Read bassa AYIZAYA 54 Bible Online

AYIZAYA 54 - bassa bible

AYIZAYA 54

¹ AGWANGWAMA hiɛŋ, Oo gabụ Jɛrusalɛm, na shɛ la gana bu'ulo na meci shi yɛu; ama hwuwayɛ go zunga ya azunga, kala ya n'ungwa mu unyasa, gabụ na bɛ njɛ shɛ la tulumongwu tu tumata. Hwuwayɛ go miaụŋ me biyikwo na ee henicingeni rishe mi gembi ufwugwo mee hwuri biyikwo na bwolo bwa ta untanganɛ!

²Kaana umwono ata abu namɛ uholo; kaana ihwehwe ibwɛ unjɛswa maa keeni n-ngbalụ mu bwa ikɛnyi tuta.

³Gabụ bi zhɛ ba kaana tugwungwu tụ bụ tuhoricingo zalụ bu u'ala ubiye keeni u'ala ugwulwo; atwa bụ zhɛ a lashɛganana cɛnjɛ ta ata edenji gɛgajɛ. Atwa zhɛ o shino na ashɛpwụ a'wụtụ a'wụtụ a na ga shɛ la shisombo.

⁴Ta nda inyɛsɛ o, a zha shɛ ma bu nda ya ụpụrụsa o; ezuye kaa zha shɛ ma bu sha ya o. Uzawa tɛcara tụ bụ aka na abu ta waŋnɛ la gana yɛu towo, zhɛ mo bu 'wo isɛbwɛ, keeni tunama tu na abu namɛ la gobuko gana bululo.

⁵Bụtụ na ụbụ karɛ ubwa zhɛ ba sha bwolo bu, ɛ hiɛŋ izeci ibwɛ, AGWANGWAMA na Hwuri Kpaaŋ. Bụtụ ata bi Tijilo bi Isrɛl ubwa me bu gwube; ɛ hiɛŋ bụ, Agwatana na untanganɛ unyizo hwɛ hwɛɛ.

⁶E-Isrɛl, bɛ shɛ gana biyikwo na ta waŋnɛ, na ba nda tiriri tebiye na ahaŋsa ubwa iwɛnɛ to bwolo keri bu. Ama AGWANGWAMA ubu suyanɛ maa gwure pu bwa, bɛɛ hiɛŋ:

⁷M bu genji la na aka ticicimwɛiŋ kwakwa; ama N zhɛ me bu gwuricinje ni iwɛ tumapa nɛ gembi tebiye.

⁸AGWANGWAMA na ubu gwube hiɛŋ, N njɛ la isɛbwɛ, Ngee bi genji na aka ticicimwɛiŋ fwalaa, ama N zhɛ ma bu mapana ya iwɛ tedure no tulubo tu unyizo-nom.

⁹Inɛ gɛ i n shanɛ gana aka ala Noa, N shiri la unu na aka Noa maa meni mu Noa mu zha shɛ mo sugo ya unyizo kwukwuŋ. Hwuwayɛ go N shiri du unu maa N zha shɛ ma nda ya isɛbwɛ na bụ o; N zha shɛ kaa ma bụ tazhɛganɛ ya o.

¹⁰Okwo nshama mo zhingotu, tikpekwu to hwuŋzwotongwu, ama tulubo ti mi ti tikpeke tu na Ngee bu lubi ti zha shɛ to zhingotu kwukwuŋ. Unu mu wa amɛ-olom tutwa kaa zha shɛ wo hwuŋzwo kwukwuŋ. Gana AGWANGWAMA na ubu mepeni iwɛ hiɛŋ ta.

¹¹AGWANGWAMA hiɛŋ, Oo Jɛrusalɛm, gabụ bụtụ bu ụbaụta na uvwugo wa 'waŋnanga na azuba, ụshɛpwụ na zasa bụtụ maa ma bu ingatanga. N zhɛ mo shilonono ukoshilo bu na atayɛ usafaya, Ngɛɛ zhɛ ma ma ụdatụ bụ na atayɛ itezere.

¹²N zhɛ ma ma ikerikeje bu na atayɛ rubi, shidubo shɛ bụ shɛ ba Ngɛɛ zhɛ ma ma na atayɛ kabunkɛl, Ma ma uba na zhɛ mo bu rungwutwonu hwɛɛ na atayɛ ogwumishi.

¹³Gamba ni ikɛnyi mi N zhɛ mo mbisogono miaụŋ mụ bụ me eyi kpaaŋ iyi, N zhɛ ma nda maa ge iyi zhɛmanɛ aŋ duwa maa a 'yaga amɛ-olom.

¹⁴Tishiriri tuba ti zhɛ to bu shikicingo dimi. Bi zhɛ ba banangana tusukakana taa dụlụ, bi zha shɛ ba nda inyɛsɛ o, iyi tuholono kaa zha shɛ yo gwumwonu na bụ o.

¹⁵Yaa shɛ bụtụ be elele ụbụ sukakanɛ asha i'ɛlɛ mi zasaba o. Bụtụ be elele na kaa ụbụ sukakanɛ ubwa zhɛ ba layanana.

¹⁶Hioko, Gamba n karɛ bụlụma na ba shana ulwa, na ba nda i'wɛŋnɛ ujasa. Gamba du n karɛ bijeshi ata ba 'waŋna i'wɛŋnɛ ɛtɛ maa kwụna atwa.

¹⁷Ama i zasa i'wɛŋnɛ ujasa ye elele nɛ aa njɛ iwɛ bụ nɛ zhɛ ma bụ gwụcɛnga o, gabụ kaa bi zhɛ ba 'yaga ajɛshɛgwa maa peni bụtụ be elele na ụbụ shanɛ iwɛ. N zhɛ kaa ma lashaga miaụŋ mi mi mu ugondu maa ma pana aŋ tụlasụ. AGWANGWAMA ubwa dumwa.