Read bassa AYIZAYA 65 Bible Online

AYIZAYA 65 - bassa bible

AYIZAYA 65

¹AGWANGWAMA hiɛŋ, N nga mama 'imɛ maa Mɛ jishijɛ adua atwa mi, ama a njɛ shɛ kaa adua o. Ngaa mama 'imɛ maa M momo mbisono aŋ, ama e mekeni shi kaa okwo tumakana maa e n dwelekeci o. Udenji ga njɛ shɛ adua no ofwo mi, okwo tu Ngaa mama 'imɛ aka elele maa Mɛ jishijɛ aŋ maa, Gamba na, N zhɛ mo hi mbiyono.

²M berishiji i'ɛlɛ mi aka elele maa Ma lashɛga atwa ga tigezhe a na hwụjɛ shɛ iwɛ anaa na a nda iyi elele nɛ teni shi cɛŋ, o to uhwaŋna wa aba aa nda gi inɛɛ nɛ kwụlanɛ aŋ.

³Atwa ga ɛ ishicinjɛ isɛbwɛ mi ne eshe mi aka elele. A ta arụpɛ nu ntuma mu shɛdatụ sha aba, oo hwoŋzhingo iturɛre no otukwu-ụrụpɛ tuwa.

⁴A zha ne e'uye nụ ụjita maa e hweyigeni iwɛ na atwa e'uye. A ya usunda nkomu, aa swa shipa shɛ na aa nɛ nu usunda na oo to arụpɛ na tuwa.

⁵Nazhɛ ɛɛ hiɛŋ atwa vwɛ aba, Kaana ma izhɛ no olugwo tu, to tu tumongono ma o, ti jirimi! N eri shi ma ngbaraka atwa gana ata o, isɛbwɛ mi yo hwoŋno na aba gana ulwa na 'weji shi.

⁶N hoŋswo iwɛ ulwapɛ aba, ulwapɛ aba kaa shɛwa iyi nɛ 'nyotwo i shiri nu umbe mu. N zha shɛ ma gangana aŋ iyi nɛ aa njɛ o, ama N zhɛ ma tupana aŋ ta ulwa,

⁷iwɛwɛ nɛ aa njɛ[217] hwɛɛ ti iwɛwɛ yo ogwunukwoshi aba. O hwoŋzhingo iturɛre na shɛrugbada sha tuwa shɛ na shɛ namɛ nu nshama, ibɛ po aa ma n dumangana n-ndumwa mụ wɛ. Iwɛbɛ po Ngɛɛ zhɛ ma tupana aŋ te teni cɛŋ gana na ti iyi nɛ aa njɛ la namɛ kpaaŋ.

⁸AGWANGWAMA hiɛŋ, I zasa bụtụ be elele ba nda tụ'walụ ta afwafwa ti biye ufwu o; ama meni mụ tụ'walụ ta afwafwa aa nda na tuba. Gana ata du Ngaa zha shɛ ma nda atwa mi ufwu kpaaŋ, N zhɛ mo bicingo atwa na ma n ndana iyi.

⁹N zhɛ ma pana atwa Jekob a na shɛ ụlamụ Juda uwebiye. Ajalalo aba, aba zhɛ a 'yaga cɛnjɛ ti mi tu nshama. Atwa mi a na Ngee teri maa a na ma n ndana iyi, aba zhɛ a nama apata.

¹⁰Atwa mi a na ma n dwalakaka, aba zhɛ o sugo agwụdụ keeni inɛ ya aba maa a na yaga nu udadarɛ na ɛɛ hiɛŋ, Sharon keeni ulomu Eko.

¹¹Ama ahiɛba na hi n lacɛ, hi ngbaracɛ kaa Zayon ishɛmɛ ɛtɛ mi tijilo cwɛŋ, hia zhɛba tuwa ta ata ɛɛ hiɛŋ Gad keeni ma tu ta ɛɛ hiɛŋ Meni, tuwa ta ata ta pana bụtụ uwaŋna-ubiye keeni iyi nɛ ye teneni bụtụ.

¹²Iyi nɛ zhɛ me hi teneni i shɛ, tu'wo tu utokwobi, iwɛnɛ ehi n leni shi aka na Ngaa hiɛ suyanɛ, ahiɛ lacɛ tishɛlaga, aka na ta Ma njɛ ne hiŋ. Hi teri maa hiɛ lacɛ unu mu, ahia nda gi iyi iwɛ nɛ i n kwụlanɛ shɛ.

