Read bassa AYIZAYA 29 Bible Online

AYIZAYA 29 - bassa bible

AYIZAYA 29

¹Ariɛl, Ariɛl, bi zhɛ ba nda hwuŋ adangboo, gabụ ụshɛpwụ ata ge Devid jɛjɛ la! Ga a na kaana uywa nu unya, ge isene na ta tuhwulo no turungo.

²Okwo ti yaa shɛ gana ata, N zhɛ ma kalanɛ Ariɛl tiriri, u'wo tutwa, no tijirongono zhɛ ya shɛnda nụ ụshɛpwụ ata, u zhɛ ma n shana gana Ariɛl gom.

³N zhɛ ma bu hwala mo rungwutwonu, ma bu kalana bụkpagwụ maa ma bu sukakana.

⁴Jɛrusalɛm zhɛ wa sha gana bụtụ na 'wi na ba jala maa dumana iwɛ nu nhwaŋ-me-e'uye, gana bụtụ na ni unu ubwa nu upwupwutu ba jala kaa ma dumana iwɛ. Rụhwụŋ rụ bụ ri zhɛ ra suba rụhwụŋ rụ ụbaratụ, ri zhɛ ra banɛ na cɛnjɛ, na amɛ upwupwutu ata ɛbi zhɛ bu na duma iwɛ swɛɛ swɛɛ.

⁵Agaiŋ[95] ata sukakanɛ la Jɛrusalɛm, ɛ zhɛ a hiɛla fwuuŋ eshigiri gana ubwodolo. Ejeshi ata aba a na kaa ma bu sha la inyɛsɛ, ɛ zhɛ a hiɛla eshigiri gana afwụrɛkecɛ, na aka na ebi ge heŋshi shi.

⁶AGWANGWAMA na Hwuri Kpaaŋ zhɛ a zhajɛ no oto keeni cɛnjɛ tizhingotu maa ma bu lashaga. Bi zhɛ ba tumwanɛ uvwugo ụ'wụtụ keeni ulwa na wo songo ofwo.

⁷Nazhɛ unyama we ejeshi[96] edenji a na ga sukakana Ariɛl kpaaŋ, ti ikepi ibwɛ maa e peni bu tiriri, ti i'wɛŋnɛ ujasa ya ba, ti iyi elele ya ba hwɛɛ zhɛ ya ishɛga gana ụwalabụ, i zhɛ ya sha gana ozobu na bụtụ kwụbɛ nụ ụjita.

⁸I zhɛ ya shana unyama we edenji ata na ga sukakana Jɛrusalɛm gana bụtụ na imunɛ gwụmɛ tebiye, bee wetegeni ụwalabụ, baa yɛ iyimɛyɛ, ama aka na bɛɛ zhinjɛ ya, baa ta hwuga waa imunɛ ye ebe ga gwụmɛ bụ. Kwo kaa gana bụtụ na i'uyɛ gwụmɛ tebiye, bee wetegeni ụwalabụ bee swe meni, i'uyɛ hiŋ bu, ama aka na bɛɛ zhinjɛ, baa zhɛngananɛ ni i'uyɛ ye ebe ga gwụmɛ bụ.

⁹Na ta ma tuhwulo nụ ụlagwụ! Na ta ma tuhwulo nu ulubwo! Na nda ma gologolo gana atwa na mayaga ma ngba keeni iyi tuswa nɛ 'yajɛ ikɛnyi, tobwolo kaa i zasa iyi elele nɛ ehi swe o.

¹⁰AGWANGWAMA ihi dudugwonuo mpiala mu na ma kala bụtụ malabụ mụ 'wụtụ. Bee utegeji shishe shi hiŋ ahiɛba egesere, bee lubicinji shishe sha akwụbɛ-uhwaŋna.

¹¹Ozobu ga hwɛɛ a hiɛ shanɛ gana n-ndumwa mu na mi 'nyeci nu utakada na ee kepi. Ebi shepi uŋ no ofwo bụtụ na ge 'yebi tɛrɛta, ɛbi hiɛŋ bụ, Sukwu, N rɛtanjɛ kaa. Bi zhɛ bɛ hiɛŋ, N eri shi ma rɛta uŋ o, iwɛnɛ te e kepi uŋ.

