Read bassa AYIZAYA 55 Bible Online

AYIZAYA 55 - bassa bible

AYIZAYA 55

¹AGWANGWAMA hiɛŋ, Bụtụ be elele na i'uyɛ iri ga zhajɛ no ofwo meni! Bụtụ na kaa zasa ukwuribi, ga zhajɛ maa tala iyi nɛ maa ya! Zhajɛ ma maa hi teri meni mụ tụ'walụ ta afwafwa keeni mosubo uzawa ukwuribi keeni uzawa ulumo.

²Imbe kwuŋ po ahia nda ukwuribi hiŋ ufwu iwɛ iyi nɛ shɛ shɛ iyimɛyɛɛ? Iwembe kwuŋ po ahia nda ugondu iwɛ iyi nɛ shiji shi bụtụụ? Shɛlaga ma iwe mi tebiye maa kaa hiɛ njɛ unyasa no tinyomongo.

³Ahiɛba atwa mi, shɛlaga ma iwe mi hwuwayɛ go; zhajɛ ma no ofwo mi nazhɛ ɛhi zhɛ hia ya uraiŋ! N zhɛ ma twa-unu unyizo-nom ne hiŋ maa ma hi pana uwebiye ata Ngee shileni la Devid unu.

⁴Hioko, Gamba n njɛ bụ useyida wa atwamwa, maa ba sha bi'yagajɛ keeni bi peni ba atwamwa unu.

⁵Hwuwayɛ go gabụ bi zhɛ ba suyana edenji na ebi te mepi shi; anaa na ubu mepi shi la na aka oko. Hwuwayɛ go edenji ata te bi mepi la, ɛ zhɛ e gezhije pụ bụ maa o togwu na bụ, iwɛ AGWANGWAMA na shɛ Agwatana bụ, na shɛ Bụtụ ata bi Tijilo bi Isrɛl. N zhɛ ma bu pana ụjɛrụma, Mo bu gombicingo du.

⁶Zhaga no ofwo AGWANGWAMA gana na ebi eri ba ta bụ ugbe, suyana bụ gana na tu boo to gwumwonu.

⁷Go ugworozwo genji tugworozwo tu bwa, ga bụtụ na zasa ririri genji tuhaŋsa tu bwa tụ wɛ, Ge gwure no ofwo AGWANGWAMA na shɛ Agwatana tu; bo hioko inyɛmɛnyɛmɛ, baa gangana kaa bụtụ iwɛ kakayɛ.

⁸AGWANGWAMA hiɛŋ, Tuhaŋsa ti mi tɛ shɛ shɛ gana me ti hiŋ o, ihwɛŋnɛ mi kaa namɛ swooŋ ni inee hiŋ.

⁹Gana na ta azuba dụlụmɛ na cɛnjɛ, gobwonu du tuhaŋsa ti mi tụ dụlụmɛ ne me ti hiŋ.

¹⁰Gana na eshilo keeni tulomu ta ata ti ticwii ta banɛ na azuba, tee gwuri shi gadaga, ama ti zhɛ to lomicingo cɛnjɛ. Ma nda maa gɛ iyimɛyɛ waŋnɛ maa i meci izɛgwu iwɛ tibila keeni iwɛ iyimɛyɛ tiya.

¹¹Gobwonu du n-ndumwa mu na Ngaa jɛmɛ mi zhɛ ma sha, mi zha shɛ me gwure pi mi gadaga o, semi mi zhɛ ma nda iyi elele nɛ Ngɛɛ hiɛŋ mụ ga mɛ njɛ. Iyi elele nɛ kaa Ngaa tumwanɛ mụ, i zhɛ ya 'yagana mụ eshe.

¹²Hi zhɛ hia banɛ nu Babulon nu unyasa, ɛ zhɛ mɛ hi bɛcinjɛ nụ ụshɛpwụ ata na amɛ-olom. Nshama keeni tikpekwu mi zhɛ ma kala azunga, i'wɛ'wɛ ye elele nɛ namɛ ne ehilo zhɛ yo puso i'ɛlɛ ya aba.

¹³Orokwo zhɛ o shikokono no ofwo na ishɛkpɛcɛ shikekeni hwuwayɛ go; atụla-ishɛmɛ zhɛ ɛ unshɛ no ofwo na tuka ti ge shikekeni. Useyida ga zhɛ wa nama unyizo-nom! Iyi nɛ zhɛ ne teyingeni atwa iyi nɛ AGWANGWAMA njɛ ta.