¹³Iwɛbɛ po Omo hi mbiso maa, Hioko ma, miaụŋ mi mi mu ugondu mu na kaa ma hwuga-unu mu, aba zhɛ a 'yaga iyi nɛ maa a yɛ keeni iyi nɛ maa e swe tebiye, i zhɛ ya balana aŋ cɛiiŋ. Ama imunɛ, ti i'uyɛ zhɛ na hiɛ kwụna. Ɛ zhɛ a 'yaga unyasa, ama ụpụrụsa tuba zhɛ wa sha unee hiŋ.

¹⁴Ɛ zhɛ na zunga azunga iwɛ unyasa na shini na shɛmɛ sha aba, ama hi zhɛ tuba hia 'yaga amɛ-tụhaŋtụ, hi na twa-u'wo, hi na ugagaga iwɛ ụngwụ na ahia hwuga.

¹⁵Izeci hiŋ zhɛ ya sha unu-tukalana no ofwo atwa na Ngee teri, ama Gamba AGWANGWAMA Mokondo, N zhɛ ma hi kwụna. Ama N zhɛ ma pa miaụŋ mi mi mu ugondu izeci ifwo.

¹⁶Bụtụ be elele na ba lụpa maa e peni bu uwebiye na cɛnjɛ ta ata, ɛ zhɛ a pana bu uwebiye ni izeci ya Agwatana tɛkana. Bụtụ be elele na kaa bo shilo-unu, bi zhɛ bo shilo uŋ ni izeci ya Agwatana tɛkana. Iwɛnɛ po ụbaụta ala u cala hwulwo, wee 'wi du kaa atwa isɛbwɛ, waa inangwa kaa du eshe mi.

¹⁷AGWANGWAMA hiɛŋ, N zhɛ ma karɛ azuba ofwo keeni unyizo ufwo. Iyi nɛ nduwa la cala zhɛ yo 'wo atwa isɛbwɛ hwɛɛ. I zha shɛ ye teni ya okwo na ahaŋsa bụtụ o.

¹⁸Na bwada ma unyasa nom iwɛ iyi nɛ Ngaa karɛ. Unyasa zhɛ wa bala nu Jɛrusalɛm ufwo na Ngaa karɛ; shɛmɛ sha atwa ubwa shi zhɛ sho lomo duwa.

¹⁹Unyasa zhɛ wo shino du na amɛ mi iwɛ Jɛrusalɛm keeni iwɛ atwa na namɛ nu bwa. U'wo-tutwa zha shɛ wa nama ya apata o, okwo n'ungwa me tiriri me elele mi zha shɛ ma nama ya apata o.

²⁰Miaụŋ mi shenje mi zha shɛ mu no 'wo ya na tiyɛu o, atwa zhɛ na ya uraiŋ wa aba gboogbo. Atwa na yɛ uraiŋ shiywa dipi-yebi, ɛ zhɛ hiɛŋ aŋ a ta shɛ esemberi mesemese. Bụtụ 'wi tu baa ta namɛ shiywa sha ata dipi-yebi, asha unu Ngee keleni bu.

²¹Atwa zhɛ na ma shimwono, ɛɛ zhɛ a nama na shɛba. Ɛ zhɛ na bila afwafwa, ɛɛ zhɛ na swa meni ma aba.

²²Atwa mi zha shɛ a Ma ya shimwono maa anya atwa zwono na shɛba o. A zha shɛ du kaa a bila ya iyi maa anya atwa na ya iŋ o. Atwa mi a na Ngee teri zhɛ a ya uraiŋ gboogbo gana i'wɛ'wɛ. Ɛ zhɛ a ya iyi nɛ aa njɛ ụbaụta ibɛ.

²³Ugondu na aa nda zhɛ wa 'yagana aŋ eshe, abara ne ebe[218] kaa zha shɛ e teneni miaụŋ ma aba o. N zhɛ ma pana aŋ uwebiye, ta ajalalo aba hwɛɛ, ta aka na te e ci.

²⁴N zhɛ mɛ jishijɛ adua aba tobwolo e te hwuwi shi aŋ tɛnda o.

²⁵Ogwusu zhɛ na ya iyi urubwo uko na agwụdụ; izeci zhɛ na ya ambɛ gana inɛ, ahwa zha shɛ a lụma ya bụtụ o. I zasa iyi elele nɛ zhɛ ya sha iyi mazhanga nɛ zhɛ ya gwụcɛnga bụtụ nɛ zhɛ ya nama ya nu Zayon na shɛ ishɛmɛ mi tijilo. AGWANGWAMA dumwa.