Read bassa AYIZAYA 46 Bible Online

AYIZAYA 46 - bassa bible

AYIZAYA 46

¹Atwa a zhɛba la tuwa ti Beal keeni Nɛbo[151] ama hwuwayɛ go nzhinyacɛ ma 'waŋnɛ tu ya, tɛ shɛ ya i'wɛŋnɛ nɛ iri iyimabiga.

²E shikeni ee kwuzhi hwɛɛ aba, tuwa ta ata ti eri shi tu momo bicingo; a 'imɛ tụ ee suji tu ee hwuri. Ukwunanga tuwa tu Babulon ta!

³Ahiɛba ajalalo Jekob, shɛlaga ma, ta ahiɛba atwa mi Isrɛl na ta vwɛ hwɛɛ. Gamba ma hi ima u'ala te kwuni na aka na ee hi meci.

⁴Okwo ta ahiɛ inganjɛ ahiɛ 'yajɛ tuhwaŋla, Gamba n ta hi untangana ma hi ima u'ala; Gamba n hi karɛ, N zhɛ du kaa ma hi ima u'ala. N zhɛ me hi mbiyono maa Me hi bicingo.

⁵AGWANGWAMA hiɛŋ, Na aba kwuuŋ ɛhi zhɛ hi ma m mangaa? I ta 'yajɛ waa bụtụ ta namba eri ba manga ne mi hŋ?

⁶Atwa a kapashanga alapa aba oo zuzwogo azhɛnarɛya, aa manga uzhinono azụrụfa. A nda bụlụma ba azhɛnarɛya ụgwụ maa ndana aŋ tuwa; nazhɛ oo kwuzono tu a na zhɛba tụ:

⁷A 'waŋna tụ no shitutu sha aba; ofwo elele na ee shiri tu apata taa nama, ti eri shi ta kaana ya izhɛ o. Okwo bụtụ njɛ adua no ofwo tuba ti eri shi to bicingo aŋ na mazhanga me elele o.

⁸Ahiɛba ebweji-undwa[152] ne teyinje ma ijɛ maa hi shiyeni iŋ na shihaŋsa shi hiŋ, na haŋsa ma iwɛ iyi nɛ Ngaa nduwa.

⁹Ne teyinje ma iyi nɛ teni la cala cala; mapa ma maa Gamba Ngooko kiri n shɛ Agwatana, i zasa anya namba o, Gamba n shɛ Agwatana, i zasa bụtụ shɛ gana mi o.

¹⁰Taa nu umozhigo Ngaa jɛmɛ iyi nɛ yɛɛ zhɛ ya sha; N dumwa cala cala iyi nɛ zhɛ ye teni. N jɛmɛ maa iyi nɛ Ngaa imanganjɛ zha shɛ yo ngwulo kwukwuŋ, iyi elele nɛ dee Ngee heŋshi maa N zhɛ ma nda, ibɛ Ngɛɛ zhɛ ma nda.

¹¹Ma suyana bụtụ na zhɛ ba banɛ nu uwaŋna-banụ[153] bi zhɛ be sure gana ucepi, bi zhɛ ba banɛ na cɛnjɛ tu na tụ dụlụmɛ maa ụrɛcɛnga iyi nɛ Ngaa imanganjɛ. Iyi nɛ Ngaa jɛmɛ, ibɛ zhɛ ya nda. N dumwa, i zhɛ kaa ya nda gom.

¹²Hwulaga ma, ahiɛba atwa ga hwụjɛ shɛ iwɛ, ahiɛba na hiɛ dụlụmɛ ne tiririri.

¹³N zhɛ mɛ mbɛ tiririri maa tu gwumwongonu, tụ dụlụmɛ shɛ kwukwuŋ. Ubino mu zha shɛ wɛ njɛ ti'insu o. N zhɛ mo bicingo Zayon; iwɛ Isrɛl na shɛ ụjɛrụma mu.[154]