Read bassa JƐRƐMIA 12 Bible Online

JƐRƐMIA 12 - bassa bible

JƐRƐMIA 12

¹AGWANGWAMA, yaa shɛ maa Ma nda ashamanjɛ n-ndumwa mi mi na bụ, gabụ kaa mɛɛ zhɛ ma zhɛma. Ama kaa N zhɛ mo bu hoŋtono waa iwɛ tiririri. Iwembe po iyi elele ya zhɛmana ogworozwoo? Iwembe po iyi elele ya 'yagana atwa na shɛ shɛ atwa tɛkana eshee?

²Gabụ bu karɛ aŋ, ee shikeni dimi; a waŋna, aa mata miaụŋ. Aka elele a na duma uwebiye bu, ama kaa iwɛ bụ zasaba na shɛmɛ sha aba o.

³Ama AGWANGWAMA, bu m mepi; aba kwụba kaa iyi nɛ Ama nda, keeni gana na ti Ngee bu lubi. Mbata aŋ gana agwụdụ na ee suji no ofwo na ɛɛ zhɛ a kwụna aŋ; ngbaraka aŋ uuwa i ci aka na i shɛ aka tụkwụna ta aba.

⁴Ụkwụmbwụ naa cɛnjɛ tu tu ti zhɛ to togo tuhwotonoo?[26] Ambɛ ehilo tu elele lụmbɛ. Ti isundɛ keeni shanụnụ sho 'wo iwɛ tugworozwo ta atwa tu. Aba shɛ atwa na hiɛŋ, Agwatana kaa kwụbɛ shɛ ukwunanga tu u geri-be-eshe o.[27]

⁵Nazhɛ AGWANGWAMA hiɛŋ, Gabụ gɛ Jɛrɛmia, yaa shɛ ebu lukwumi usumwa tugozhigo na atwa, asha gana na ebi eri bo gozhigo ni idɛkwɛɛ? Yaa shɛ kaa ebi eri shi bo shikono to nu u'una u tukpataa, asha gana na ɛbi zhɛ ba nda nu ukokoto ụpalanụ Jodan[28] yaa?

⁶Okwo miaụŋ-mo-bino bu, na atwa umwamwa bụ, a ma bu dumangana ba n-ndumwa mụ wɛ na aba bụ; ta tɛtana aŋ ya rishe okwo aa duma uwebiye bu ne eshe bu o.

⁷AGWANGWAMA hiɛŋ, N jinokwo atwa mi Isrɛl; Ngaa lakwa kaa atwa cɛnjɛ ti mi; Ngoo zwonuo kaa atwa mi na Omo lubo ni i'ɛlɛ ya atwa i'ime ya aba.

⁸Atwa mi na Ngee teri, o mo n imo; aa ma uganana gana bizeci na bo ngwulo nu uwapa. Ibɛ po Ngoo to aŋ ni i'ime.

⁹Atwa mi[29] shɛ gana ụnụnụ na ecepi holongonu geri elele maa aa 'imɛ a yɛ. Suyanɛ isundɛ ehilo ye elele maa i zhajɛ i yɛ iyimɛyɛ unyasa ụ'wụtụ!

¹⁰A'iywa-agwụdụ na gembi ufwugwo njɛ itimɛ ya afwafwa mi ufwu kpaaŋ; ee rikeci iyimɛyɛ ye ehilo mi; aa njɛ maa ehilo mi ebiye a shɛ ya ụshɛka.

¹¹A jɛshɛrɛjɛ aŋ maa a shɛ ụshɛka, osombo na hweteni aa shɛ ya ne eshe mi. Cɛnjɛ ta ata kpaŋ kpaaŋ tɛ shɛ ya uzhi, I zasa bụtụ be elele na iwɛ tuba to.

¹²Atwamwa bananjɛ na cɛnjɛ te tikpekwu, ti geri bu uzhi kpaaŋ; atwa ata zhajɛ maa e suji i'wɛŋnɛ. Ngaa tumwanɛ ujasa, wee iricinji cɛnjɛ ta ata; i zasa bụtụ okwo bu ko na eri ba nama ya na amɛ-olom.

¹³Atwa mi bɛrɛ ohiu, ama esepi ya ee gwubi; a shanɛ ikɛnyi nu ugondu tɛnda, ama kaa i zasana aŋ ule we elele o. Ashɛlatụ iwɛ iyimɛyɛ ya aba tijicinje a shɛ ya ezuye. Isɛbwɛ ya AGWANGWAMA nɛ vwengenji kaa i njɛ iŋ.

¹⁴AGWANGWAMA hiɛŋ, N 'yajɛ iyi nɛ Ngɛɛ zhɛ ma duma iwɛ ababɛshɛ atwa Isrɛl a na njɛ cɛnjɛ tu na Ngee peni atwa mi Isrɛl ufwu. N zhɛ ma bacɛnga ogworozwo ata na cɛnjɛ ta aba gana na ta bụtụ bo mushongo iyi nɛ aa bɛrɛ hwɛɛ te tini ti ibɛ, N zhɛ kaa ma lashɛga atwa Juda ni i'ɛlɛ ya aba.

¹⁵Ama na aba na ti Ngee suji aŋ, N zhɛ mo hioko inyɛmɛnyɛmɛ ya aba. N zhɛ me gwuricingo udenji una una na cɛnjɛ tu bwa keeni u'una ubwa.

¹⁶Yaa shɛ ee leni maa a 'wa uhwaŋna iyi tɛndana Agwatana atwa mi na ahaŋsa aba oko keeni maa a na ta-tuwa maa, Ni izeci ya AGWANGWAMA, nu gana na to o mbiswogwonuo la atwa mi aka oko maa ga a na ta-tuwa ti Beal; asha ɛ zhɛ a sha du atwa mi oko, yɛɛ zhɛ kaa ya zhɛmana aŋ.

¹⁷Ama yaa shɛ udenji we elele hwụjɛ shɛ unu mu, asha N zhɛ ma nda uŋ ufwu, maa mo iricingo uŋ hwɛ hwɛɛ. Gamba AGWANGWAMA N dumwa.