Read bassa AYIZAYA 60 Bible Online

AYIZAYA 60 - bassa bible

AYIZAYA 60

¹Gabụ Jɛrusalɛm[194] ishijɛ maa uhioko-uhwaŋna bu to, iwɛnɛ tu uhioko-hwaŋna bu tuwo, ụjɛrụma wa AGWANGWAMA kaa wa ta nu uhiuhiu bu!

²Hioko, tishi ti zhɛ to ubo cɛnjɛ tu unyizo, tishi tụ 'wụtụ kaa ti zhɛ ta ima anya edenji. Ama uhioko-uhwaŋna wa AGWANGWAMA zhɛ na ta na bụ, ụjɛrụma ubwa kaa zhɛ wa banɛ caakwụ pụ bụ.

³Edenji zhɛ a zhaganɛ uhioko-uhwaŋna bụ. Shɛgwuma shi zhɛ sha zhaganɛ tuta tụ bụ tụ tụraawụụ.

⁴Mbiyangana tutu ubu rungwutwonu maa kwụbɛ iyi nɛ ya ndangana: Atwa bụ ulwa maa e jiye! Miaụŋ mụ bụ me eyi mi zhɛ ma banɛ taa dụlụ; ɛ zhɛ a 'waŋnɛ miaụŋ mụ bụ mo o nụ ụragbamụ gana miaụŋ mi shenje.

⁵Nazhɛ unyasa zhɛ wo shino amɛ bụ ta bụ kwụbɛ ijɛ. Bi zhɛ bu na zhɛgɛda iwɛ amɛ-olom na abɛ 'yajɛ.[195] Gabụ ɛɛ zhɛ e sugeni uduciya we edenji; ɛ zhɛ e suje uŋ taa hileniye itekwu.

⁶Nruhondo mu ufwugwo mi zhɛ ma zhajɛ ma bala na cɛnjɛ tụ bụ, to oywoywo nruhondo zhɛ a banɛ ni Midian keeni Ifa. Ɛ zhɛ a banɛ ni Shiba kpaaŋ, a 'waŋnɛ azhɛnarɛya keeni iturɛre. Atwa zhɛ na duma anabarɛ iwɛ ashɛtwa AGWANGWAMA.

⁷Ɛ zhɛ me bu sugeni agwụdụ na zhɛ a banɛ ni Keda, keeni adagba na zhɛ a banɛ ni Nebaiot. Maa e bi teji ụrụpɛ nu utukwu-ụrụpɛ na zhɛ wa kwulana AGWANGWAMA tulashɛga nu umwono ubwa. Nazhɛ AGWANGWAMA zhɛ a nda maa umwono ubwa 'yaga ụjɛrụma na waa ta zasa la kwukwuŋ.

⁸Atwa cee na kwuŋ a hila wuu gana udomuu, kwo kaa gana nkwucimo mu na mi jiye no tuhwurugwo ta abaa?

⁹Atwa na jɛjɛ na adakwụ urefu kaa zhɛ ma n shɛlana tilɛɛ. Ihɛŋtu meni i tinyakpa nyakpa nɛ banɛ nu Tashish zhɛ ye hwure umbe; i zhɛ ya 'waŋnɛ miaụŋ mụ bụ me eyi taa dụlụ ye jicinje, medenji azụrụfa na azhɛnarɛya aba, maa a mụnɛ izeci ya AGWANGWAMA na shɛ Agwatana bụ, na shɛ Bụtụ ata bi Tijilo bi Isrɛl ụjɛrụma. Ubwa ata na njɛ maa edenji kpaaŋ a bụ mụnɛ ụjɛrụma.

¹⁰AGWANGWAMA hiɛŋ Jɛrusalɛm, Agaiŋ zhɛ a maanana uba bụ, Shɛgwuma sha aba shi zhɛ sha bu ndana ugondu, okwo ti Ngee bi jibi la ni isɛbwɛ mi, ama N zhɛ mo bu lubo, Mo hioko kaa inyɛmɛnyɛmɛ bu.

¹¹Shidubo shɛ bụ shi zhɛ sha kapashangwụ, a zha shɛ a kapanga shụ ya tụ ụjita tu uwaŋna o, iwɛ maa shɛgwuma she edenji shi ne bu sugeni uduciya wa aba maa e suje shɛgwuma sha aba maa shɛ 'wa aŋ.

¹²Ama edenji elele na lacɛ maa a bu ndanɛ ugondu, ɛ zhɛ a kwụna aŋ hwɛɛ. Cɛnjɛ-ta-tugwama ta aba ti zhɛ ta sha osombo.

