Read bassa LIVAI 7 Bible Online

LIVAI 7 - bassa bible

LIVAI 7

¹Undwa ụrụpɛ tụwụma na: ụ shɛ iyi tijilo me tijilo.

²No ofwo ata aa kwụna iyi ụrụpɛ tuhwoŋzhingo, apata du aa shɛ a kwụna iyi ụrụpɛ tụwụma, maa a 'wɛŋ mehieŋ mi ibɛ nu uvwi utukwu-ụrụpɛ tutu rungwutwonu.

³A shɛ kaa a patana manɛbɛ mu bwa hwɛɛ nu utukwu-ụrụpɛ, ta manɛbɛ mo bungwu-bu-utwenyi bu bwa, ta manɛbɛ ma ata mu ubeni ni i'wɛŋnɛ ibwɛ ya amɛ,

⁴tu nkpokpolo mu bwa mi yebi, medenji manɛbɛ ma muba keeni asụbụ ubwa na bɛɛ zhɛ bo sugo.

⁵Go bunongbo hwoŋzhinji iŋ nu utukwu-ụrụpɛ, maa ụ shɛ ụrụpɛ na ee peni AGWANGWAMA tedure nu ulwa, ụ shɛ ụrụpɛ tụwụma.

⁶Butubwenyi be elele na ashashɛ onongbo zhɛ ba ya uŋ. Ɛ zhɛ kaa a ya uŋ no ohwolu tijilo, i shɛ iyi tijilo me tijilo.

⁷Ụrụpɛ tụwụma ụ shɛ gana ụrụpɛ iwɛwɛ, undwa wa aba ụ shɛ uko. Bunongbo na to ụrụpɛ iwɛ tugangana ta ata, ubwa du zhɛ ba 'yaga uŋ.

⁸Bunongbo na kaa ba pana ụrụpɛ tuhwoŋzhingo iwɛ bụtụ be elele, ubwa du zhɛ mama 'yagana u'waba iyi ụrụpɛ ata tuhwoŋzhingo na boo to.

⁹Ụrụpɛ tiya we elele ee zweni nu ujejebi, kwo kaa ni ikwɛshɛ inɛɛ nɛ oo to na a'alụ, kpaaŋ ibɛ i shɛ inɛ bunongbo ata to ụrụpɛ ata.

¹⁰Ụrụpɛ we elele na kaa ee hiŋtetenji na manɛbɛ, kwo kaa una uhwoo, ụ shɛ una miaụŋ-me-eyi mu Aron kpaaŋ. Ga bụtụ bụtụ ba aba 'yaga ta nangwụ na binya.

¹¹Undwa ụrụpɛ wa amɛ-olom na bụtụ peni AGWANGWAMA na:

¹²Yaa shɛ bɛɛ zhɛ ba pana uŋ iwɛ ugwoje tɛnda, asha ga pana uŋ medenji akara ụrụpɛ ugwoje anaa na zasa Ifucingɛ, anaa na hiŋtetenji na manɛbɛ ma buta, keeni agbagbada na zasa Ifucingɛ anaa na aa shananjɛ manɛbɛ ma buta, keeni akara mihiuŋ mi tilee lee a na swe manɛbɛ ma buta tebiye.

¹³Iyi nɛ bɛɛ zhɛ ba madanga ụrụpɛ ubwa wa amɛ-olom iwɛ ugwoje tɛnda i shɛ akara na 'yajɛ Ifucingɛ.

¹⁴Ni inɛ gɛnɛ ɛtɛ bɛɛ zhɛ ba pana ukara uko una banɛ nụ ụrụpɛ we elele, maa ụ shɛ ụrụpɛ na ee peni AGWANGWAMA. Bunongbo na kaa 'wɛŋ mehieŋ mụ ụrụpɛ ata wa amɛ-olom, ubwa zhɛ ba 'yaga uŋ.

¹⁵Ga a yɛ usunda ụrụpɛ ata ubwa wa amɛ-olom na baa njɛ ugwoje gunu ụjita ata. Bɛ shɛ shɛ kaa ba waŋpana una we elele maa iyi heleni uŋ o.

¹⁶Ama yaa shɛ ụrụpɛ ubwa shɛ una unu-tishilo, kwo kaa una tukwulangana, asha ɛ zhɛ a ya usunda ubwa nụ ụjita ata na bee peni ụrụpɛ ubwa, ɛ zhɛ a ya du una ata vwɛ okwo iyi heleni uŋ.

¹⁷Ama yaa shɛ usunda ata ta vwɛ i ci ijitɛ itɛtu, ge hwoŋzhinji uŋ nu ulwa.

¹⁸Yaa shɛ aa yɛ usunda ụrụpɛ wa amɛ-olom we elele nụ ụjita ụtatụ, asha Agwatana zha shɛ a lashɛga ụrụpɛ ata bụtụ ata ge peni bu o, a zha shɛ kaa du a rɛta maa bụtụ ata go to ya ụrụpɛ o. U zhɛ wa sha ya iyi-tupwaŋ. Bụtụ be elele na kaa yɛ uŋ, ubwa zhɛ ba 'waŋna tijama tu bwa.

¹⁹Usunda we elele iyi nɛ hashɛganụ timengeni, a zha shɛ a ya uŋ ya o, ge hwoŋzhinji uŋ nu ulwa. Atwa elele na hashɛganụ sụ aba zhɛ a ya usunda we elele na hashɛganụ sụ du.

