Read bassa AYIZAYA 37 Bible Online

AYIZAYA 37 - bassa bible

AYIZAYA 37

¹Gunu na ta agwuma Hɛzɛkia hwụjɛ n-ndumwa mu ga, bee dwetweji otogwo ubwa na amɛ-tụhaŋtụ, bee urigeni tugwuno tụ ụcɛnjɛ tɛnda. Nazhɛ bee hwuri nu umwono wa AGWANGWAMA.

²Baa tumwanɛ Ɛliakim na untanganɛ ugondu ihwɛ ya agwuma, na Shɛbna na shɛ bi'nyeci bu umwono-ụshɛrɛya keeni ehiu onongbo no ofwo bigesere ga Ayizaya yɛu Amoz, aba du uregeni tugwuno tụ ụcɛnjɛ tɛnda.

³Utumwa baa tumwanɛ aŋ no ofwo Ayizaya na, bi hiɛŋ, Hwayɛ ga shɛ ụjita u tiriri. E ti peni ulwapɛ, ụpụrụsa kaa u tɛ shɛ. Tɛ shɛ gana biyikwo na 'yajɛ ofubo na kaa aka ubwa tumata ci, ama bu zasa ya kaa ikɛnyi nɛ waŋnɛ maa mata o.

⁴Agwuma Asiria tumwanɛ uhiu we eberezhe ubwa maa twagaga Agwatana uumwa. Ga AGWANGWAMA bụ hwụjɛ tutwa tu ga maa pana atwa na njɛ tụ ulwapɛ. Iwɛ ecilo ata, nda adua no ofwo Agwatana iwɛ tumwata ta atwa tu a na ta vwɛ.

⁵Aka na tu ga Ayizaya hwụjɛ utumwa wa agwuma Hɛzɛkia,

⁶baa tumwananɛ bụ ajɛshɛgwa ga, bɛɛ hiɛŋ, AGWANGWAMA hiɛŋ, Ta nda inyɛsɛ n-ndumwa ma ata mụ wɛ abụ hwụjɛ agwuma Asiria n dumanganɛ o.

⁷AGWANGWAMA zhɛ a nda maa agwuma ata hwụjɛ unabarɛ uko na zhɛ wo gwuricingo bu na cɛnjɛ tu bwa, maa a kwụnɛ bụ apata nu utokwobi.

⁸Aka na tu uhiu we eberezhe ata atwa Siria hwụjɛ maa agwuma Asiria ishɛgwa nu Lakish bee zhe Libna baa nda ujasa na aba, bee zhe apata maa kwubɛ bụ.

⁹Utumwa ata zhe wee ci agwuma Asiria gɛ Sɛnakɛrib, ɛɛ hiɛŋ, Ga Tihaka bụtụ bi Itiopia suje ba ejeshi Ijipti bee ci maa sukakana aŋ. Aka na ta agwuma ata hwụjɛ n-ndumwa ma ata, baa 'nyatanɛ agwuma Juda gɛ Hɛzɛkia utakada, bɛɛ bụ,

¹⁰Azhɛba ata abu datanɛ ree ubu mbishi maa bu zha shɛ bo tono i'ɛlɛ mi? To lono maa e bi helekeci o.

¹¹Bu hwugwa iyi nɛ shɛgwuma sha Asiria shɛ ndanjɛ a'una na bee irecenji hwɛɛ. Bi heŋshi ree maa bi eri ba banangana?

¹²Ogwunukwoshi mi irecenji ashɛpwụ Gozan hwɛɛ, tu Haran hwɛɛ, ti Rɛzɛf, baa kwụnɛ Bɛtɛdɛn na namɛ la ni Tɛlasa, i zasa atwa elele azhɛba aba eri o bicingo.

¹³Cee agwuma Hamat, na a na Apad, na a na Sɛfavaim, na a na Hɛna keeni a na Iva namɛ hwuwayɛɛ?

¹⁴Agwuma Hɛzɛkia leshiji utakada ata ni i'ɛlɛ ya atumwa ata, baa rɛcɛ uŋ. Nazhɛ bee munji nu umwono wa AGWANGWAMA, bee berishiji uŋ nu umbe AGWANGWAMA.

