Read bassa AYIZAYA 57 Bible Online

AYIZAYA 57 - bassa bible

AYIZAYA 57

¹Yaa shɛ bụtụ bi tiririri 'wi, i zasa bụtụ yaa ta, maa ba haŋsa iyi elele o. Ama aka na ee suji atwa ata na meme tileneni Agwatana, i zasa bụtụ be elele eshiciji maa atwa ga tiririri ee suji bana i zasa abara ne ebe elele te eri o tumongono aŋ ya o.

²Atwa na a zha tahaŋnụ ti tiririri, a 'yajɛ amɛ-olom, oo to ụhinjanụ te e 'wi, ee weci no ogodo ata aba tu'wo saiiŋ.

³Zhajɛ ma epe ahiɛba miaụŋ ma anjɛ-tishino, na ajalalo anjɛ-tuwɛle keeni atwa na meme sengeni tu, maa a jɛmɛ ụshɛrɛya hiŋ,

⁴Gaaba kwuŋ ahia nda asadaa? Gaaba kwuŋ ohio sumono, ɛhiɛ bwɛjɛ bụratụụ? Shɛ miaụŋ ma atwa tigezhe suu ahiɛ shɛ? Shɛ umamata we ejwe-ụzagwụ suu ahiɛ shɛ?

⁵Hia zhɛba tuwa tu ufwasa, ne buweci na ohio woto ne eyikwo nu ucilo i'wɛ'wɛ ye ekpekpeshi keeni ụ'wụ'wụ u turumo rumo elele. Ahia ta ụrụpɛ na miaụŋ mi hiŋ na apangwụ atayɛ a na namɛ no olomu.

⁶Hi suje atayɛ tigbele gbele no olomu, apata ahiɛ njɛ aŋ azhɛba na maa hi na zhɛba. Hia pana aŋ arụpɛ tuswa keeni arụpɛ tiya. Hi heŋshi ree maa amɛ mi lemi ni ijɛ ɛtɛ?

⁷Hio mungo nshama mu na mi zeteji maa hi cɛ ụrụpɛ maa hiɛ njɛ du tuwɛle.

⁸Hia swataga tuwa ta ata ti hiŋ tu tusashɛ gunu na ehi teni no shidubo shi hiŋ. Hi n lacɛ; ohio tufworongo tugwuno ti hiŋ[184] ohio mungo no shigodo shi hiŋ, ohio woto na awɛle hiŋ a na ahia tụpa utashɛ te ehi weci na aba. Apata ohio hiŋcingo ukwodeyi hiŋ na ihi 'wa.

⁹Hia sụkwụtwagwụ manɛbɛ mi hiŋ, uhwuri gana na ahi ga sukwutwa, ahia zhagana tuwa ta ata ɛɛ hiɛŋ Molɛk[185] maa hi na zhɛba tụ. Hia tumwana atumwa hiŋ ta dụlụmɛ tutu nhwa-me-e'uye maa e hi ringenje tuwa tu na maa hi na zhɛba.

¹⁰Hi momo lukwucingo nu urungo tuwa, ama hi te shi kaa ụhinjanụ. Hi heŋshi maa tuwa ta ata ti hiŋ tu tusashɛ tu ma hi pana ikɛnyi ifwo, iwɛbɛ po ehi lukwumi shi.

¹¹AGWANGWAMA hiɛŋ, Imbe kwuŋ tuwa ta ata tɛ shɛ upo ahia nda inyɛsɛ tuba, ahi ma dwatwagana ụzagwụ, isɛbwɛ mi du ihi 'wi hwɛ hwɛɛɛ? Shɛ iwɛnɛ suu Ngaa namɛ saiiŋ cebe upo ahi n sụmɛ shɛ inyɛsɛ?

¹²N zhɛ mɛ vwɛ tiririri ta ata ti hiŋ uvwi keeni iyi nɛ ahia nda. Tuwa ta ata ti hiŋ kaa ti eri shi to hi mbiyono.

¹³Aka na ahiɛ uganɛ maa e hi mbiyeni, ga tuwa ta ata ti hiŋ ehi sutengeni, ti hi bicinji! Uvwugo zhɛ wo sugo tu wa 'waŋ! Ama bụtụ na m patanɛ-rishe, ubwa zhɛ ba 'yaga cɛnjɛ tu ga, ubwa kaa du zhɛ ba ya ogwu ishɛmɛ ɛtɛ mi i tijilo.

¹⁴AGWANGWAMA hiɛŋ, Ga atwa mi gwure no ofwo mi. Mushongo ma iyi udukwutwa elele nu uhwaŋna wa aba! Hanga ma ihwɛŋnɛ, hi nanganganɛ iŋ!

¹⁵Gamba n shɛ Bụtụ ata bi Tijilo na Hwuri Kpaaŋ na namɛ unyizo-nom. N namɛ no ofwo na zeci a na jirimi du kaa, N namɛ du na atwa na meme zucinje a na jɛshɛrɛjɛ, iwɛ maa Ma ala hiɛcɛngananɛ shihaŋsa sha aba keeni ashɛlatụ aba.

¹⁶Gamba m peni atwa mi uraiŋ[186] iwɛbɛ po Ngaa zha shɛ mu na suyana aŋ ya ukara, okwo isɛbwɛ N zha shɛ ma 'yaga ya na aba unyizo-nom o, iwɛ aka na ugiriri zhɛ wa kala atwa ebe Ngee peni uraiŋ[187]

¹⁷N 'yajɛ isɛbwɛ na aba[188] iwɛ iwɛwɛ ya aba[189] keeni uzezeri wa aba, iwɛbɛ po Ngee peni aŋ ulwapɛ nazhɛ Ngee jineci aŋ. Ama a shɛshɛpana oo to tuhwulo ni iyi nɛ kwụlanɛ aŋ tɛnda.

¹⁸N kwụbɛ iyi nɛ aa njɛ, ama N zhɛ ma nɛnga aŋ. N zhɛ mo hwulono aŋ umbe maa Mo mbiyono aŋ, N zhɛ ma ingatanga atwa na a ta-ụkwụla.

¹⁹AGWANGWAMA hiɛŋ, Gamba m peni atwa elele amɛ-olom, ta atwa na gwumwongonu hwɛɛ, ta atwa na dụlụmanjɛ! N zhɛ ma nɛnga atwa mi.

²⁰Ama ogworozwo shɛ gana adanga itekwu, anaa na mpiala ma 'wananga, a na te te shi ụhinjanụ kwukwuŋ, meni mi ibɛ me suje ta aswala tu udwodwo.

²¹Agwatana mi hiɛŋ, ogworozwo zasa amɛ-olom o.