Read bassa LIVAI 12 Bible Online

LIVAI 12 - bassa bible

LIVAI 12

¹Nazhɛ AGWANGWAMA hiɛŋ Moses,

²Hiɛŋ atwa Isrɛl maa, Yaa shɛ biyikwo 'yajɛ ofubo, bee meci yɛu-ye-eyi, asha bɛ shɛ ba hashɛganụ ijitɛ icenje; gana na tu baa shana ba nama na aka na tu baa njɛ shɛ iyi.

³Ge jeji yɛu ɛtɛ teleyi nụ ụjita ụtụndatụ.

⁴Bɛ shɛ kaa ba ta tuhwulo na tuhashɛganụ iwɛ mehieŋ mu bwa tubana tutu ijitɛ talacɛ-ni-bɛ-tɛtu, bɛ shɛ shɛ bo tumongono iyi nɛ shɛ iyi tijilo, kede tono kaa du no ofwo tijilo, tutu i ci ụjita na tinyashɛnga tu bwa tu ulwa o.

⁵Ama yaa shɛ yɛu-yo-o bee meci, asha bi zhɛ ba hashɛganụ tutu alade eyebi, gana na tu baa shana ba nama na aka na tu baa njɛ shɛ iyi, bi zhɛ kaa ba ta tuhwulo na tuhashɛganụ iwɛ mehieŋ mu bwa tubana tutu ijitɛ dupu-ne-eshe-umpwa-ni-bɛ-cihiŋ (66).

⁶Aka na ti ijitɛ tinyashɛnga tu bwa ulwa, bɛ shɛ ba 'waŋnanɛ bunongbo yɛu-ụgwụdụ nɛ ta namɛ tizhɛla tu uywa uko te e meci bu, no ofwo odubo udulo tu'ulwatagwụ iwɛ ụrụpɛ tuhwoŋzhingo, keeni biywoywo bu ulukwukwu, kwo kaa ikwucime iwɛ ụrụpɛ iwɛwɛ, iwɛ yɛu ɛtɛ ye eyi, kwo kaa iwɛ yɛu ɛtɛ yo o bee meci.

⁷Go bunongbo ata shɛkanɛ iŋ AGWANGWAMA maa ta bụ ụrụpɛ tugangana. Nazhɛ bɛɛ zhɛ ba nama shɛshɛshɛ ne mehieŋ mu na mu ga 'waŋnụ bụ. Undwa iwɛ biyikwo na meci yɛu-ye-eyi, kwo kaa yɛu-yo-o ta.

⁸Yaa shɛ kaa ikɛnyi ibwɛ ci shi yɛu-ụgwụdụ, asha ga 'waŋnɛ nkwucimo mi yebi, kwo kaa oywoywo olukwukwu eyebi, maa bu ko shɛ iwɛ ụrụpɛ tuhwoŋzhingo, maa bu na bi yebi shɛ iwɛ ụrụpɛ iwɛwɛ. Nazhɛ bunongbo zhɛ ba ta bụ ụrụpɛ iwɛwɛ tugangana, nazhɛ bɛɛ zhɛ ba bana ya na tuhashɛganụ tu bwa.