Read bassa LIVAI 15 Bible Online

LIVAI 15 - bassa bible

LIVAI 15

¹Nazhɛ AGWANGWAMA hiɛŋ Moses keeni Aron,

²Mbiso ma atwa Isrɛl maa, Yaa shɛ tu'waba ta bụtụ be elele ta bana twamwa, twamwa kaa tɛ shɛ iyi nɛ hashɛganụ.

³Undwa iwɛ bụtụ na hashɛganụ iwɛ twamwa tu na baa bana na: okwo yaa shɛ tu'waba tu bwa tu ta bana twamwa, kwo kaa tee beni shi ya twamwa, bu hashɛganụ waa.

⁴Ogodo elele na bụtụ ata ba bana twamwa weci, ɛ zhɛ a hashɛganụ, iyi elele nɛ baa jɛjɛ ni ibɛ, i zhɛ ya hashɛganụ.

⁵Bụtụ be elele na kaa timengeni ogodo ubwa, bɛ shɛ ba nyashɛnga tugwuno tu bwa, maa dula meni, bi zhɛ ba hashɛganụ tutu ụrụmɛ.

⁶Bụtụ be elele na kaa jɛjɛ ni iyi nɛ bụtụ ata ba bana twamwa ga jɛjɛ, ga nyashɛnga tugwuno tu bwa maa dula meni, bi zhɛ ba hashɛganụ tutu ụrụmɛ.

⁷Bụtụ be elele na kaa timengeni tu'waba ta bụtụ ata ba bana twamwa, ga nyashɛnga tugwuno tu bwa, ga dula meni, bi zhɛ ba hashɛganụ tutu ụrụmɛ.

⁸Yaa shɛ kaa bụtụ na ba bana twamwa zweni bụtụ na ga hashɛganụ sụ mecemi, asha ga bụtụ ata nyashɛnjɛ tugwuno tu bwa, maa dula meni ni ikɛnyi ibwɛ, bi zhɛ ba hashɛganụ tutu ụrụmɛ.

⁹Ufuridi we elele na bụtụ na ba bana twamwa jɛjɛ, baa sụcɛ iyi, u zhɛ wa hashɛganụ.

¹⁰Bụtụ be elele na kaa timengeni iyi elele nɛ ga namɛ nu ukaka ubwa, bi zhɛ ba hashɛganụ tutu ụrụmɛ. Bụtụ na kaa shepi ijɛ ɛtɛ maa 'waŋna, ga nyashɛnga tugwuno tu bwa, maa dula meni ni ikɛnyi ibwɛ, bi zhɛ kaa ba hashɛganụ tutu ụrụmɛ.

¹¹Bụtụ be elele na bụtụ na ba bana twamwa timengeni, tu baa ta nyashɛnjɛ shɛ i'ɛlɛ ibwɛ ne meni, ga bụtụ ata nyashɛnjɛ tugwuno tu bwa, maa dula meni, bi zhɛ ba hashɛganụ tutu ụrụmɛ.

¹²Iyi-uhwugwa ye elele nɛ oo mo na cɛnjɛ-ti-i'wɛŋnɛ inɛɛ nɛ bụtụ na ba bana twamwa timengeni, ge bweji iŋ. Iyi-uhwugwa ụ'wụ'wụ ye elele bee timengeni, ga bwashɛlanɛ iŋ ne meni.

¹³Aka na ta bụtụ na ba bana twamwa namɛ shɛshɛshɛ, na twamwa tu bwa tubana, asha bɛ shɛ bu mama rɛtanga ijitɛ icenje iwɛ tɛnyashɛnga tu bwa, maa kaa nyashɛnga tugwuno tu bwa, ga dula meni na ma fwunga, nazhɛ bɛɛ zhɛ ba nama shɛshɛshɛ.

¹⁴Yaa namɛ ijitɛ itindɛtu, ga 'waŋnɛ ya nkwucimo mi yebi, kwo kaa oywoywo olukwukwu eyebi maa zhajɛ nu umbe AGWANGWAMA no odubo udulo tu'ulwa, maa pana aŋ bunongbo.

¹⁵Go bunongbo to ụrụpɛ na aba. Bu ko shɛ iwɛ ụrụpɛ iwɛwɛ, bu na bi yebi shɛ iwɛ ụrụpɛ tuhwoŋzhingo. Bunongbo ata shɛ ba ta bụ ụrụpɛ tugangana nu umbe AGWANGWAMA iwɛ twamwa tu bwa tubana.

¹⁶Yaa shɛ butubwenyi shɛ tugbolo te etwenyi, ga dula meni hwɛɛ bwa, bi zhɛ ba hashɛganụ tutu ụrụmɛ.

¹⁷Utogwo we elele keeni u'waba we elele na kaa tugbolo ta ata tu bwa ti timengeni, ga nyashɛnjɛ uŋ ne meni. U zhɛ wa hashɛganụ tutu ụrụmɛ.