¹⁵Gɛ Hɛzɛkia njɛ adua pa AGWANGWAMA, bɛɛ hiɛŋ,

¹⁶Oo AGWANGWAMA na Hwuri Kpaaŋ, Agwatana Isrɛl, gabụ na bɛ jɛjɛ ni idwɛtwɛ bu na azuba, na ashashɛ iyi-uumwa ɛtɛ 'yajɛ apiambɛ. Gobuko gba bɛ shɛ Agwatana na untanganɛ cɛnjɛ-ta-tugwama tu unyizo hwɛɛ; gabụ bɛ njɛ cɛnjɛ, ta tụla hwɛɛ.

¹⁷Oo AGWANGWAMA, zhire acɛbɛ bụ maa hwụjɛ, oo AGWANGWAMA, hɛŋpishinjɛ eshe bu maa kwụbɛ. Hwulaga hwuwayɛ go n-ndumwa me elele mu na gɛ Sɛnakɛrib tumwanɛ maa ma bu twagaga gabụ Agwatana uumwa.

¹⁸AGWANGWAMA, iwɛ-tɛkana ga, ti mepi maa shɛgwuma sha Asiria shɛ nduwa edenji gembi ufwugwo ufwu, aa njɛ cɛnjɛ ta aba shisombo kpaaŋ,

¹⁹ee hwoŋzhenji azhɛba aba a na shɛ shɛ Agwatana, ama ntatanuwaŋ mu na bụtụ njɛ na atayɛ keeni i'wɛ'wɛ maa shɛ.

²⁰Oo AGWANGWAMA na shɛ Agwatana tu, hwuwayɛ go iti bicinji ni i'ɛlɛ ya atwa Siria, iwɛ maa cɛnjɛ-ta-tugwama tu unyizo kpaaŋ ti mepi maa gabụ kiri bɛ shɛ Agwatana.

²¹Nazhɛ ga Ayizaya yɛu Amoz tumwananɛ agwuma Hɛzɛkia utumwa, bɛɛ hiɛŋ, AGWANGWAMA na shɛ Agwatana Isrɛl hiɛŋ, Adua ata abɛ njɛ pi mi iwɛ Sɛnakɛrib agwuma Asiria,

²²n-ndumwa mu na AGWANGWAMA jɛmɛ iwɛ ubwa na, bi hiɛŋ, A-Sɛnakɛrib, ụshɛpwụ Zayon zhɛ ma bu hinga ilɛtu ya asada, wa bu ngbaraka cwɛŋ bana. U zhɛ na bu ndana azhɛkwa ne ekwunyi bu to bo gozhigo.

²³Gaaba kwuŋ ebi heŋshi maa ubwa aba twagaga, aba nda asada, ɛbɛ bwɛjɛ rụhwụŋ ru ugadagba, obo sugono eshe bu na azubaa? Bu n mụnɛ shɛ ụjɛrụma o, Gamba Bụtụ ata bi Tijilo bi Isrɛl.

²⁴Gabụ bu tumwanɛ miaụŋ mụ bụ mu ugondu maa e m mbiseji ishɛkɛ, ɛbi hiɛŋ, Ni ihɛŋtu mi ujasa nɛ gembi ufwugwo Ngee leshiji nshama mu Lebanon mu na mi zeteji mu hwuri mu na mụ vwɛ hwɛɛ. Aba busa, ɛbi hiɛŋ, N lwogwo osobu na njɛsanjɛ uhwuri a na vwɛ, to orokwo a na ngezeni a na vwɛ nụ ụzhɛ hwɛɛ. Ɛbi hiɛŋ, N twonuo taa na amɛ na amɛ uwapa ata.

²⁵Aba busa, ɛbi hiɛŋ, N hine a'ibwa meni Ngee swe mu na cɛnjɛ ta anya atwa. Ɛbi hiɛŋ, Ni ivwunɛ ye ejeshi mi Ngaa hwụŋcɛnjɛ Urefu Nayɛl.

²⁶Asha bu ta hwụjɛ shɛ suu maa, Gamba n imanganjɛ la ijɛ ɛtɛ cala cala? Ama na aka ga Ngaa njɛ iŋ ya. Gamba m bi peni ukpahiŋ ata maa hwuŋzetenji ashɛpwụ ata a'wụtụ a'wụtụ oo mo maa a shɛ ubizo wɛ ɛzhɛtɛ.

