Read bassa AYIZAYA 28 Bible Online

AYIZAYA 28 - bassa bible

AYIZAYA 28

¹Cɛnjɛ ti Isrɛl ti zhɛ ta nda hwuŋ adangboo! Ụjɛrụma aba zhɛ wa lụmba gana modwodwo, gana adara na ehwurembe aba a na mayaga ma ngba patanganɛ a shɛ ta. A busa tebiye iwɛ adara ata ebiye aa patanganɛ, ama mayaga kaa ma ngba aŋ, ee tilegeni ya gana atwa na 'wi!

²AGWANGWAMA 'yajɛ bụtụ bu ko bu ukpahiŋ na kaa 'yajɛ ikɛnyi na mama 'imɛ maa sukakana aŋ. Bi zhɛ ba zhajɛ gana atayɛ-eshilo, gana eshilo tụ'walụ. Bi zhɛ ba zhajɛ gana meni mu na ma zhagajɛ, mɛ 'yajɛ kaa ufwunga tebiye; ibɛ po bɛɛ zhɛ ba lashɛga cɛnjɛ ta ata hwɛɛ.

³Ɛ zhɛ o rukoto adara tumama sata te ehwurembe Isrɛl ata mayaga ma ngba nɛ ɛvwɛvwɛjɛ.

⁴Ụjɛrụma wa a'yagajɛ ata zhɛ wa lụmba, wo hwuwowu eshigiri, gana tụ'walụ to owowo tu na tɛ nɛ hiiŋ, ee cwi[89] aa yɛ tụ ba gunu ata.

⁵Ụjita zhɛ wo to ta AGWANGWAMA na Hwuri Kpaaŋ zhɛ a sha gana udara ụjɛrụma wa atwa ubwa a na benengeni, keeni ikwele nɛ pilanụ no ofwo atwa na ta vwanganɛ.

⁶Bi zhɛ bo shidingo ajɛmɛ-ụshɛrɛya nu mpiala mụ ụshɛrɛya u tishiriri tụdụma; bɛɛ zhɛ bo shidingo atwa na shikeni no odubo ụshɛpwụ, o unzo ejeshi nu mpiala mu ukpahiŋ.

⁷Okwo egesere, no onongbo, a swa du mayaga, harɛ maa ngba aŋ, aa nda gologolo. A swa mayaga keeni iyi tuswa nɛ 'yajɛ ikɛnyi, aa twatwagwụ adukwutwa, iyi elele sukwutwogonu aŋ. Egesere eri shi o eshicigo ozobu na Agwatana a pana aŋ o, onongbo kaa eri shi a duma ụshɛrɛya elele na aa 'waŋnanɛ aŋ o, iwɛnɛ ta mayaga ma ngba aŋ.

⁸Ofwo elele na aa jɛjɛ, a shɛ tugba hwɛɛ, i zasa ofwo elele vwɛ nu ukwara o.

⁹A ma n gagwụmana, ɛɛ hiɛŋ, Ata aba kwuŋ bụtụ ata hiɛŋ maa ubwa bo mbisogono iyii? Gaaba bwa ba jala utumwa ata ubwaa? Miaụŋ mu na mu te jwe unu no mosubo kiri utumwa ata ubwa zhɛmanɛ!

¹⁰Ba jala maa bu no ti mbisogono a, a, maa bu no ti mbisogono shɛwala shi ye, shɛwala shɛ na, epe cwɛŋ, peye cwɛŋ.[90]

¹¹Asha AGWANGWAMA zhɛ e suje agaiŋ ata ahiɛ hwụjɛ shɛ rɛjɛmɛ ra aba, maa e mbisegeni atwa ubwa iyi.

¹²Bi peni atwa na lukwumi ụhinjanụ, baa hiɛ ingatanjɛ hwɛɛ hiŋ, ama hi lacɛ kaa waa maa hiɛ shɛlagana bụ.

¹³Iwɛbɛ po AGWANGWAMA zhɛ mo hi mbisogono a, a, bu mo hi mbisono shɛwala shi ye, shɛwala shɛ na, epe cwɛŋ, peye cwɛŋ. Uvwuna elele ehi shepi, hi zhɛ hia twa udukwutwa. Hi zhɛ hia ala-ụngwụ, ɛ zhɛ ma hi ima no ogwuru.

¹⁴Ahiɛba anjɛ shɛsada, a na yɛ tugwama ta atwa ata nu Jɛrusalɛm, shɛlaga ma maa hiɛ hwụjɛ iyi nɛ AGWANGWAMA jɛmɛ.

