Read bassa LIVAI 11 Bible Online

LIVAI 11 - bassa bible

LIVAI 11

¹Nazhɛ AGWANGWAMA hiɛŋ Moses keeni Aron.

²Mbiso ma atwa Isrɛl maa, Iyi-uumwa nɛ ɛhi zhɛ hi na ya na ashashɛ isundɛ ye elele nɛ namɛ na cɛnjɛ tu unyizo na:

³Iyi elele nɛ 'yajɛ ogwogwozwo, inɛɛ nɛ kaa ogwogwozwo ibɛ bagwụ, inɛɛ nɛ kaa ya ya usabwo,[11] ya ma inɛ ɛtɛ.

⁴Inɛɛ nɛ kaa ahiɛ shɛ shɛ hia ya na amɛ inɛɛ nɛ ya ya usabwo, okwo ogwogwozwo ibɛ bagwụ na: irihende, ya ya usabwo, ama ogwogwozwo ibɛ bagwụ sụ o, hi jirimi iŋ.

⁵Ugwumbɛ wa ya usabwo, ama ogwogwozwo ubwa bagwụ sụ o, hi jirimi uŋ.

⁶Azwɛ a ya usabwo, ama ogwogwozwo ubwa bagwụ sụ o, hi jirimi aŋ.

⁷Ogwogwozwo ikemi bagwụ, ama i yɛ shɛ usabwo o, hi jirimi iŋ.

⁸Ta ya ma usunda wa aba o, to tumongono ma okwo ru'wo ra aba o, iwɛnɛ ehi jirimi iŋ.

⁹Inɛɛ nɛ ɛhi zhɛ hi na ya ni iyi elele nɛ zweni ne meni na: iyi elele nɛ 'yajɛ agagayɛ ataga keeni ashasha, okwo ni itekwu, kwo kaa nu Urefu, ya ma inɛ ɛtɛ.

¹⁰Ama iyi-uumwa ye elele nɛ ya hwungwa, nɛ namɛ nu ntokwu keeni erefu inɛɛ nɛ zasa ashasha keeni agagayɛ ataga, ga ihi shanɛ iyi-tupwaŋ.

¹¹A shɛ ma hi shana iyi nɛ ehi jirimi tiya tutu. Ta ya ma tu usunda wa aba o, go n'wo ma aba kaa mi hi shanɛ iyi nɛ hashɛganụ.

¹²Iyi elele nɛ namɛ ne meni, nɛ zasa ashasha keeni agagayɛ ataga, i shɛ iyi nɛ hashɛganụ[12] no ofwo hiŋ.

¹³Shanụnụ shɛ na ehi jirimi tiya iwɛnɛ shaa hashɛganụ na: egbeji, no ogwulu, no ozogbogwu,

¹⁴na agwuruwa, no ogwogwori,

¹⁵na agwaagwaa,

¹⁶nu nzhimina, no odudu ụjita, no okwuturu uwapa, ne ecepi elele,

¹⁷no ogwogworugwoni, na avwụvwụ, na agbaanjɛ,

¹⁸na shaluma-she-meni, na akazaruba-meni, no ozhikwukwu,

¹⁹na amunya, ne te sunyi-gwune elele, no ogbururu,[13] no shigwobo.

²⁰Iyi elele nɛ 'yajɛ apiambɛ, nɛ kaa yo hombilo na cɛnjɛ, ihi shanɛ iyi nɛ jirimi tiya.

²¹Okwo ti yaa shɛ gana ata iyi nɛ ahiɛ shɛ hi na ya na amɛ iyi nɛ 'yajɛ apiambɛ, nɛ ya kala madagazhɛ, nɛ kaa ya dwa angapa na cɛnjɛ na.

²²Inɛɛ nɛ ahiɛ shɛ hi na ya na amɛ ibɛ nɛ: ovworo elele, ne ekpikpikpi-ovworo, no shiywo, na a'nywa.

²³Ama iyi ya apiambɛ inyɛ ye elele nɛ yo hombilo na cɛnjɛ, hi jirimi iŋ tiya.

²⁴Ni isundɛ gɛnɛ gɛ, ibɛ ehi eri hi mama hashɛgana. Bụtụ be elele na timengeni ru'wo ri ibɛ, bi zhɛ ba hashɛganụ tutu ụrụmɛ.

²⁵Bụtụ be elele na 'waŋnɛ okwo ru'wo ri ibɛ, bɛ shɛ ba nyashɛnga tugwuno tu bwa, bi zhɛ ba hashɛganụ tutu ụrụmɛ.

²⁶Usunda we elele na 'yajɛ ogwogwozwo, unaa na ogwogwozwo ubwa bagwụ sụ tebiye, kwo kaa unaa na yɛ shɛ usabwo, u hi jirimi tiya. Bụtụ be elele timengeni uŋ, bi zhɛ ba hashɛganụ.

²⁷Iyi elele nɛ ya pa abwabwasụ ibɛ na cɛnjɛ, na ashashɛ iyi nɛ 'yajɛ ivwunɛ ineshi, hi jirimi iŋ tiya. Bụtụ be elele na timengeni okwo ru'wo ri ibɛ, bi zhɛ ba hashɛganụ tutu ụrụmɛ.

²⁸Bụtụ na kaa 'waŋnɛ ru'wo ri ibɛ, ga nyashɛnga tugwuno tu bwa, bi zhɛ kaa ba hashɛganụ tutu ụrụmɛ; iwɛnɛ ti yaa hashɛganụ.

