa maa a banɛ nu Urefu Yufretis[88] maa e zhe no tugwungwu ta cɛnjɛ ti Ijipti, bi zhɛ ba zanganjɛ atwa ubwa bo sotulonu aŋ, gana bụtụ na ba hikita afwa maa afwụrɛkɛcɛ beni no ohiu.

¹³Ụjita ata ci hwuŋ, nu ukakacɛ ɛɛ zhɛ a suyana atwa Isrɛl a na namɛ na ti'ima na Asiria, ti Ijipti maa e jiyeji. Ɛ zhɛ e jiye a zhɛba AGWANGWAMA nu Jɛrusalɛm, ni Ishɛmɛ ɛtɛ ibwɛ i tijilo.