Read bassa AYIZAYA 53 Bible Online

AYIZAYA 53 - bassa bible

AYIZAYA 53

¹Nazhɛ atwa ata jishijɛ, ɛɛ hiɛŋ, Gaaba tɛtanɛ iwɛ nɛ atɛ jɛmɛ rishee? Gaaba eri ba kwụba u'ala wa AGWANGWAMA ni ijɛɛ?

²Ukwulana wa AGWANGWAMA yaa shɛ maa gɛ yɛu ibwɛ ugondu waŋnɛ gana ụ'wụ'wụ umere na wa ta tini na cɛnjɛ tu hwoo. Bu zasa ụjɛrụma kwo kaa ụzhɛ elele iwɛ maa ta 'wa iwɛ ubwa o. I zasa kaa iyi elele nɛ baa 'yajɛ nɛ ya dwa bụtụ eshe o, i zasa iyi elele nɛ baa 'yajɛ nɛ eri ma ti insa o.

³Atwamwa ngbaracɛ bụ cwɛŋ, ee jineci bu[175] bɛ 'imɛ-isɛbwɛ ụbaụta keeni ụngwụ-tụhwụga. I zasa bụtụ mbiyanɛ bu okwo timbiyana o; tu kwụnanɛ bụ rishe, bụ tụ tatụlanụ sụ o.

⁴Ama bɛ njɛ ụbaụta na atɛ ga shɛ ta nda, baa hwụjɛ-ụngwụ na atɛ ga shɛ ta hwuga. Ama ti heŋshi maa Agwatana ubwa peni bu ulwapɛ keeni ụbaụta ata baa nda.

⁵Ama tuba iwɛ undwa na etu bweji aa gwụcanjɛ bụ, e rukwuteji bu iwɛ iyi iwɛ nɛ atɛ njɛ. Ti 'yajɛ amɛ-olom tedure nu ulwapɛ na ee peni bu, na tugwucanga tu na aa gwụcanjɛ bụ, ibɛ po atɛ zhɛmananɛ.

⁶Hwɛɛ tu tɛ shɛ gana agwụdụ na 'inɛ, bụtụ bụtụ vwụrɛ boo to uhwaŋna ubwa. Ama AGWANGWAMA peteni bu tijama tu tu kpaaŋ.

⁷A njɛ bu umungwuta, ee peni bu ụbaụta; ama bu dumanɛ shɛ iwɛ o. E zeriji bu gana yɛu-ụgwụdụ[176] nɛ ɛɛ zhɛ a shɛla, gana ụgwụdụ na ɛɛ zhɛ a hwaga tihiŋzhe tu bwa, ama bu dumanɛ shɛ iwɛ elele o.

⁸A njɛ bụ umungwuta, ee peni bu n-ndumwa-tụwụma, maa bɛ shɛ bo 'wo[177] ibɛ po ee zeriji bu ga maa a kwụnɛ bụ, i zasa uwaŋnɛ ubwa elele na iwɛ iyi nɛ jiteni bu gwụmanɛ gana na te e becinji bu na cɛnjɛ ta atwa na a ya uraiŋ o. E pegeni bu iyi iwɛ undwa na atwa mi bweji.

⁹Okwo tu baa zasa abwagara elele, baa zasa kaa okwo tuhalakaka te elele nu unu ubwa. O togwu kaa waa tu'wo tu bwa no ogworozwo[178] ee ni bu kaa nu u'uye waa azhɛgba.

¹⁰Okwo ti yaa shɛ gana ata; i shɛ ukwulana wa AGWANGWAMA maa e kwuci bu, maa e peni bu amɛ-tụhaŋtụ; tu'wo tu bwa tɛ shɛ ụrụpɛ iwɛ iwɛwɛ.[179] Ibɛ po bɛɛ zhɛ ba kwụba ajalalo ubwa; bi zhɛ ba ya urugbo te ilegeji, tedure ni i'ɛlɛ ibwɛ kaa ukwulana wa AGWANGWAMA zhɛ wa 'yaga eshe.

¹¹Na aba na tu baa yɛ uraiŋ ụbaụta, nazhɛ bɛɛ zhɛ ba kwụba titeni tụ ụbaụta ata ohwulu ubwa njɛ[180] amɛ ubwa kaa zhɛ o lomo. Tedure ni iyi ibwɛ tumapa ibɛ po yɛu mi ugondu i tiririri zhɛ ya pana atwa ofwugwo n-ndumwa-zhɛ; ubwa kaa zhɛ ba 'waŋna ulwapɛ wa aba.

¹²Iwɛbɛ po Ngɛɛ zhɛ Mo dwotwogonu urobwo ubwa, na ashashɛ atwa a'wụtụ[181] Bi zhɛ bo dwotwogonu kaa ufwa ujasa na atwa ikɛnyi, iwɛnɛ ti bee duduji ohwulu ubwa no tu'wo, aa rɛcɛ bụ kaa na atwa na bweji undwa. Okwo ti yaa shɛ gana ata ubwa kaa 'waŋnɛ iwɛwɛ ya atwa ofwugwo, ibɛ po baa nda kaa a'walụ[182] iwɛ ebweji undwa.