¹⁵Hia duma ishɛkɛ maa hi twawa-unu no tu'wo, ehi momo lononu ne e'uye. Hi heŋshi ree maa yaa shɛ tu'wo ti zhajɛ hwuŋ, hi zhɛ hia banangana iwɛnɛ ta ahiɛ datanɛ ụzagwụ tudwa[91] keeni tuhalakaka.

¹⁶Iyi AGWANGWAMA Mokondo na Hwuri Kpaaŋ hiɛŋ na, bi hiɛŋ, N zhɛ ma ma ukoshilo na 'yajɛ ikɛnyi, na kaa zhɛ wo shikono dimi nu Zayon. Nu bwa Ngɛɛ zhɛ ma patana utayɛ usugwulumi na 'yajɛ ikɛnyi[92] nu bwa du Ngɛɛ zhɛ ma 'nyata, maa, Bụtụ na 'yajɛ rishe-tɛtɛtana ru na ri shikeni dimi, ohwulu zha shɛ o horoko bu o.

¹⁷Tiririri tuba ti zhɛ ta sha uhwohwo na ɛɛ zhɛ a manganga ukoshilo ata, tɛcara, tuba ti zhɛ ta sha bumenji bu bwa tɛndarɛshɛnga. atayɛ-eshilo, aba zhɛ o sugo ụzagwụ ata ahiɛ ga datanɛ, meni mi zhɛ ma zhagajɛ mo sugo tuhalakaka ti hiŋ, tu gata tɛ ga shɛ ijilɛni hiŋ.

¹⁸Unu ata ahi ga twa la no tu'wo, zhɛ wa bwadụ, tumomo lononu ti hiŋ nu nhwaŋ-me-e'uye ti zhɛ ta garatagwụ. Aka elele tu'wo ti zhajɛ, ti zhɛ to hi sugo.

¹⁹Ti zhɛ tu na hi kwụna heni heni, tu uvwungwa, tu uwaŋna. Utumwa elele ehi leshiji no olugwo Agwatana zhɛ na hi shana iyi inyɛsɛ!

²⁰I zhɛ ma hi shana gana bụtụ na mekeni eweci no ogodo na twa sụ unjɛswa maa ndarɛshɛnga ivwunɛ ibwɛ, na kaa tugwuno ti heri shi maa tu botogwu bu tu'urugono.

²¹AGWANGWAMA zhɛ ɛ ishijɛ ba nda abwagara gana na baa njɛ la ni Ishɛmɛ Pɛrazim[93] keeni ulomu Gibion, bi zhɛ ba ụrɛcɛnga iyi elele nɛ baa mama imanganjɛ maa nda. ijɛ ɛtɛ kaa i shɛ iyi tudama, nɛ kaa shɛ du iyi ifwo.

²²Ta shapa ma unu ga Ama hiɛ tɛtɛgana maa hiɛ njɛ uŋ iyi itɛjɛ o, yaa shɛ yaa hiɛ shanɛ iyi itɛjɛ, asha i zhɛ ya gwuma maa hi benengeni. N hwụjɛ ta AGWANGWAMA na Hwuri Kpaaŋ heŋshi maa nda u'una ga ufwu hwɛ hwɛɛ.

²³Na shɛlaga ma n-ndumwa mu na Ama duma; na pana ma abashɛ iyi nɛ Omo hi mbiso.

²⁴Bufwashɛ suu ba uranga hwuŋ ugwubwo tɛnda aka elele? Ba uranga suu tubwada tɛnda aka elele?

²⁵Yaa shɛ bee bweji itimɛ ɛtɛ bee hwuwi, bi zhɛ ba bila ivwɛgɛ keeni ikɛpɛ. Ba bila ohiu geri aba, nazhɛ ba bila ushɛkapa geri bwa[94] bi eri ba bila iyi inyɛ geri ibɛ.

²⁶Ubwa mepi gana na maa nda ugondu ubwa, iwɛnɛ ta Agwatana mbisegeni bu.

²⁷Bi zha shɛ ba shapa bumbolo na hwuri uzhinono maa dubo ivwɛgɛ keeni ikɛpɛ o, ama bi zhɛ ba shapa bumbolo na gwumwa uzhinono.

²⁸Bi zha shɛ kaa ba uranga ohiu tudubo maa a bwaratagwụ o, ubwa mepi kaa gana na maa dubo aŋ ni idɛkwɛ ɛtɛ yo dubo ohiu maa kede izɛgwu ya aba bwaratagwụ o

²⁹Ti'inta tu ga hwɛɛ tu banɛ no olugwo AGWANGWAMA na Hwuri Kpaaŋ. Agwatana, ubwa ba imanganga iŋ na ti'inta tu bwa; iwɛbɛ kaa po ya 'yaga eshe aka elele.