¹⁸Yaa shɛ butubwenyi weci ne biyikwo, baa shɛ tugbolo te butubwenyi, ga a dụrɛ meni hwɛɛ aba ebe yebi. Ɛ zhɛ kaa a hashɛganụ tutu ụrụmɛ.

¹⁹Aka na te biyikwo leyi ni iyi ciyikwo, bɛ shɛ ba nama nu uzawa tụrụmbɛɛ tu bwa ijitɛ icenje, bụtụ be elele na timengeni bu, bi zhɛ ba hashɛganụ tutu ụrụmɛ.

²⁰Iyi elele nɛ bee weci ni ibɛ, na aka uzawa tụrụmbɛɛ tu bwa, i zhɛ ya hashɛganụ. Iyi elele nɛ kaa du baa jɛjɛ ni ibɛ, i zhɛ ya hashɛganụ.

²¹Bụtụ na kaa timengeni ogodo ubwa, ga nyashɛnga tugwuno tu bwa, maa dula meni, bi zhɛ ba hashɛganụ tutu ụrụmɛ.

²²Bụtụ be elele na kaa timengeni iyi nɛ baa ga jɛjɛ, ga nyashɛnga tugwuno tu bwa, maa dula meni, bi zhɛ ba hashɛganụ tutu ụrụmɛ.

²³Okwo ya shɛ ogodo kwo kaa iyi elele nɛ baa ga jɛjɛ ni ibɛ, aka na te butubwenyi timengeni iŋ, bi zhɛ ba hashɛganụ tutu ụrụmɛ.

²⁴Yaa shɛ kaa butubwenyi be elele weci nu bwa na aka na tu baa ta zasa rụmbɛɛ, butubwenyi ata, zhɛ ba hashɛganụ tutu ijitɛ icenje. Ogodo elele na kaa bụtụ ata weci na aba, ɛ zhɛ a hashɛganụ.

²⁵Yaa shɛ biyikwo ba bana mehieŋ ijitɛ ifwugwo, ti yaa shɛ shɛ kaa aka iyi ibwɛ ciyikwo i ci, kwo kaa yaa shɛ bee beni mu te keshici aka iyi ibwɛ ciyikwo, bi zhɛ ba uranga tunama uzawa tụrụmbɛɛ tu bwa tutu ijitɛ ye elele nɛ mehieŋ ma ata mu dwa, gana na tu baa ga shana baa nama ni ijitɛ iyi ibwɛ ciyikwo, bi zhɛ ba hashɛganụ.

²⁶Ogodo elele na bee weci, ni ijitɛ ɛtɛ tu baa ta bana mụ, ogodo ata zhɛ a shana bụ ogodo iyi ibwɛ ciyikwo. Iyi elele nɛ kaa baa jɛjɛ ni ibɛ, zhɛ ya hashɛganụ, nu gana na tu baa ga hashɛganụ du na aka iyi ibwɛ ciyikwo.

²⁷Bụtụ be elele na kaa timengeni ijɛ ɛtɛ hwɛɛ, bi zhɛ ba hashɛganụ, bɛ shɛ kaa ba nyashɛnga tugwuno tu bwa, maa dula meni, bi zhɛ ba hashɛganụ tutu ụrụmɛ.

²⁸Ama yaa shɛ baa banɛ ne mehieŋ ma ata mu bwa, bɛ shɛ bu mama rɛtanga ijitɛ icenje, na aba ibɛ nazhɛ bɛɛ zhɛ ba nama shɛshɛshɛ.

²⁹Go sugo nkwucimo mi yebi kwo kaa oywoywo olukwukwu eyebi nụ ụjita ụtụndatụ, maa 'waŋna aŋ maa zha po bunongbo no odubo udulo tu'ulwa.

³⁰Go bunongbo to ụrụpɛ na aba, bu ko shɛ iwɛ ụrụpɛ iwɛwɛ, bu na bi yebi kaa shɛ iwɛ ụrụpɛ tuhwoŋzhingo. Bunongbo shɛ ba ta bụ ụrụpɛ nu umbe AGWANGWAMA iwɛ tuhashɛganụ tu bwa te mehieŋ mu na bee ge beni.

³¹Gana ga ɛhi zhɛ hia untangana atwa Isrɛl no tubogwu ta tuhashɛganụ ta aba, iwɛ aka na ɛɛ zhɛ o 'wo na tuhashɛganụ ta aba tedure na tɛhashɛgana tu udulo mu na namɛ na ashashɛ aba.

³²Undwa iwɛ bụtụ na ba bana twamwa, ni iwɛ bụtụ na shɛ tugbolo te butubwenyi ta, bu hashɛganụ.

³³Inɛ gɛ i shɛ iwɛ biyikwo na leyi ni iyi ciyikwo, ti iwɛ bụtụ be elele, te butubwenyi kwo kaa biyikwo na ba bana mehieŋ, keeni iwɛ butubwenyi na weci ne biyikwo na hashɛganụ.