²⁷Atwa na namɛ la na aba, a zasa ukpahiŋ elele o, e zweni aŋ inyɛsɛ, ezuye shɛ aŋ. A shɛ gana ambɛ na namɛ ne ehilo kwo kaa gana ambɛ na unshɛ no osokwu ukogo a na oholobwo uwaŋna kwụnɛ tobwolo e te hwuwi shi uwaŋna o.[114]

²⁸Ama M mepi bɛjɛjɛ bụ, na tubana tụ bụ, ne tugwure tụ bụ, Ngee mepi gana na aba nda abwagara no ofwo mi.

²⁹E m mbishi iwɛ abwagara ata bụ keeni tubusa ta ata tụ bụ, iwɛbɛ po Ngɛɛ zhɛ mo bu shiyono akama ni inyɛnu hwuwayɛ go, Mo bu shiyono ashɛnjɛ nu unu[115] maa mo bu gwuricingo nu uhwaŋna ata abu ga banɛ la.

³⁰Ga Ayizaya hiɛŋ agwuma Hɛzɛkia, Tusakana ti iyi nɛ zhɛ ya nda na. Nu uywa ga keeni unywanywa iyi nɛ mɛmɛ unsɛnjɛ na cɛnjɛ ɛhi zhɛ hia ya, ama nu uywa utatụ, hi zhɛ hia bila iyimɛyɛ hiŋ hia dwa, hia bila afwafwa hiŋ hia ya tụ'walụ ta aba.

³¹Atwa na benengeni nu Juda zhɛ a zhɛmanga tu'waba gana ụ'wụ'wụ na tini tu bwa ti iri cɛnjɛ tebiye, na kaa wa 'wala tụ'walụ.

³²Atwa na vwanganɛ zhɛ a banɛ nu Jɛrusalɛm, atwa na benengeni zhɛ a banɛ ni Ishɛmɛ Zayon. Tɛzhɛgɛdana ta AGWANGWAMA na Hwuri Kpaaŋ, tuba kaa ti zhɛ ta ụrɛcɛnga iŋ.

³³Iyi AGWANGWAMA jɛmɛ iwɛ agwuma Asiria na, bi hiɛŋ, Bi zha shɛ kwukwuŋ be teni ụshɛpwụ ga, okwo i'ilɛ mokondo bi zha shɛ kwukwuŋ ba karɛ uŋ. I zasa kaa bijeshi na 'waŋnɛ abula ujasa na zhɛ bo gwumwonu nu ụshɛpwụ ga okwo tugwumwongonu. I zasa kaa atwa elele na zhɛ a hwala uŋ maa e leshiji uŋ o.

³⁴Bi zhɛ bo gwulo nu uhwaŋna ata baa ga banɛ la uzawa ụshɛpwụ ga tutono. Gamba na N shɛ AGWANGWAMA N dumwa.

³⁵N zhɛ ma jɛlanɛ ụshɛpwụ ga maa mo bicingo uŋ, iwɛ ụjɛrụma mu keeni iwɛ yɛu mi ugondu ge Devid.

³⁶Nazhɛ butumwa ba AGWANGWAMA ba azuba zhe nụ ụjita baa kwụnɛ ejeshi Asiria igbɛɛ-dupu-na-buhanda-ni-bɛ-yebi-na-akpakwụ-a-ta (185,000). Iyi heri n'wo ma aba kiri mi tilegeni apata pipipi!

³⁷Nazhɛ agwuma Asiria gɛ Sɛnakɛrib gwuri bee zhe Ninivɛ.

³⁸Ama jita na baa ta ụrụpɛ ni isume tuwa tu bwa, tu na ɛɛ hiɛŋ Nisrok, ibɛ miaụŋ mu bwa me eyi mi yebi, ga Adramɛlɛk, na Sharɛzɛ mɛ shɛrɛ bụ nu utokwobi, ee gezhiji ee zhe na cɛnjɛ ta Ararat. Ibɛ po yɛu ibwɛ ye eyi ga Isahadon yɛ tugwama tu bwa.