Read bassa AYIZAYA 40 Bible Online

AYIZAYA 40 - bassa bible

AYIZAYA 40

¹Agwatana tu hiɛŋ, Ingatanga ma atwa mi, ingatanga aŋ ma!

²Ta ma atwa Jɛrusalɛm ikɛnyi. Mbiso aŋ ma maa ụbaụta ata aa nduwa[119] gwumwa ya; e gengeni aŋ ya du iwɛwɛ ya aba. N pwonuo aŋ ulwapɛ na teni cɛŋ ni iwɛwɛ ya aba.

³Rụhwụŋ ra bụtụ bu ko ra ugaga, rɛɛ hiɛŋ, Kalana ma AGWANGWAMA uhwaŋna nụ ụshɛka! Hangana ma Agwatana tu uhwaŋna u tukpotoo nu uzhi.

⁴Shidongo ma olomu elele; bwarataga ma nshama, hi hwuŋzetenji tingbekwu; nangwacanga ma cɛnjɛ tu tukporo kporo, maa ofwo elele nagwụ ndalụụ.

⁵Nazhɛ ụjɛrụma wa AGWANGWAMA zhɛ wa banɛ, nazhɛ bụtụgwụmwa be elele zhɛ ba kwụba uŋ. AGWANGWAMA dumwa ni ikɛnyi ibwɛ.

⁶N hwụjɛ rụhwụŋ ru ko ri n hiɛŋ, Ananga utumwa ga! Ngee heŋteni, Ngɛɛ hiɛŋ, Utumwa imbe Ngɛɛ zhɛ ma anangaa? Rɛɛ hiɛŋ, Ananga maa, Tu'waba ta atwa kpaaŋ tɛ shɛ gana ambɛ; ụjɛrụma u tuba ụ shɛ gana modwodwo ma ambɛ.

⁷Ambɛ a lụmba, modwodwo ma aba ma 'waŋ, aka na AGWANGWAMA tumwanɛ uvwugo maa u vwuji aŋ, atwa ilegeji shi ya uhwuri ambɛ o.

⁸Iwɛ-tɛkana, ambɛ a lụmba, modwodwo ma aba ma 'waŋ, ama n-ndumwa ma Agwatana tu mu namɛ tutu unyizo-nom.

⁹Oo gabụ Jɛrusalɛm, mungo ni ishɛmɛ nɛ zeci tebiye maa enenji anabarɛ ebiye[120] Ugana duwa gana na ta rụhwụŋ rụ bụ ri ci, gabụ ga bu 'waŋnanɛ Zayon anabarɛ ebiye. Duma, ta nda inyɛsɛ o. Mbiso ashɛpwụ Juda maa Agwatana aba e ci ba!

¹⁰Hioko AGWANGWAMA Mokondo e ci ba maa untangana ofwo nu ukpahiŋ. Itɛpwɛ nɛ bɛɛ zhɛ ba tụpa bụtụ bụtụ gana na tu baa njɛ namɛ ni i'ɛlɛ ibwɛ.

¹¹Ubwa zhɛ ba untangana iyimabiga ibwɛ gana bi'iywa-ba-agwụdụ; bɛɛ zhɛ bo sotulonu miaụŋ-ma-agwụdụ, ba 'waŋna aŋ nu ụragbamụ ubwa; bi zhɛ bo hwulono ono aba umbe pece pece.

¹²Gaaba eri ba manganga meni mi itekwu nu ukwoto u'ala ubwaa? Okwo gaaba eri ba manga uholo tụla ni i'ɛlɛ ibwɛɛ? I 'yajɛ suu bụtụ eri bo zwono cɛnjɛ tu unyizo ga nu ukwopi. Okwo gaaba eri ba manga uzhinono nshamaa?

¹³Gaaba eri ba mapa amɛ AGWANGWAMA maa mbiso bu iyi nɛ baa shɛ ba ndaa?[121] Gaaba eri bo sokokono bu iyi kwo kaa eri ba pana bụ ahaŋsaa?

¹⁴Gaaba kwuŋ AGWANGWAMA a nda ushaura nu bwa iwɛ maa mapa kwo kaa maa eshicigo, kwo kaa maa soso gana na baa shɛ ba nda iyii?

¹⁵Edenji a shɛ gana meni mu na me ngbe na abwaka, a shɛ gana upwupwutu na zhineni shi ne bumenji ne eshe AGWANGWAMA, ubwa menji adakwụ erefu aa namɛ hɛkɛlɛ gana upwupwutu.