²⁰Bụtụ be elele na kaa yɛ usunda ụrụpɛ wa amɛ-olom na ee peni AGWANGWAMA na aka na tu baa hashɛganụ, ɛ zhɛ a bacɛnga bụtụ ata no olugwo atwa ubwa.

²¹Yaa shɛ kaa bụtụ be elele timengeni iyi nɛ hashɛganụ, okwo bụtụ na hashɛganụ, kwo kaa usunda-ehilo na hashɛganụ, kwo kaa iyi-tupwaŋ ye elele nɛ hashɛganụ, nazhɛ baa yɛ waa usunda ụrụpɛ wa amɛ-olom AGWANGWAMA, ɛ zhɛ a bacɛnga bụtụ ata no olugwo atwa ubwa.

²²Nazhɛ AGWANGWAMA hiɛŋ Moses,

²³Mbiso atwa Isrɛl maa, Kede a yɛ manɛbɛ ma buna, okwo mu na mụ ụgwụdụ, kwo kaa mu na mo biywoywo.

²⁴Ibɛ shɛ manɛbɛ mu usunda we elele na meme 'weji, keeni manɛbɛ mu unaa na usunda-ehilo dwetweji, ama e eri a nda uhwara unya na muba, ama kede a yɛ mu kwukwuŋ.

²⁵Bụtụ be elele na yɛ manɛbɛ mu usunda na ee peni AGWANGWAMA ụrụpɛ tedure nu ulwa, ɛ zhɛ a bacɛnga bụ no olugwo atwa ubwa.

²⁶Shɛ inɛ ɛtɛ kiri o, hiɛ shɛ shɛ hia ya du mehieŋ me elele o, okwo mehieŋ ma shanụnụ, kwo kaa mu na mu usunda no ofwo elele na ahi namanjɛ o.

²⁷Bụtụ be elele na yɛ mehieŋ, ɛ zhɛ a bacɛnga bụ no olugwo atwa ubwa.

²⁸Nazhɛ AGWANGWAMA hiɛŋ Moses,

²⁹Mbiso atwa Isrɛl maa, Bụtụ na zhɛ ba pana AGWANGWAMA ụrụpɛ ubwa wa amɛ-olom, ga shapɛ ụpadụ ubwa uko no ofwo AGWANGWAMA maa ụ shɛ ụrụpɛ wa amɛ-olom.

³⁰Ga 'waŋnɛ iyi ụrụpɛ nɛ bɛɛ zhɛ ba pana AGWANGWAMA tedure nu ulwa ni ikɛnyi ibwɛ. Ibɛ shɛ manɛbɛ mu bwa, medenji ukosobu ubwa. Ukosobu ata, ubwa ɛɛ zhɛ o vwurongo[7] maa ụ shɛ ụrụpɛ tuvwurongo nu umbe AGWANGWAMA.

³¹Go bunongbo hwoŋzhinji manɛbɛ ma ata nu utukwu-ụrụpɛ, ama ukosobu ata ụ shɛ una Aron na miaụŋ mu bwa me eyi.

³²Pana ma bunongbo i'unte u'ala ubiye usunda ata ụrụpɛ wa amɛ-olom.

³³Bụtụ na kaa namɛ na ashashɛ miaụŋ-me-eyi mu Aron na 'waŋnɛ mehieŋ mi iyi ụrụpɛ ata wa amɛ-olom, keeni manɛbɛ ma ata, ubwa zhɛ ba 'yaga i'unte ɛtɛ u'ala ubiye maa ụ shɛ urobwo ubwa.

³⁴N leshiji ukosobu ata ee vwurenji keeni i'unte ɛtɛ ya arụpɛ ata wa amɛ-olom atwa Isrɛl 'waŋnɛ, Ngee peni uŋ Aron na shɛ bunongbo keeni miaụŋ mu bwa me eyi, maa ụ shanɛ atwa Isrɛl undwa unyizo-nom.

³⁵Inɛ ɛtɛ ibɛ shɛ urobwo Aron keeni miaụŋ mu bwa me eyi, inɛɛ nɛ banɛ na arụpɛ na ee peni AGWANGWAMA tedure nu ulwa. Aba ee shileni iŋ swooŋ taa nụ ụjita ata aa shɛkanɛ aŋ AGWANGWAMA maa a ndanɛ bụ iyi no tunongbo ta aba.

³⁶AGWANGWAMA peni miaụŋ mi Isrɛl unu maa ge peni aŋ inɛ ɛtɛ nụ ụjita ata ee dudugeni aŋ manɛbɛ. Ụ shɛ undwa unyizo-nom tutu awaŋnɛ aba hwɛɛ.

³⁷Inɛ ɛtɛ ibɛ shɛ undwa ụrụpɛ tuhwoŋzhingo, nụ ụrụpɛ tiya, nụ ụrụpɛ iwɛwɛ, nụ ụrụpɛ tụwụma, nu una tishilo swooŋ keeni arụpɛ amɛ-olom,

³⁸anaa na AGWANGWAMA peni Moses unu wa aba ni Ishɛmɛ Sainai, nụ ụjita ata bee peni la atwa Isrɛl unu maa ge sugeni bu iyi ya arụpɛ aba nụ Ụshɛka Sainai.