Read bassa AYIZAYA 59 Bible Online

AYIZAYA 59 - bassa bible

AYIZAYA 59

¹Ta haŋsa ma maa AGWANGWAMA zasa ikɛnyi nɛ waŋnɛ maa mo hi bicingo, ta haŋsa ma du kaa maa bụ kwụrụmɛ bee eri shi ba hwuga n'ungwa mu na ahia kala bụ maa mo hi mbiyono!

²Ama iyi iwɛ hiŋ ibɛ ihi bogwu na Agwatana hiŋ, iwɛwɛ hiŋ kaa ibɛ peshinji ụpɛshɛka ubwa no olugwo hiŋ upo baa hwụjɛ shɛ aka na ahia zhɛba bụ.

³Iwɛnɛ po mehieŋ mi heshigeni i'ɛlɛ hiŋ, n-ndumwa mɛ hiɛ wụmɛ, ihwumbwe hiŋ ya kaba-ụzagwụ, irɛtu hiŋ ya dumanga n-ndumwa hinihini.

⁴Hia suyana atwa ụshɛrɛya, shɛ nu uhwaŋna tishiriri o. Ụzagwụ tudwa ubwa ahia ta aba maa n-ndumwa mɛ hiɛ zhɛmɛ. Hia bila uwuru, ahia kwunanga ni iwɛ tusashɛ.

⁵Ɛ bujɛ ba anjɛ ugbezhi, aa hiŋsa ba tudodokwuno ti igɛzu. Bụtụ be elele na kaa yɛ anjɛ ata, bi zhɛ bo 'wo, aka na kaa rɛnjɛ ra ata ru ko ru bwadụ, ri zhɛ rɛ bujɛ ugbezhi!

⁶Ama tudodokwuno ta ata aa hiɛŋshɛ ti eri shi ta sha iyi tu'urugono, atwa kaa eri shi momo urugono ugondu ata wa aba o. Ugondu wa aba ụ shɛ iyi iwɛ, iyi nɛ aa nda ni i'ɛlɛ ya aba i shɛ abwagara.

⁷E 'yebi usumwa ni ivwunɛ ya aba maa a njɛ iyi iwɛ; ee 'yebi izɛlɛgwu maa e dudweji mehieŋ ma atwa na zasa n-ndumwa-tụwụma. Tuhaŋsa ta aba tɛ shɛ tuhaŋsa ti iyi iwɛ, iyi tuhwuŋzotongo nu ufwu tɛnda ibɛ shɛ ugondu wa aba aka elele.

⁸E mepi shi uhwaŋna wa amɛ-olom, a jɛmɛ shɛ kaa ụshɛrɛya u tishiriri no ofwo elele na aa namɛ o. Ihwɛŋnɛ ya aba ontongonu, i zasa kaa bụtụ zhɛ ba ta ihwɛŋnɛ ɛtɛ i zhɛ be gwure na amɛ-olom o.

⁹Iwɛbɛ po atɛ jɛmɛ shɛ ụshɛrɛya u tishiriri kwukwuŋ, tiririri kaa ti ti ci shi o. Ta jalakaka uhioko-uhwaŋna, ama tishi kiri tu namɛ no ofwo elele. Ata dwalakaka uhioko-uhwaŋna u turaawụụ, ama ta zha kaa tahaŋnụ no ofwo tizhuuŋ.

¹⁰Ta papalanga i'ɛlɛ tu nụ ụdatụ gana sholubo. Ata twatwagwụ adukwutwa nu uwaŋna gana aka na ti iyi kwuni turumono berebere, tu namɛ na ashashɛ atwa na 'yajɛ ikɛnyi, atɛ shɛ kaa gana atwa na 'wi[192]

¹¹Inyɛsɛ tɛ shɛ, oto ngwulo gana ecwee, ata ugaga gu n'ungwa gana nkworukwo, ata jalakaka ụshɛrɛya u tishiriri, u zasaba kaa okwo uko, ata jalakaka ubino, ama kaa ụ dụlụmɛ no tu.

¹²AGWANGWAMA, undwa tu tubwada uhwuri ufwugwo no ofwo bu. Iwɛwɛ tu kaa ma tu la tiseyida tụ wɛ, tu'wanganga tu tu kaa tu namɛ pu tu, eti mepi kaa iyi iwɛ tu kpaaŋ.

¹³Tu bu teni tigezhe, eti bi jineci, atɛ lacɛ maa ta bu 'wa. Ta nda atwa vwɛ umungwuta, atɛ ishɛjɛ eti bi genji. Tuhaŋsa tu tu tu 'wanjɛ, n-ndumwa mu tu mɛ shɛ ụzagwụ.

¹⁴E unzhi ụshɛrɛya u tishiriri, tiririri kaa tu gwumwongonu su ya o. Iwɛ-tɛkana kaa kwu nu ukpekiti, tɛcara kaa tu zasa ya ohwolu apata o.

¹⁵Iwɛnɛ ta tɛcara tu twa sụ, iwɛbɛ po okwo bụtụ na hiɛŋ bu zha shɛ ba nda iyi iwɛ o, ba sha ya bụtụ na bweji undwa. AGWANGWAMA kwụbɛ ijɛ, ibɛ po amɛ ubwa hashɛganụ iwɛnɛ tụ ụshɛrɛya u tishiriri zasaba ya.

¹⁶I dama bụ iwɛnɛ tu baa kwụbɛ shɛ bụtụ na eri bo mbiyono atwa na aa nda umungwuta. Iwɛbɛ po bɛɛ zhɛ ba lashaga atwa ubwa nu ukpahiŋ ubwa maa a lasụ.

¹⁷Bu urigeni tiririri gana ụshɛmbɛrɛ wa agba, boo hwuŋtono tụlasụ nu uhiuhiu ubwa gana ukata ụshɛmbɛrɛ. Bee urigeni itɛpwɛ tɛnda gana utogwo, bee meme kwungwuri na tɛzhɛgɛdana gana idɛsici.

¹⁸Bi zhɛ ba tụpa atwa te teni cɛŋ ni iyi nɛ aa njɛ: bi zhɛ ba tụpa atwa na a sukakana bụ ụbaụta ụ'wụtụ. Bi zhɛ ba pana atwa i'ime ibwɛ ulwapɛ ni isɛbwɛ ibwɛ ti'ishijɛ, bɛɛ zhɛ ba tụpa atwa na namɛ na adakwụ urefu tụlụkpashɛ ti iyi nɛ aa njɛ.

¹⁹Atwa zhɛ na nda inyɛsɛ ibwɛ te kwune nu uwaŋna-banụ tutu uwaŋna-twonuo iwɛ ukpahiŋ na baa 'yajɛ. Bi zhɛ ba zhajɛ gana meni mu na ma zhagajɛ[193] keeni gana uvwugo ụ'wụtụ.

²⁰AGWANGWAMA hiɛŋ atwa ubwa, N zhɛ ma zhajɛ Jɛrusalɛm maa Me hi gwube ahiɛba atwa ihwɛ Jekob a na jɛshɛrɛjɛ genji iwɛwɛ ya aba.

²¹AGWANGWAMA hiɛŋ, N twawa-unu ne hiŋ: N hi peni mpiala mi mi, Ngee hi peni n-ndumwa mi mi, mi zha shɛ kaa ma bana nu unu hiŋ o, okwo no onu miaụŋ mi hiŋ keeni onu ajalụ hiŋ o. AGWANGWAMA hiɛŋ, Gana yɛɛ zhɛ ya sha ta te kwuni na aka ga tutu unyizo-zhe-gwure.