Read bassa AYIZAYA 32 Bible Online

AYIZAYA 32 - bassa bible

AYIZAYA 32

¹Hioko ma, agwuma oko zhɛ a ya hwuŋ tugwama, bɛɛ zhɛ ba untangana atwa ne tiririri, nazhɛ atwa na namɛ no shihwolu zhɛ na dumangana atwa ụshɛrɛya ne tishiriri.

²Bu na bu na na amɛ aba zhɛ ba sha gana umwono tuswaka na aka bu uvwugo keeni ofwo tuswaka ne eshilo mpiala. Ɛ zhɛ a sha gana uhwulwo na wa fwunga nụ ụshɛka, gana uparatayɛ na namɛ nu uhwuŋnu cɛnjɛ tu na bụtụ zasaba.

³Eshe atwa na kwụbɛ zha shɛ o utogo ya, shɛcɛbɛ sha atwa na hwụjɛ kaa shi zhɛ sha shɛlaga.

⁴Shihaŋsa sha atwa na a nda izɛlɛgwu shi zhɛ sho eshicigo iyi, irɛtu ya atwa na ga 'yajɛ tugbudu zhɛ ya duma iyi nɛ namɛ na shɛmɛ sha aba raawụụ.

⁵A zha shɛ kwukwuŋ ɛ hiɛŋ ya maa alagwụ shɛ bụtụ bu tandụ, i zasa kaa bụtụ zhɛ ba muna ya bụtụ na sugeni shi iwɛ ụjɛrụma o.

⁶Alagwụ a duma n-ndumwa mụ ụlagwụ, baa haŋsa maa bu na nda iyi nɛ shɛ iyi iwɛ. Iyi nɛ baa nda, tu n-ndumwa mu na baa duma mɛ shɛ tutwa no ofwo AGWANGWAMA. Bi peni shi kaa atwa na imunɛ gwụmɛ iyimɛyɛ maa a yɛ o, atwa na i'uyɛ gwụmɛ, bi peni shi aŋ kaa meni maa e swe o.

⁷Bụtụ na lagwụmɛ bɛ shɛ bụtụ bi ci'nyɛ na du ba nda iyi iwɛ, ba haŋsa maa u kwụna okofwo nụ ụzagwụ tudwatwaga, baa lakana aŋ maa iyi nɛ shɛ inɛ aba temi aŋ.

⁸Ama bụtụ na shɛ bụtụ bụ ụjɛrụma, ba nda iyi na tɛcara, boo shikono kaa dimi ni iyi nɛ teni cɛŋ tɛnda.

⁹Ahiɛba eyikwo na namɛ na amɛ-olom suu, ishijɛ ma hiɛ hwụjɛ iwe mi, ahiɛba miaụŋ-mo-o mu na hi meme gembi, shɛlaga ma iyi nɛ Ama njɛ.

¹⁰Ahiɛba eyikwo na hi meme gembi, ugiriri zhɛ ma hiɛ kala. Iwɛnɛ po afwafwa zha shɛ a 'wala maa hi jicinje ni ihwɛ o.

¹¹Ahiɛba na hi ga namɛ na amɛ-olom suu, na zhɛgɛda ma, ahiɛba na hi meme gembi, rufwogo ma tugwuno ti hiŋ maa hiɛ rɛ tugwuno tụ ụcɛnjɛ tɛnda ne shimbi shi hiŋ.

¹²Na pa ma shɛgba shi hiŋ iyi iwɛnɛ ta a njɛ ntuma ma ata ufwu, tu ntuma ma ata ma shifwafwa mi biye mu na mu ta 'yajɛ ugwungwu.

¹³Esepi ni ikpɛɛnci ibɛ ya waŋna ya na cɛnjɛ ta atwa mi. Twana ma shimwono sha ata atwa a ndana la unyasa u'wo, tụ ụshɛpwụ ata atwa shini la.

¹⁴Atwa zhɛ a bana ni ihwɛ ya agwuma, ɛɛ zhɛ a bana nụ ụshɛpwụ ata ga shɛ uhiu u'una ata kpaaŋ kpaaŋ. Nhwaŋ keeni ashɛkpa ata aa ga nda la u'iywa zhɛ o hwuŋzwo hwɛɛ unyizo-nom. Shɛnabara na agwụdụ aba zhɛ o gwushigo ya apata ofwo maa a na yaga.

¹⁵Ama Agwatana zhɛ ma tu tumwananɛ sasana Mpiala mu bwa. Cɛnjɛ tu na ti ge tileni la gadaga, ti zhɛ ta shaanana cɛnjɛ ti biye, nazhɛ shihilo shi zhɛ sha matanana iyimɛyɛ ibiye.

¹⁶Tiririri keeni ụshɛrɛya u tishiriri tụdụma zhɛ wa nama no ofwo elele na cɛnjɛ ta ata.

¹⁷Bụtụ be elele zhɛ na nda iyi tiririri na amɛ-olom keeni tunama tu tusuu ti zhɛ ta nama na cɛnjɛ ta ata unyizo-nom.

¹⁸Atwa Agwatana zhɛ a nama uzawa oruwo elele, nhwaŋ ma aba mi zhɛ ma sha nhwaŋ ma amɛ-olom keeni ofwo tubanangana.

¹⁹Ama atayɛ-eshilo kaa zhɛ na dwatwaga uwapa, oo hwuŋzotongo ashɛpwụ a'wụtụ a'wụtụ. Gabụ du bi zhɛ bɛ hiɛŋ ge e meeneni Jɛrusalɛm maa e shileneni ukoshilo umwono Agwatana.

²⁰Unyasa na atwa zhɛ a 'yaga iwɛ meni mu na mi zhɛ ma bala iwɛ iyi nɛ aa bilajɛ keeni ofwo tiyaga ebiye a na zhɛ a nama no ofwo elele iwɛ idɛkwɛ keeni iwɛ inɛ zhɛ wo gombo tebiye.