Read bassa AYIZAYA 64 Bible Online

AYIZAYA 64 - bassa bible

AYIZAYA 64

¹Ɛbi gɛ jwɛ yebe tụla maa zwe. Nshama mi gɛ zhɛ ma bu kwụba mɛ bwɛ na tɛzhɛgɛda iwɛnɛ inyɛsɛ bu shɛ mụ.

²Mi gɛ zhɛ mu na zhɛgɛda gana meni mu na ma gwuzhajɛ nu ulwa na aa shanɛ nɛ tɛngwuzhɛ. Zhajɛ maa mbiseni atwa i'ime bu ukpahiŋ bụ, maa njɛ edenji maa a na zhɛgɛda no ofwo bu!

³Aka na abu zhajɛ la abɛ njɛ iyi tudama nɛ eti ge heŋshi shi la; nshama mụ bụ kwụbɛ inyɛsɛ bụ shɛ mụ maa zhɛgɛjɛ na agba bụ.

⁴I zasa bụtụ be elele kwụbwa kwo kaa hwugwa la iwɛ Agwatana elele na shɛ gana bụ, na ndwanua atwa na a nda ashɛlatụ ubwa iyi nɛ abụ tụ ndanɛ o.

⁵Gabụ ba lashɛga atwa na a nda unyasa ni iyi nɛ teni cɛŋ tɛnda. Aba shɛ atwa na teyinje gana na aba jala aŋ maa a nama. Bi 'yajɛ isɛbwɛ no tu, ama tu to waa tuhwulo ata nda iwɛwɛ; gana na tuba eti eri to binoo?[215]

⁶Ama kpaaŋ tu tɛ shɛ gana iyi nɛ zasa shɛshɛshɛ; tiririri tu tu kpaaŋ tɛ shɛ gana tuzuzu tu ukwara, kpaaŋ tu tɛ shɛ gana ambɛ na a lụmba, iwɛwɛ tu shɛ gana uvwugo na ma tu lubinga.

⁷I zasa bụtụ be elele na ubu suyanɛ na adua ubwa o; i zasa kaa bụtụ zhajɛ no ofwo bu iwɛ maa mbiyeni bu o. Bu meme sweci maa kede ta bu kwụba o, ebi ti jineci[216] iwɛ iwɛwɛ tu.

⁸Ama oo AGWANGWAMA, gabụ bɛ shɛ bishi tu. Atuba tɛ shɛ gana cɛnjɛ-ti'wɛŋnɛ, abɛ shɛ tuba gana bumo-bi-ikwɛshɛ. Gabụ bu tu karɛ.

⁹Oo AGWANGWAMA, ta nda isɛbwɛ te hwuleji no tu o, ta untangana kaa iwɛwɛ tu unyizo-nom o. Atwa bụ atɛ shɛ, hioko inyɛmɛnyɛmɛ tu kaa.

¹⁰Ashɛpwụ bụ tijilo a shɛ gana ụshɛka, okwo Zayon ụ shɛ gana ụshɛka, Jɛrusalɛm ụ shɛ osombo na atwa jineci.

¹¹Umwono ata tu wa Agwatana u tijilo na kaa pilanụ na ogwunukwoshi tu ma bụ shɛtana la hwoŋni. Ofwo na oto lubo la hwɛɛ hwuŋzwotongwu.

¹²Oo AGWANGWAMA, ijɛ hwɛɛ i bu gwumanɛ shɛ ree? I zasa ree iyi nɛ ɛbi zhɛ ba nda, bi zhɛ ree bo lono maa ta nda ụbaụta na utu hwuleji?