Read bassa LIVAI 18 Bible Online

LIVAI 18 - bassa bible

LIVAI 18

¹Nazhɛ AGWANGWAMA hiɛŋ Moses,

²Hiɛŋ atwa Isrɛl maa, Gamba AGWANGWAMA na shɛ Agwatana na.

³Ta na nda ma iyi gana na atwa cɛnjɛ ti Ijipti a na ahi ga namɛ la na aba a nda o, ta na nda ma kaa du iyi gana na atwa cɛnjɛ ti Kenan, tu na Omo hi sugo maa hi zhe a nda o. Ta na 'wa ma shikpogo sha aba o.

⁴Na nda ma iyi gana na andwa mi namɛ, maa hi untangana kaa shikpogo shi mi, maa hi na hwuga-unu mu. Gamba AGWANGWAMA na shɛ Agwatana hiŋ na.

⁵Na untangana ma shikpogo shi mi keeni andwa mi, maa hi na nda aŋ, nazhɛ bụtụ zhɛ ba ya uraiŋ. Gamba AGWANGWAMA na.

⁶Kede bụtụ hiŋ be elele zhegeni bụtụ na baa 'yajɛ ụmatụ nu bwa kpɛmkpɛm maa woto nu bwa o. Gamba AGWANGWAMA na.

⁷Ta nda bishi bu ụpụrụsa tedure no nobu buweci o, iwɛnɛ tu baa shɛ bino bu, to woto nu bwa o.

⁸Ta nda bishi bu ụpụrụsa tedure ne biyikwo bwa bi nya buweci o, biyikwo bishi bu ta.

⁹To woto kaa na bụngwụfwụ bụ o, okwo baa shɛ yɛu-yo-o nɛ bishi bu meci, kwo kaa yɛu-yo-o nɛ bino bu meci, okwo yaa shɛ inɛɛ nɛ ee meci ni ihwɛ hiŋ, kwo kaa inɛɛ nɛ ee meci nyapadụ, aa 'yagajɛ ugaiŋ ni ihwɛ hiŋ o.

¹⁰To woto ni yɛu-yo-o nɛ yɛu bu ye eyi, kwo kaa yɛu bu yo o meci o, iwɛnɛ tu baa shɛ bụjalụ bụ.

¹¹To woto ni yɛu-yo-o nɛ biyikwo bishi bu metenji bu o, bụngwụfwụ bụ baa shɛ.

¹²To woto na bụngwụfwụ bishi bu o, iwɛnɛ tu baa shɛ ushimwa bụ.

¹³To woto no buhongwu kwo kaa na batagwụ bino bu, iwɛnɛ tu baa shɛ du bino bu.

¹⁴To woto ne biyikwo bishi bu tidice kwo kaa bu na bụ wụtụ o, bino bu ta.

¹⁵To woto ne biyikwo bi yɛu bụ o, utashɛ bụ ta.

¹⁶To woto ne biyikwo buhongwu kwo kaa batagwụ bụ o, biyikwo bi yɛu-bino bu ta.

¹⁷To woto na bụjalụ biyikwo bu, kwo kaa yɛu-yo-o nɛ yɛu bwɛ ye eyi, kwo kaa yɛu bwɛ yo o meci o, iwɛnɛ a 'yajɛ ụmatụ tikpɛmkpɛm nu bwa. Abɛ njɛ iŋ asha bɛ njɛ tugworozwo.

¹⁸Ta zana buhongwu kwo kaa batagwụ biyikwo bu o, te biyikwo bu kaa ta ya uraiŋ o.

¹⁹To gwumwongonu ne biyikwo maa woto nu bwa aka na tu baa ta namɛ ni iyi ciyikwo, tu baa ta hashɛganụ o.

²⁰To woto kaa ne biyikwo bu uyebi bu maa meme heshigeni nu bwa o.

²¹Ta pana ma atwa miaụŋ mi hiŋ me elele maa o to ụrụpɛ na tuwa tu na ɛɛ hiɛŋ, Molɛk na muba tedure nu ulwa o. Ahiɛ njɛ gana ata asha hi heshigeni izeci ya Agwatana hiŋ. Gamba AGWANGWAMA na.

²²To woto ne butubwenyi gana na oo woto ne biyikwo; tupwaŋ yaa shɛ.

²³Kede butubwenyi kwo kaa biyikwo woto nu usunda-ehilo maa meme heshigeni nu bwa o. Tupwaŋ yaa shɛ.

²⁴Ta mama hashɛgana ma ni ijɛ okwo ike o, tedure ni ijɛ hwɛɛ ibɛ edenji na Omo hi unzongo maa hi teni cɛnjɛ ta aba meme heshigeni la.

²⁵Ijɛ ɛtɛ aa nda ibɛ heshigeni cɛnjɛ tu ga, ibɛ po Ngee peni tu ulwapɛ, ibɛ du po tee jineci atwa na ga jɛjɛ la na tuba.

²⁶Ama untangana ma shikpogo shi mi keeni andwa mi maa kede bụtụ be elele na shɛ umamata wa atwa Isrɛl kwo kaa bugaiŋ na ba nda ụlashɛ na ashashɛ hiŋ njɛ ijɛ tupwaŋ okwo ike o.

²⁷Ni iyi-tupwaŋ gɛnɛ gɛ kpaaŋ ibɛ etwenyi na jɛjɛ la na cɛnjɛ ta ata hiiŋ ne hiŋ heshigeni tu.

²⁸Iwɛ aka na cɛnjɛ ta ata ti zhɛ to hi jinoko du na aka na ehi heshigeni tu, gana na te e jineci la edenji na namɛ la na tuba hiiŋ ne hiŋ.

²⁹Bụtụ be elele na njɛ tupwaŋ tu gana ga okwo tu ko, ɛ zhɛ a bacɛnga bu na ashashɛ atwa aba.

³⁰Ibɛ po AGWANGWAMA hiɛŋ aŋ, Untangana ma unu mu tɛtɛtagana, to nyiwonowuŋ ma ni iyi-tupwaŋ nɛ atwa na jɛjɛ la na cɛnjɛ ta ata hiiŋ ne hiŋ njɛ, ee heshigeni tu tedure ni ibɛ kwukwuŋ. Ta nda ma ijɛ okwo ike maa hi meme heshigeni du o, Gamba AGWANGWAMA hiŋ na.