Read bassa LIVAI 9 Bible Online

LIVAI 9 - bassa bible

LIVAI 9

¹Ti ijitɛ ɛtɛ icenje ulwa, nazhɛ go Moses suyanɛ Aron na miaụŋ mu bwa keeni n-nyarɛ mi Isrɛl nụ ụjita ụtụndatụ.

²Bɛɛ hiɛŋ Aron, Shapa yɛu buna be eyi bu ko maa to ụrụpɛ iwɛwɛ keeni udagba uko maa to ụrụpɛ tuhwoŋzhingo no ofwo AGWANGWAMA, hwɛɛ aba ebeyebi a shɛ shɛ a 'yaga tụsụnyasụ o.

³Mbiso tuba atwa Isrɛl maa ge shepi upi uko maa o to ụrụpɛ iwɛwɛ keeni yɛu buna be eyi bu ko nụ ụgwụdụ uko, a na ta namɛ tizhɛla tu uywa uko te e meci aŋ, hwɛɛ aba ebeyebi shɛ shɛ a 'yaga tụsụnyasụ o, maa o to ụrụpɛ tuhwoŋzhingo,

⁴keeni buna be eyi bu ko keeni udagba uko maa to ụrụpɛ wa amɛ-olom nu umbe AGWANGWAMA keeni ụrụpɛ tiya na hiŋtetenji na manɛbɛ. Iwɛnɛ po AGWANGWAMA zhɛ ma hiɛ bananɛ hwayɛ ga caakwụ.

⁵Nazhɛ ee suje ga iyi elele nɛ go Moses peni aŋ unu ibɛ nu umbe udulo tu'ulwatagwụ, nazhɛ tu'ulwatagwụ ta ata hwɛɛ ti kaanɛ izhɛ te e shikeni to dongonu umbe AGWANGWAMA.

⁶Go Moses hiɛŋ, Ijɛ ibɛ shɛ iyi nɛ AGWANGWAMA ihi peni-unu maa hiɛ njɛ. Ụjɛrụma wa AGWANGWAMA kaa zhɛ ma hiɛ bananɛ caakwụ.

⁷Nazhɛ go Moses hiɛŋ Aron, Kaanɛ izhɛ maa gwumwonu nu utukwu-ụrụpɛ, maa peni ụrụpɛ bụ iwɛwɛ keeni ụrụpɛ bụ tuhwoŋzhingo. Arụpɛ ata a shɛ iwɛ maa e bi gengeni iwɛwɛ ikɛnyi bụ keeni iwɛwɛ ya atwa vwɛ. Suje ya i'wɛŋnɛ ya atwa vwɛ maa to ụrụpɛ, iwɛ maa e gengeni aŋ iwɛwɛ ya aba; nu gana na ta AGWANGWAMA iti peni-unu ibɛ.

⁸Ga Aron kaanɛ ga izhɛ boo dongonu utukwu ata, baa kwụnɛ yɛu ɛtɛ buna be eyi iwɛ ụrụpɛ iwɛwɛ ikɛnyi ibwɛ.

⁹Nazhɛ miaụŋ mu bwa me eyi mi shɛkanɛ bụ mehieŋ ma ata, bee shiyeni buvwa bwa ne mehieŋ ma ata, baa njɛ mụ na mahiuaŋ ma ata mu utukwu, nazhɛ baa 'wɛŋ mu na ata mụ vwɛ nu uvwi utukwu.

¹⁰Ama bu hwoŋzhinji manɛbɛ mu bwa, tu nkpokpolo mu bwa, tu ukosobu ata, ta asụbwụ iyi ụrụpɛ ata iwɛwɛ nu utukwu, nu gana na ta AGWANGWAMA peni Moses unu ibɛ.

¹¹Bee hwoŋzhinji usunda keeni u'waba ubwa nu ulwa ata namɛ no tupohondo tu ugba tu'ulwa.