¹²Ebi zhegeni kaa bụtụ na 'yeshi tɛrɛta, ɛbi hiɛŋ bụ, Rɛta uŋ. Bi zhɛ mɛ bi hiɛŋ, N 'yeshi o.

¹³AGWANGWAMA hiɛŋ, Atwa ga ma n zhɛba nu n-ndumwa mu unu aba kwakwa, ama shɛmɛ sha aba shɛ dụlụmɛ ne mi. Iwɛ ya Agwatana aba tɛnda[97] i shɛ gana na te e seshi nu uhiuhiu kwakwa keeni gana na ti iyi uvwovwu ya atwa namɛ ibɛ aa nda.

¹⁴Iwɛ inɛ ɛtɛ N zhɛ ma ndana aŋ sasana iyi ike i tudama nu umama 'wanụ. Atwa na ga incɛ, ɛ zhɛ a sha ya shɛlagwụ, atwa na kaa ge mepi iyi, a zha shɛ a mapa ya iyi elele o.

¹⁵Atwa na a nda iyi ne tusweci, a na heŋshi maa AGWANGWAMA kwụbɛ shɛ aŋ o, ɛ zhɛ a nda hwuŋ adangboo! A nda iyi ya aba ne tusweci, aa nda iyi ne tishi, aa haŋsa maa i zasa bụtụ kwụbɛ aŋ o, ɛ hiɛŋ du maa, Gaaba kwụbɛ iyi nɛ ata ndaa? Gaaba mepi iiŋ?

¹⁶Gaaba hwuri binyaa? Bumo-bu-nkwasa suu; kwo kaa cɛnjɛ-ti'wɛŋnɛ? Iyi nɛ bụtụ njɛ suu eri yɛ hiɛŋ bụ, Shɛ gabụ bɛ n njɛ? Okwo iyi nɛ aa njɛ suu eri yɛ hiɛŋ bụtụ ata njɛ iŋ, Bụ lagwụmɛ?

¹⁷Gana na tɛ ɛ hiɛŋ, Na aka fwalaa, uwapa Lebanon na ge inshi[98] zhɛ wa sha ehilo na a zhɛma iyi, ehilo na a zhɛma iyi zhɛ a sha uwapa na inshi.

¹⁸Ụjita ata ci hwuŋ, shɛkwụrụ shi zhɛ sha hwuga ta a rɛcɛ utakada ata; sholubo shɛ na shɛ ga kwụbɛ shɛ uhwaŋna, shi zhɛ sho ushigwo shishe a kwụba ya uhwaŋna.

¹⁹Okofwo zhɛ a bwada unyasa na AGWANGWAMA, atwa na meme zucinje zhɛ a 'yaganana unyasa na Bụtụ ata bi Tijilo bi Isrɛl.

²⁰Ama inɛ ya atwa elele na a nda atwa tuhwulo, na atwa na ngbaracɛ Agwatana cwɛŋ, zhɛ ya kwunanga. Ɛ zhɛ kaa a kwụna bụtụ-bi-iwɛwɛ be elele.

²¹Agwatana zhɛ a kwụna atwa na o gbozhigo anya aba, na atwa na a laka maa e peni anjɛ-iwɛwɛ ulwapɛ, ta atwa na a la tiseyida tụ ụzagwụ; a naa na a lakana atwa tɛkana maa a 'yaga tutono ta aba cɛŋ.

²²Iwɛbɛ po AGWANGWAMA na gwube la Abraham nụ ụbaụta, jɛmɛ iwɛ ihwɛ Jekob, bɛɛ hiɛŋ, Ahiɛba atwa mi a na shɛ ụlamụ Isrɛl, ụpụrụsa zha shɛ ma hiɛ ima ya kwukwuŋ; ezuye kaa du zha shɛ ma hiɛ sha ya o.

²³Aka na ahiɛ kwụbɛ[99] hwuŋ miaụŋ mu na Ngɛɛ zhɛ ma hi pana, nazhɛ ɛhi zhɛ hia mapa maa Gamba n shɛ Bụtụ ata bi Tijilo bi Isrɛl. Hi zhɛ hi ma n muna ụjɛrụma, hi ma n sụma kaa du inyɛsɛ.

²⁴Atwa na ge eshiciji shi iyi na shihaŋsa sha aba, ɛ zhɛ o eshicigo ya; atwa na kaa ga gagwumanga, zhɛ o lono ya maa e sekekeni aŋ iyi.