¹³Ɛ zhɛ ɛ jwɛ i'wɛ'wɛ ibiye nɛ namɛ nu uwapa Lebanon, no oyigo, na agbagbada keeni agwugwa, maa e meeneni ohwolu mi tijilo, maa ụshɛpwụ mu na shɛ ofwo ɛvwɛvwɛjɛ mi tupatangana 'yaga ụjɛrụma.

¹⁴Miaụŋ-me-eyi ma atwa na ma bu nda la umungwuta mi zhɛ ma zhajɛ mo bu kwuzono, ɛ zhɛ ma bu muna ụjɛrụma. Atwa na bu ngbaracɛ la cwɛŋ zhɛ a zhajɛ hwɛɛ aba o kwuzongo nɛ ɛvwɛvwɛjɛ bụ. Ɛ zhɛ mɛ bi hiɛŋ, Ụshɛpwụ ụ'wụtụ wa AGWANGWAMA, Zayon shɛ ụshɛpwụ ụ'wụtụ ụ Bụtụ ata bi Tijilo bi Isrɛl.

¹⁵Okwo te e bi jineci la ee bi imi, yaa zasa kaa bụtụ be elele bo dulo ya pụ bụ, N zhɛ ma nda maa 'yaga igɛhi unyizo-nom. Maa shɛ ofwo unyasa unyizo-nom nu uwaŋnɛ we elele.

¹⁶Edenji na shɛgwuma zhɛ na bu biga, gana na ti yɛu yo subo mosubo ma agba bino bwa. Nazhɛ ɛbi zhɛ ba mapa gom maa Gamba AGWANGWAMA m bu bicinji, ba mapa maa Bụtụ ata Jekob bu ukpahiŋ ubwa ubu gwube.

¹⁷N zhɛ ma bụ pana azhɛnarɛya ụlụkpashɛ we ɛtumburɛ, azụrụfa ụlụkpashɛ we ashɛmbɛrɛ, ɛtumburɛ ụlụkpashɛ i'wɛ'wɛ, Ma bụ pana ashɛmbɛrɛ ụlụkpashɛ wa atayɛ. Ehiu bu zha shɛ na bu nda ya umungwuta o; N zhɛ ma nda maa ehiu a bu untangana ne tiririri keeni amɛ-olom.

¹⁸A zha shɛ a hwuga ya rundu ra abwagara na cɛnjɛ tụ bụ kwukwuŋ. Ufwu tɛnda zha shɛ wo hwuŋzo ya u'una bụ o. Bi zhɛ ba pa uba bụ izeci nɛ ɛɛ hiɛŋ, Ubino; ba pa shidubo shɛ bụ izeci nɛ ɛɛ hiɛŋ, Ashɛtwa.

¹⁹Shɛ uwaŋna zhɛ no bu hiokono ya uhwaŋna nu uwaŋna o. Okwo tụraawụụ tu upiana ti zha shɛ ta sha ya uhioko-uhwaŋna bụ nụ ụjita o[196] Ama Gamba AGWANGWAMA, N zhɛ ma sha uhioko-uhwaŋna bụ unyizo-nom, Gamba Agwatana bụ kaa N zhɛ ma sha ụjɛrụma bụ tutuu.

²⁰Uwaŋna bụ zha shɛ wo tono ya o, upiana bụ kaa zha shɛ wo 'wo ya tishi o. Gamba AGWANGWAMA, N zhɛ ma sha uhioko-uhwaŋna bụ unyizo-nom. Ụjita ụkwụla bụ tuta zhɛ wo hwuwowu ya.

²¹Atwa bụ zhɛ a sha atwa tiririri hwɛɛ aba. Aba zhɛ a 'yaga cɛnjɛ tu ga unyizo-nom. Gamba m bɛrɛ aŋ, maa a shɛ tu'unshɛ tu ugondu na i'ɛlɛ mi njɛ, maa e mbiseni atwa elele ụjɛrụma mu.

²²Okwo bụtụ bu ko kwo kaa umwamwa hiŋ na ga 'nyanɛ uhwuri a na vwɛ hwɛɛ, ɛ zhɛ o gombo gana udenji na 'yajɛ ukpahiŋ ụ'wụtụ. Yaa shɛ aka na teni cɛŋ ci hwuŋ, N zhɛ ma nda maa ijɛ njɛ kakayɛ. Gamba n shɛ AGWANGWAMA!