¹⁶isundɛ ye ehilo nɛ namɛ nu uwapa Lebanon waŋnɛ shɛ maa e teji Agwatana tu ụrụpɛ o, i'wɛ'wɛ ibwɛ kaa twa sụ ufwugwo maa a shanɛ ulwa ụrụpɛ tuhwoŋzhingo.

¹⁷Edenji shɛ shɛ iyi elele ne eshe ubwa o; bu ngbaracɛ aŋ gana iyi nɛ zasa uhwara.

¹⁸Gaaba kwuŋ ee eri a manga Agwatana nu bwaa? Okwo ni imbe kwuŋ ee eri a manga bụụ?

¹⁹Bɛ shɛ shɛ gana tuwa tu na anjɛ-ugondu-i'ɛlɛ njɛ o. Bɛ shɛ shɛ kaa gana tuwa tu na alụma sweni azhɛnarɛya ee shikicinji nu u'ibwa na aa njɛ na azụrụfa o.

²⁰Bụtụ be elele na zasa azụrụfa na azhɛnarɛya ba jala ụ'wụ'wụ na gwụmɛ tufwoso. Ba jala bishebi na 'yebi ishebi maa shabana bụ itɛtɛnuwɛŋ nɛ zha shɛ ya laya.

²¹Bi te mepi shi suu? E te bi mbishi shi suu cala cala? Bu ta hwụjɛ shɛ suu gana na unyizo kwuni?

²²Bụtụ ata jɛjɛ ni idwɛtwɛ ibwɛ taa na azuba na tụla, ubwa njɛ ụŋ; bu ngbaracɛ atwa na namɛ nu bwa, a shanɛ bụ gana shosumo. Ubwa berishiji tụla gana tugwuno tu na aa swata no odubo, gana udulo tugwuno.

²³Ubwa zucinje shɛgwuma shɛ na shɛ 'yajɛ ukpahiŋ, baa njɛ ehiu cɛnjɛ tu unyizo iyi yo ohondo.

²⁴A shɛ gana iyi nɛ te kwuni tu'unshɛ, nɛ te kwuni tini tɛta. Aka na AGWANGWAMA tumwanɛ oholobwo, yee hweteni, mpiala suji iŋ gana arɛya.

²⁵Bụtụ ata bi Tijilo hiɛŋ, Asha na aba kwuŋ ehi eri hi ma m mangaa? I ta 'yajɛ waa suu bụtụ ta namba i shɛ gana mi?

²⁶Mbiyana de tụla! Gaaba kwuŋ njɛ mkpasu ma ata abụ kwụbɛɛ? Bụtụ ata ba bacanjɛ mụ mu ko mu ko gana ejeshi, ba suyana mụ inɛ inɛ ni izeci ibɛ, bi mepi ufwugwo muba! Ukpahiŋ ubwa gembi duwa, i zasa kwukwuŋ inɛɛ nɛ inua na amɛ muba!

²⁷Oo ahiɛba atwa Jekob, iwembe kwuŋ po ɛhi hiɛŋ, Uhwaŋna hiŋ swakanɛ AGWANGWAMAA? Oo ahiɛba atwa Isrɛl, iwembe kwuŋ po ɛhi hiɛŋ, I te shi bu ta a tu dumanganɛ shɛ ụshɛrɛya u tishiririi?

²⁸Hi te mepi shi suu? Hi ta hwụjɛ shɛ maa? AGWANGWAMA ubwa shɛ Agwatana unyizo-nom; ubwa karɛ unyizo hwɛɛ. Bu lukwumi shi, bu lweji shi kaa, za bụtụ kaa eri ba ta ti'eshicigo tu bwa ugbe.

²⁹Ubwa ba pana atwa na lweji ta atwa na lukwumi ukpahiŋ.

³⁰Okwo esemberi o lwogo; atwa na ta waŋnɛ kaa o lukwumo.

³¹Ama atwa na patanɛ AGWANGWAMA rishe maa mbiyono aŋ, zhɛ na 'yaganana ukpahiŋ ufwo. Ɛ zhɛ ɛ ishijɛ na apiambɛ aba gana egbeji; ɛ zhɛ no gozhigo, a zha shɛ o lukwumo; ɛ zhɛ na zha tahaŋnụ, a zha shɛ kaa o lwogo.