Read bassa AYIZAYA 9 Bible Online

AYIZAYA 9 - bassa bible

AYIZAYA 9

¹[31] I zasa uhwaŋna we elele na amɛ-tụhaŋtụ eri a namana atwa ata zweni ne tiriri o. Cɛnjɛ tụ ụlamụ Zɛbulon na ma tụ ụlamụ Naftali tu na ụpụrụsa shɛwa la, ama ozhibu ata zhɛ a 'yaga ya ụjɛrụma na aka fwalaa na te ci. Ụjɛrụma ata kaa zhɛ wa banɛ geri bi itekwu, ti hileniye Jodan, tu Galili na atwa na shɛ shɛ Eju jɛjɛ la.

²[32] Atwa na a zha la tahaŋnụ ne tishi, a 'yajɛ ya uhioko-uhwaŋna ụ'wụtụ 'wụtụ. A namɛ la na cɛnjɛ tu uzhizhi tu'wo[33] ama uhioko-uhwaŋna wa ta aŋ ya.

³AGWANGWAMA, gabụ kaa bi peni aŋ amɛ-olom a'wụtụ; gabụ bɛ njɛ maa a 'yaga unyasa[34] A bwada unyasa ni iyi nɛ abɛ njɛ, gana na ta atwa a nda unyasa na aka na ta a dwa iyimɛyɛ ya aba kwo kaa aka na to o dwotwogonu uduciya na ɛɛ yɛ nu ujasa.

⁴Gabụ kaa bu jwɛ aŋ nu uhwohwo tijama na ge umpi aŋ keeni bukwuto ata go dubo shitutu sha aba. Gabụ bu fwụjɛ udenji ata ga zuga atwa bụ, a na kaa ga nda aŋ umungwuta, gana na abu lasụ la ejeshi Amidia cala cala[35]

⁵Ɛ zhɛ o hwoŋzhingo shibida sha atwa na shɛ shɛ Eju, tu n-nduka ma ata ma aba mehieŋ mi tegeni, nu ulwa.

⁶E ti metenji yɛu! Ee ti peni yɛu-ye-eyi! Ukpahiŋ keeni ụhwada zhɛ wa nama ni i'ɛlɛ ibwɛ. Ɛ zhɛ ɛ hiɛŋ bụ, Bɛjɛmɛ-bu-ushawura bi biye[36] Agwatana ikɛnyi, Bishi bu unyizo-nom, Agwuma amɛ-olom.

⁷Tugwama tu bwa ti zhɛ tu na kaana ugombo. Cɛnjɛ-ta-tugwama tu bwa ti zhɛ ta nama na amɛ-olom tutuu. Ubwa zhɛ ba ya tugwama no ohwolu agwuma Devid, Ubwa zhɛ bo shikono nu ukpahiŋ ubwa te teni cɛŋ nụ ụshɛrɛya u tishiriri, te kwuni na aka ga uuwa i ci ukwunanga. Tɛzhɛgɛdana ta AGWANGWAMA na Hwuri Kpaaŋ tuba ti zhɛ ta nda ijɛ hwɛɛ.

⁸AGWANGWAMA tumwananɛ Jekob n-ndumwa mu ko maa mu sukakanɛ bụ, mɛɛ zhɛ kaa ma patana nu uhiuhiu Isrɛl.

⁹Atwa Isrɛl hwɛɛ, ta bụtụ be elele na namɛ nu Samaria, zhɛ ba mapa maa ubwa njɛ ijɛ. Hwuwayɛ go, a namɛ na tubusa keeni tumama sata, iwɛbɛ po ɛɛ hiɛŋ,

¹⁰Ne etemberi na ee tweni oo mo la shimwono shɛ ga shi hwuŋzwotongwu; ama ti zhɛ ta maanana shụ ya tuba na atayɛ. Ezhibi odurumi la ɛɛ jwɛ, ama ti zhɛ to zwono ya tuba osobu tụlụkpashɛ to odurumi.

¹¹Ibɛ po AGWANGWAMA ishicinjɛ atwa i'ime Rezin[37] maa a sukakanɛ aŋ.

¹²Asiria gwubegeji nu uwaŋna-banụ, Afilistia gwubegeji nu uwaŋna-twonuo maa a 'imɛ atwa Isrɛl. Okwo ti yaa shɛ gana ata isɛbwɛ ya AGWANGWAMA i to hwuwowu su waa o, bi te heŋpi waa u'ala ubwa maa pana aŋ ulwapɛ.

¹³Okwo ta AGWANGWAMA na Hwuri Kpaaŋ peni aŋ ulwapɛ, atwa Isrɛl a ta jɛshɛrɛjɛ shɛ waa maa e gwuri no ofwo ubwa o.

¹⁴Nu uwaŋna ụjita uko gba, ibɛ AGWANGWAMA zhɛ a jaja uhiuhiu keeni utwenyi Isrɛl; bɛɛ zhɛ ba jaja ubaga bishiwa, te bininjidegbe.

¹⁵Atwa aba a na inganjɛ na atwa aba ụjɛrụma, aba shɛ uhiuhiu, egesere na o mbisogono atwa ụzagwụ, aba tuba shɛ utwenyi!

¹⁶Atwa na hwuleni atwa ga umbe inzhɛnjɛ aŋ, iyi ike tuba tweri atwa elele na aa ga 'yagajɛ.

¹⁷Iwɛbɛ po AGWANGWAMA zasa unyasa ne esemberi aba a na ta waŋnɛ, bi zha shɛ du kaa bo hioko inyɛmɛnyɛmɛ miaụŋ-me-e'weteji keeni olulo, iwɛnɛ ta atwa ata hwɛɛ mepi shi Agwatana, aa shɛ kaa ogworozwo. Iyi elele nɛ kaa aa duma i shɛ iyi iwɛ. Isɛbwɛ ya AGWANGWAMA i to hwuwowu su kwukwuŋ, ama bi te heŋpi waa u'ala ubwa maa pana aŋ ulwapɛ.

¹⁸Tugworozwo to gorogo na shɛmɛ sha atwa ata gana ulwa na wo gorogo ne esepi keeni ikpɛɛnci. To gorogo gana ulwa uwapa na wɛ ishicinjɛ nshikwo mụ 'wụtụ.

¹⁹Tedure ni isɛbwɛ ya AGWANGWAMA na Hwuri Kpaaŋ, ibɛ po cɛnjɛ ta ata tu hwoŋni, atwa shɛ ya gana tɛngwuzhɛ tu na to hwoŋno nu ulwa; i zasa kaa bụtụ be elele na hebi yɛu-bino bwa o.

²⁰Atwa a ya iyi nɛ aa lashajɛ nu u'ala ubiye, imunɛ ya kwụna aŋ waa, aa ya tu u'ala ugwulwo, e shiji shi kaa o. Ibɛ po bụtụ bụtụ ba ya usunda yɛu ibwɛ[38]

²¹Atwa Manasɛ na atwa Ifrem mama sukakanụ, oo togwu hwɛɛ aba aa sukakanɛ atwa Juda. Isɛbwɛ ya AGWANGWAMA kaa i to hwuwowu su taa hwayɛ o, bi te heŋpi waa u'ala maa pana aŋ ulwapɛ.