¹²Nazhɛ baa kwụnɛ iyi ụrụpɛ tuhwoŋzhingo, nazhɛ miaụŋ mu bwa me eyi mu panɛ bụ mehieŋ mu bwa, baa 'wɛŋ mụ nu utukwu ata tutu rungwutwonu.

¹³Nazhɛ aa panɛ bụ tusashanga tu usunda ata iyi ụrụpɛ tuhwoŋzhingo tu ko tu ko keeni uhiuhiu ubwa, bee hwoŋzhinji uŋ nu utukwu ata ụrụpɛ.

¹⁴Baa nyashɛnjɛ i'wɛŋnɛ ibwɛ ya amɛ keeni akatakpa ubwa, bee hwoŋzhinji iŋ, medenji iyi ụrụpɛ ata tuhwoŋzhingo nu utukwu-ụrụpɛ hwɛɛ.

¹⁵Nazhɛ ga Aron suje iyi ụrụpɛ ya atwa vwɛ, bee shepi biywoywo bụ ụrụpɛ iwɛwɛ, baa kwụnɛ, boo to ụrụpɛ iwɛ iwɛwɛ ya atwa vwɛ, gana na tu baa ga njɛ ne bi ne ebe bi hiiŋ bụ ụrụpɛ iwɛwɛ.

¹⁶Boo to ụrụpɛ tuhwoŋzhingo. Bu to uŋ kaa gana na to ogwungwu ubwa shɛ hwɛɛ.

¹⁷Boo to ụrụpɛ tiya, baa mụnɛ uŋ nu u'ala ubwa pwomuu bee hwoŋzhinji uŋ nu utukwu ata, medenji iyi ụrụpɛ ata tuhwoŋzhingo uvwungwa.

¹⁸Nazhɛ baa kwụnɛ buna keeni udagba du iwɛ ụrụpɛ wa amɛ-olom wa atwa vwɛ. Nazhɛ miaụŋ mu Aron mu panɛ bụ mehieŋ ma ata, baa 'wɛŋ mụ nu utukwu-ụrụpɛ tutu rungwutwonu.

¹⁹Ga Aron suji manɛbɛ ma buna ata, ta mu na mu udagba ata, ta mu na ata mo bungwu-bu-utwenyi, ta mu na ata mu ubeni ni i'wɛŋnɛ ibwɛ ya amɛ, tu nkpokpolo, keeni ukosobu, keeni asụbwụ;

²⁰bee peteni manɛbɛ ma ata na azuba okosobu ata, bee hwoŋzhinji manɛbɛ ma ata hwɛɛ nu utukwu ata.

²¹Ama ga Aron vwurenji okosobu ata keeni i'unte ɛtɛ u'ala ubiye maa ụ shanɛ AGWANGWAMA ụrụpɛ tuvwurongo, gana na tu go Moses peni-unu ibɛ.

²²Nazhɛ ga Aron suji i'ɛlɛ ibwɛ na azuba geri ba atwa vwɛ, bee peni aŋ uwebiye, nazhɛ bee kezhe bɛɛ gɛnjɛ ijɛ ɛtɛ ụrụpɛ iwɛwɛ, ni inɛ ụrụpɛ tuhwoŋzhingo keeni inɛ ụrụpɛ wa amɛ-olom.

²³Go Moses na Aron teni nu udulo tu'ulwatagwụ, na aka na ta a banɛ, ee peni atwa vwɛ uwebiye. Nazhɛ ụjɛrụma wa AGWANGWAMA bananɛ atwa ata hwɛɛ.

²⁴Nazhɛ ulwa banɛ na agba AGWANGWAMA wee kezhe, wee senji iyi ụrụpɛ ata tuhwoŋzhingo keeni manɛbɛ ma ata mu ga patanɛ nu utukwu ata ụrụpɛ ngbalaa. Aka na ta atwa ata kpaaŋ kwụbɛ iŋ, aa uganɛ, ee ubi shishe sha aba na cɛnjɛ.