Read bassa AYIZAYA 3 Bible Online

AYIZAYA 3 - bassa bible

AYIZAYA 3

¹Na aka ga ibɛ Agwangwama, na shɛ AGWANGWAMA na Hwuri Kpaaŋ a jala maa bacɛnga iyi elele keeni bụtụ be elele na atwa ga ga datanɛ Jɛrusalɛm keeni nu Juda, bɛɛ zhɛ ba dwacɛnga iyimɛyɛ ya aba tɛzhajɛ keeni meni ma aba,

²bi zhɛ ba bacɛnga atwa aba a na beni urishi, te ejeshi aba, ta ajɛmɛ-ụshɛrɛya aba, te egesere aba, ta ashɛjɛ aba, tu n-nyarɛ ma aba,

³te eberezhe atwa dupu dupu, ta atwa na 'yajɛ ụjɛrụma, ta ajɛmɛ-ushawura aba, ta anjɛ-tishino a na o shikocongo iyi nɛ aa ndangana no tishino ta aba.

⁴N zhɛ ma nda maa miaụŋ ma aba me eyi mɛ shɛ atwa shihwolu. Miaụŋ ma aba mi shenje[10] mu ba mi zhɛ ma sha tuba ogwomina aba.

⁵Atwa zhɛ na mama ndanụ umungwuta, bụtụ bụtụ zhɛ na sukakana binya bwa, uyebi ye zhɛ na sukakana uyebi na. Atwa na ta waŋnɛ zhɛ na sukakana atwa na hwuri aŋ. Atwa na ci shi anya zha shɛ na muna atwa na hwuri aŋ ụjɛrụma o.

⁶Aka oko zhɛ o to hwuŋ, tu umwamwa uko zhɛ wa tala bụtụ bu ko na amɛ aba, ɛ hiɛŋ bụ, Gabụ bɛ 'yajɛ tugwuno to tu'urugono, asha sha agwuma tu, maa untangana tuhwuŋzwotongwu tu ubizo ga.

⁷Ama bi zhɛ bɛ jishijɛ aŋ jita ata, bɛ hiɛŋ, Awo! N zha shɛ ma sha bɛnɛnjɛ hiŋ o. N zasa du kaa okwo iyimɛyɛ, to tugwuno tu tu'urugono. Ta ma nda ma agwuma hiŋ o!

⁸Iiŋ, Jɛrusalɛm twawa udukwutwa, Juda kaa zhɛ tuhwuŋzwo! A sukakana AGWANGWAMA nu n-ndumwa mu unu aba, ti iyi elele nɛ aa nda, a twajɛ ụjɛrụma we eshe ubwa.

⁹Apɛshɛka aba le tiseyida ta tụwụma ta aba. A njɛ iwɛwɛ caakwụ gana atwa Sụdụm, ɛ zhɛ a nda hwuŋ adangboo! E ci ya ufwu tɛnda, aba kaa meme sugeni abara ata ne ebe.

¹⁰Mbiso atwa tiririri maa, Iyi zhɛ ya zhɛmana aŋ, ɛ zhɛ na ya tụ'walụ ti iyi nɛ aa njɛ.

¹¹Ama ogworozwo zhɛ a nda adangboo, iwɛnɛ tɛ ɛ zhɛ a nda aŋ iyi nɛ aa njɛ atwa.

¹²Miaụŋ ma ba ma nda atwa mi umungwuta, eyikwo aba, aba shɛ a'yagajɛ atwa mi. Ahiɛba atwa mi, a'yagajɛ hiŋ ma hi inzhɛnga, iwɛbɛ po ee mepi shi uhwaŋna na shɛ maa hi to.

¹³AGWANGWAMA munji no ohwolu ubwa, nu umwono-ụshɛrɛya, baa mama 'imɛ maa duma ụshɛrɛya wa atwa ubwa.

¹⁴AGWANGWAMA zhɛ o tono maa duma ụshɛrɛya n-nyarɛ keeni una a'yagajɛ atwa ubwa. Bɛɛ zhɛ bɛ hiɛŋ, Hi leshiji ehilo afwafwa[11] mi ni tilɛɛ, ehi shidenji shimwono shi hiŋ ni iyi nɛ ahiɛ lashajɛ okofwo.

¹⁵I teni shi cɛŋ maa hiɛ njɛ atwa mi tuhwulo, maa hi na ya okofwo imwere o. Gamba AGWANGWAMA na Hwuri Kpaaŋ N dumwa.

¹⁶AGWANGWAMA hiɛŋ, Kwụba ma gana na te eyikwo Jɛrusalɛm a busa! Oo sumono ofwo, oo rungo. O sho i'undu aa vwala shimbi nu urungo aka elele maa atwa na kwụba aŋ. E mbe shi ahaŋpalụ na tahaŋnụ ta aba o, ibɛ po shi'umwo shɛ na aa shananjɛ ni i'ilu ivwunɛ shɛ na nda rundu gana ogogolo.

¹⁷Ibɛ po Ngɛɛ zhɛ ma patana eyikwo ata Zayon andala nu ntuno ma aba, Ngɛɛ zhɛ mo shilo ofwo aba u tusweci mohondo.

¹⁸Jitoo ko AGWANGWAMA zhɛ a lashaga ijɛ ɛtɛ eyikwo Jɛrusalɛm a busa iwɛ ibɛ, ibɛ shɛ shi'umwo sha ata aa shana ni i'ilu ivwunɛ ya aba, ta ma shɛ ta aa ta nu uhiuhiu, ta ma shɛ ta aa shana nu n'ilu ma aba,

¹⁹ta ma shɛ ta aa shana ni imbele i'ɛlɛ ya aba. Bi zhɛ ba lashɛga shụ hwɛɛ; to owowo ata oo urugono apɛshɛka aba,

²⁰ta akata aba, tu nlayɛ ma ata mi tishino aa shana na aragbamụ, te shimbi sha aba;

²¹ta tɛkanɛ ta ata aa shana ni ivwɛ ya aba keeni n-nyanu ma aba;

²²tu n-nduka ma aba mi biye, to otogwo, ti i'wɛŋnɛ ya aba elele nɛ oo hwuŋtongono, ta shɛrɛta sha aba;

²³tu nrata ma aba, to otogwo aba ilinɛn, te ereweni aba, to shiwowo sha aba.

²⁴Tụlụkpashɛ maa a sukwutwa manɛbɛ mi biye, ama mu naa na ụhiụŋ muba zhɛshɛ mu ba ɛɛ zhɛ na sukwutwa. Tụlụkpashɛ maa e umpi amazhɛya ne shimbi sha aba, ama ihwehwe ɛɛ zhɛ no umpo; tụlụkpashɛ maa e shi tihiŋzhe, tukpala ɛɛ zhɛ na 'nyanga ya; tụlụkpashɛ maa o no urogono tugwuno ti biye, tuzuzu ɛɛ zhɛ no urogono; ụzhɛ wa aba zhɛ wa jɛshɛrɛga wa sha ya ezuye.[12]

²⁵Ɛ zhɛ a kwụna etwenyi bu nu utokwobi, ujasa du kaa zhɛ wa ya ejeshi bu a na ge beni urishi.

²⁶Shidubo shɛ ụshɛpwụ ata ụ'wụtụ shi zhɛ sha twa-u'wo, shɛ na ta-ụkwụla, ụshɛpwụ ata ụ'wụtụ ni ikɛnyi ibwɛ zhɛ wa sha gana biyikwo na jɛjɛ na cɛnjɛ mohondo.