Read bassa AYIZAYA 56 Bible Online

AYIZAYA 56 - bassa bible

AYIZAYA 56

¹AGWANGWAMA hiɛŋ atwa ubwa, Na untangana ma undwa ụshɛrɛya u tishiriri keeni tiririri, iwɛnɛ po i dụlụmɛ shɛ ya ti Ngɛɛ zhɛ mo hi bicingo maa Ma hiɛ lashɛga hwuwayɛ hwuwayɛ o.

²N zhɛ ma pana atwa na untanganɛ undwa Ụjita-ụhinjanụ, a na bweji shi uŋ uwebiye. N zhɛ ma pana du atwa na njɛ shɛ iyi iwɛ elele uwebiye.

³Kede bugaiŋ na togwu na atwa AGWANGWAMA hiɛŋ, AGWANGWAMA zha shɛ mo n lonono maa Ma zhɛba bụ na atwa ubwa o. Kede kaa bụtụ na shɛ ivwɛlɛ heŋshi du maa bi eri shi ba sha bụtụ bu ko na atwa Agwatana, iwɛnɛ ti bee eri shi ba mata miaụŋ o.

⁴AGWANGWAMA hiɛŋ, Yaa shɛ nvwala ma untangana Ụjita-ụhinjanụ, aa nda kaa iyi nɛ mo n lomicingo amɛ, aa untanganɛ kaa unu mu tutwa na tɛcara,

⁵asha ɛ zhɛ ne teyinje aŋ tu nzeci ma aba nu umwono mu na namɛ na amɛ uba, inɛ ɛtɛ zhɛmɛ yee hwuri miaụŋ-me-eyi na mu na mo o tumata. N zhɛ ma pa aŋ izeci nɛ zha shɛ yo 'wogo kwukwuŋ unyizo-nom.

⁶AGWANGWAMA hiɛŋ agaiŋ na togwu na atwa ubwa, a na o lubo bu, a na kaa a ndana bu iyi, a na untanganɛ Ụjita-ụhinjanụ keeni unu ubwa tutwa:

⁷N zhɛ me hi suje nu Zayon, ni ishɛmɛ mi tijilo, maa ma hi pana unyasa nu umwono mu wa adua. N zhɛ ma lashɛga arụpɛ tuhwoŋzhingo keeni arụpɛ vwɛ nu utukwu-ụrụpɛ mu. Ɛ zhɛ ɛ hiɛŋ umwono mu maa umwono wa adua iwɛ edenji elele.

⁸AGWANGWAMA Mokondo na jicinje atwa ubwa Isrɛl na ti'ima, shiri-unu, bɛɛ hiɛŋ, N tɛ zhɛ be suje atwa anya a na namɛ swooŋ na atwa ata oo sugwo la maa Ma kaana aŋ.

⁹AGWANGWAMA hiɛŋ, Ahiɛba isundɛ ye ehilo, zhajɛ ma hwɛɛ hiŋ, zhajɛ ma hiɛ yɛ iyimɛyɛ, ahiɛba isundɛ nɛ zweni nu uwapa hwɛɛ.

¹⁰Bɛɛ hiɛŋ, A'yagajɛ na ga shɛ a tɛtagana atwa mi unu, lubegeni hwɛɛ aba! I zasa iyi elele ee mepi o. A shɛ gana shiwawa shɛ na shi ngwushi shi, ama e weteji, oo wotogono awalabụ. Gana na ee lubi malabụ hwuleji!

¹¹A shɛ gana shiwawa shɛ na shi 'yajɛ ikpɛri, i'wɛtwɛ, a na iyimɛyɛ twa sụ kwukwuŋ. A'yagajɛ ata eshiciji shi iyi elele o. Bụtụ bụtụ ba aba ba nda iyi nɛ kwụlanɛ bụ, bụtụ bụtụ ba jalakaka iyi ibwɛ ikɛnyi ibwɛ kiri.

¹²Eswe ga mayaga hiɛŋ, Mizha ti rinje ma[183] mayaga, maa tu swe ma mu na me elele na atụ kwụbɛ! Beyi ga zhɛ o dobogo uhwuri hwayɛ ga.