²⁹Ijɛ ibɛ i shɛ iyi nɛ hashɛganụ na ashashɛ iyi nɛ yo hombilo na cɛnjɛ: iswɛni, no shokwuzo, na adagarɛya,

³⁰nu n-ngada, na akwagwa, na shɛngala, no shingolu, no shigodumo.

³¹Inɛ ɛtɛ ibɛ shɛ iyi nɛ hashɛganụ na ashashɛ iyi elele nɛ yo hombilo. Bụtụ na timengeni iŋ aka na ti yee 'wi, bi zhɛ ba hashɛganụ tutu ụrụmɛ.

³²Iyi elele nɛ kaa ru'wo ri ibɛ ri leyiteni, i zhɛ ya hashɛganụ, okwo iyi nɛ aa njɛ nu ụ'wụ'wụ, okwo no tugwuno, okwo nụ u'waba, kwo kaa nụ ụzhɛka, kwo kaa iyi-uhwugwa nɛ aa nda uhwara we elele, i shɛ tilɛɛ maa ge shiyeni iŋ ne meni. I shɛ ya hashɛganụ tutu ụrụmɛ, nazhɛ yɛɛ zhɛ ya nama shɛshɛshɛ.

³³Yaa shɛ kaa inɛ ye elele ibɛ leyi na amɛ iyi-uhwugwa nɛ oo mo na cɛnjɛ, medenji iyi elele nɛ zweni na amɛ ibɛ, i zhɛ ya hashɛganụ, hiɛ shɛ kaa hia bwada iŋ.

³⁴Iyimɛyɛ ye elele nɛ aa ya, meni ma ata mu to, i zhɛ ya hashɛganụ. Iyi tuswa ye elele nɛ namɛ ni iyi-uhwugwa gɛnɛ ɛtɛ, i zhɛ ya hashɛganụ.

³⁵Iyi elele nɛ ru'wo ri ibɛ ri leyiteni, okwo cwɛŋ, asha i hashɛganụ, okwo apitwa, kwo kaa a'alụ, ge e bwereteji iŋ rukwu rukwu; i hashɛganụ, ihi zana kaa du shɛshɛshɛ o.

³⁶Okwo gana elele ti yaa namɛ, umɛzhinjɛ keeni ukwokwo meni, zhɛ wa nama shɛshɛshɛ; ama iyi elele ru'wo ra aba ri timengeni, asha i hashɛganụ.

³⁷Yaa shɛ kaa ru'wo ri ibɛ ru ko ri leyiteni izɛgwu nɛ ɛɛ tɛ zhɛ a bila, inɛ ɛtɛ namɛ shɛshɛshɛ.

³⁸Ama yaa shɛ oo towo izɛgwu ɛtɛ meni nazhɛ ru'wo ri ibɛ ru ko ri leyiteni iŋ, asha i hashɛganụ ya.

³⁹Okwo usunda we elele na ahi ga ya, wee meme 'weji, bụtụ be elele na timengeni ru'wo ru bwa, bi zhɛ ba hashɛganụ tutu ụrụmɛ.

⁴⁰Bụtụ be elele na kaa yɛ usunda ubwa, ga nyashɛnga tugwuno tu bwa, bi zhɛ ba hashɛganụ tutu ụrụmɛ. Bụtụ be elele na du kaa 'waŋnɛ ru'wo ru bwa, ga nyashɛnga tugwuno tu bwa, bi zhɛ kaa ba hashɛganụ tutu ụrụmɛ.

⁴¹Iyi elele nɛ yo rungo na cɛnjɛ, hi jirimi iŋ tiya.

⁴²Iyi elele nɛ ya zha tahaŋnụ na amɛ, keeni iyi elele nɛ 'yajɛ ivwunɛ ineshi, kwo kaa iyi nɛ 'yajɛ ivwunɛ nɛ gembi ufwugwo, iyi elele nɛ yo hombilo, ta ya iŋ ma o, iwɛnɛ te ehi jirimi iŋ tiya.

⁴³Hiɛ shɛ shɛ hi mama hashɛgana ni iyi nɛ yo hombilo; shibwonu hi zha shɛ hia nama shɛshɛshɛ o.

⁴⁴Gamba n shɛ AGWANGWAMA na shɛ Agwatana hiŋ. Iwɛbɛ po meme shiri ma swooŋ, sha ma atwa tijilo, iwɛnɛ tu Ngaa shɛ bụtụ bi tijilo. Ta mama hashɛgana ma ni iyi nɛ yo hombilo, inɛɛ nɛ kaa mama mbata na cɛnjɛ o.

⁴⁵Gamba n shɛ AGWANGWAMA na ihi bɛcinjɛ na cɛnjɛ ti Ijipti, maa ma sha Agwatana hiŋ. Iwɛbɛ po sha ma atwa tijilo, iwɛnɛ tu Ngaa shɛ bụtụ bi tijilo.

⁴⁶Undwa iwɛ usunda-ehilo, na shanụnụ keeni iyi-uumwa ye elele nɛ ya hwungwa, nɛ kaa yo rungo ne meni keeni iyi-uumwa ye elele nɛ yo hombilo na cɛnjɛ ta,

⁴⁷iwɛ maa go tuswoswoswo tu nama na ashashɛ iyi nɛ hashɛganụ ni inɛɛ nɛ hashɛganụ sụ keeni na ashashɛ iyi-uumwa nɛ i shɛ aa ya keeni iyi-uumwa nɛ i shɛ shɛ aa ya.