Read bassa LIVAI 3 Bible Online

LIVAI 3 - bassa bible

LIVAI 3

¹Yaa shɛ bụtụ 'waŋnɛ buna be eyi kwo kaa buna bo o maa pana AGWANGWAMA iwɛ ụrụpɛ wa amɛ-olom,[2] asha ga shɛ bunaa na zasa tụsụnyasụ.

²Ga bụtụ ata peteni u'ala ubwa nu uhiuhiu buna ata bụ ụrụpɛ ubwa maa kwụna bụ no odubo udulo ata ụ tu'ulwatagwụ. Ga miaụŋ mu Aron me eyi mu na mɛ shɛ onongbo mu 'wɛŋ mehieŋ mu bwa nu uvwi utukwu-ụrụpɛ tutu rungwutwonu.

³Manɛbɛ ma ata mu ubeni ni i'wɛŋnɛ ibwɛ ya amɛ kpaaŋ, ibɛ shɛ iyi nɛ banɛ nụ ụrụpɛ ata wa amɛ-olom, ibɛ shɛ iyi nɛ bɛɛ zhɛ ba pana AGWANGWAMA tedure nu ulwa,

⁴keeni nkpokpolo mu bwa mi yebi medenji manɛbɛ ma muba, keeni asụbwụ ubwa a na bɛɛ zhɛ ba bwa, medenji nkpokpolo ma ata.

⁵Inɛ ɛtɛ ibɛ miaụŋ mu Aron me eyi mi zhɛ mo hwoŋzhingo nu utukwu-ụrụpɛ hwɛɛ, na azuba ijɛ ɛtɛ ụrụpɛ tuhwoŋzhingo nɛ patanɛ ni i'wɛ'wɛ ulwa ata. Ụ shanɛ AGWANGWAMA ụhiụŋ ụlatụ.

⁶Yaa shɛ ụrụpɛ wa amɛ-olom bụtụ zhɛ ba pana AGWANGWAMA, ni iyimabiga ye eyi kwo kaa inɛ yo o, asha ga shɛ ni inɛɛ nɛ zasa tụsụnyasụ bee peni AGWANGWAMA.

⁷Yaa shɛ yɛu ụgwụdụ bụtụ 'waŋnɛ maa pana AGWANGWAMA,

⁸ga patana u'ala ubwa nu uhiuhiu ụgwụdụ ata ubwa maa kwụna bụ no odubo udulo ụ tu'ulwatagwụ. Ga miaụŋ-me-eyi mu Aron mu 'wɛŋ mehieŋ mu bwa nu uvwi utukwu-ụrụpɛ tutu rungwutwonu.

⁹Manɛbɛ mu bwa mo bungwu-bu-utwenyi na gwumwongonu no bugbororo, keeni manɛbɛ ma ata mu ubeni ni i'wɛŋnɛ ya amɛ ubwa hwɛɛ, ibɛ shɛ iyi ụrụpɛ wa amɛ-olom nɛ bɛɛ zhɛ ba pana AGWANGWAMA tedure nu ulwa,

¹⁰keeni nkpokpolo mu bwa mi yebi, medenji manɛbɛ ma muba keeni asụbụ ubwa na baa shɛ ba bwa medenji nkpokpolo ma ata.

¹¹Bunongbo ubwa zhɛ bo hwoŋzhingo iŋ nu utukwu-ụrụpɛ hwɛɛ maa i shɛ iyimɛyɛ nɛ ee peni AGWANGWAMA tedure nu ulwa.

¹²Yaa shɛ biywoywo bụtụ 'waŋnɛ maa pana AGWANGWAMA,

¹³ga patana u'ala ubwa nu uhiuhiu biywoywo ata, maa kwụna bụ no odubo udulo tu'ulwatagwụ. Ga miaụŋ mu Aron mụ 'wɛŋ mehieŋ mu bwa nu uvwi utukwu-ụrụpɛ tutu rungwutwonu.

¹⁴Nazhɛ gɛ bwɛ manɛbɛ mu na mu ubeni ni i'wɛŋnɛ ibwɛ ya amɛ, hwɛɛ maa pana AGWANGWAMA ụrụpɛ na dure nu ulwa.

¹⁵To nkpokpolo mu bwa mi yebi medenji manɛbɛ ma muba mu na mu namɛ ne emenyi ubwa keeni asụbụ ubwa a na baa shɛ ba bwa medenji nkpokpolo ma ata.

¹⁶Go bunongbo hwoŋzhinji iŋ hwɛɛ nu ulwa ata namɛ nu utukwu-ụrụpɛ maa i shɛ iyimɛyɛ nɛ ee peni AGWANGWAMA tedure nu ulwa, nɛ kaa i shɛ ụhiụŋ ụlatụ. Manɛbɛ ma ata hwɛɛ mɛ shɛ mu na ma AGWANGWAMA.

¹⁷Ijɛ i shɛ okpogo unyizo-nom no ofwo elele na alamụ hiŋ namanjɛ kpaaŋ, maa kede hi na ya manɛbɛ kwo kaa mehieŋ o.