Read bassa JƐRƐMIA 16 Bible Online

JƐRƐMIA 16 - bassa bible

JƐRƐMIA 16

¹Nazhɛ AGWANGWAMA dumananɛ n-ndumwa ne mi, bɛɛ hiɛŋ,

²Ta zana biyikwo, ta mata kaa du miaụŋ-me-eyi na miaụŋ-mo-o no ofwo gana ga o.

³Nazhɛ AGWANGWAMA hiɛŋ, N zhɛ mo bu mbiso iyi nɛ zhɛ ye teneni miaụŋ-me-eyi na miaụŋ-mo-o mu na ee meci epe keeni iyi nɛ zhɛ ye teneni ono keeni eshi na meci aŋ na cɛnjɛ tu ga.

⁴Ụngwụ u tu'wo zhɛ wa kwụna aŋ. I zha shɛ kaa ya 'yaga bụtụ na zhɛ ba ta-ụkwụla iwɛ aba, kwo kaa na zhɛ bo no aŋ o. N'wo ma aba mi zhɛ mu momo potongonu gana ugwungwu cɛnjɛ. Ɛ zhɛ a kwụna aŋ nu ujasa keeni imunɛ-tiya, n'wo ma aba mi zhɛ ma sha iyimɛyɛ shanụnụ keeni isundɛ ehilo.

⁵Iyi nɛ AGWANGWAMA jɛmɛ na, bi hiɛŋ, Ta kara maa teni nu umwono na aa ta-ụkwụla o. Kede amɛ bụ hashɛganụ kaa iwɛ bụtụ be elele o. N zha shɛ ma pana ya atwa mi uwebiye na amɛ-olom, kwo kaa tulubo ti mi ti tikpeke keeni inyɛmɛnyɛmɛ mi o.

⁶Ta azhɛgba, to okofwo, ɛ zhɛ o 'wo na cɛnjɛ tu ga, ama a zha shɛ kaa a 'yaga bụtụ be elele na zhɛ bo no aŋ, kwo kaa na zhɛ ba ta-ụkwụla iwɛ aba o. I zasa bụtụ be elele na kaa zhɛ ba nda ụcɛnjɛ, kwo kaa na zhɛ mama 'nyanga tukpala iwɛ aba o.

⁷I zasa bụtụ be elele na zhɛ ba pana bụtụ na bụtụ bwa bu tulubo 'weni iyimɛyɛ kwo kaa iyi tuswa maa ingatanga bu o. I zasa kaa bụtụ be elele na zhɛ ba yigana bụtụ na bishi no bino bwa 'weni o.

⁸To tono nu umwono na atwa a ya iyimɛyɛ isene unyasa o. Ta gɛga kaa du na aba maa yɛ maa swe na aba o.

⁹Shɛlaga iyi nɛ Gamba na N shɛ AGWANGWAMA na Hwuri Kpaaŋ, na shɛ Agwatana Isrɛl zhɛ a duma. N zhɛ mo ngwuricingo rụhwụŋ ru unyasa, na amɛ-olom keeni ma ru u'waba tihia ro bwolo bu ufwo keeni biyikwo bu ufwo. N zhɛ ma nda iŋ ne eshe bu ta abu ta namɛ.

¹⁰Aka na ebi mbishi atwa ga ijɛ hwɛɛ, yaa shɛ ee bi heŋteni, ɛɛ hiɛŋ, Iwembe po AGWANGWAMA heŋshi maa ma tu pana ulwapɛ ụwɛ i ci gana gaa? Imbe kwuŋ shɛ iyi i ci'nyɛ keeni iwɛwɛ nɛ atɛ njɛ AGWANGWAMA na shɛ Agwatana tuu?

¹¹Nazhɛ mbiso aŋ maa, AGWANGWAMA hiɛŋ, Eshi hiŋ e n genji, aa zhɛba tuwa, aa ndana tụ iyi. Ee n jineci, a hwụjɛ shɛ unu undwa mu o.

¹²Ama tuba hiɛ njɛ iyi nɛ wumanjɛ uhwuri inɛ ye eshi hiŋ. Kpaaŋ hiŋ hi 'wa uhwaŋna tuhwotono ti hiŋ, ahia nda iyi iwɛ, hiɛ hwụjɛ shɛ kaa unu mu o.

¹³Iwɛbɛ po Ngɛɛ zhɛ ma hiɛ bacɛnga na cɛnjɛ tu ga maa Ma hi 'waŋ na cɛnjɛ tu na ehi mepi shi, hwɛɛ te eshi hiŋ. Apata ɛhi zhɛ hia zhɛba tuwa, tu uwaŋna tụ ụjita. N zha shɛ mo hioko kaa inyɛmɛnyɛmɛ hiŋ o.

¹⁴Nazhɛ AGWANGWAMA hiɛŋ, Aka e ci ba ta atwa zha shɛ a ta ya izeci mi, maa ɛ hiɛŋ, N to Agwatana uumwa na bɛcinjɛ atwa Isrɛl na cɛnjɛ ti Ijipti.

¹⁵Ama ɛ zhɛ nɛ hiɛŋ, N to Agwatana uumwa na bɛcinjɛ atwa Isrɛl na cɛnjɛ tu tuzuba keeni cɛnjɛ ta a'una elele kpaaŋ no olugwo na Ngee gereteji aŋ la. N zhɛ kaa me gwuricinje aŋ nu u'una wa aba no ofwo cɛnjɛ tu na Ngee peni la eshi aba. Gamba AGWANGWAMA, N dumwa.

¹⁶Nazhɛ AGWANGWAMA hiɛŋ, N zhɛ ma tumwanɛ ekwuzhi ufwugwo maa a 'imɛ atwa ga. Nazhɛ Ngɛɛ zhɛ ma tumwanɛ ajala ufwugwo maa a njɛ tijala ta aba ni ishɛmɛ ye elele keeni bikpekwu be elele maa a bacanjɛ aŋ na apangwụ na namɛ na aparatayɛ.

¹⁷N kwụbɛ iyi elele nɛ aa nda. I zasa iyi elele nɛ n swakanɛ o; iwɛwɛ nɛ aa ndangana swacɛ shɛ kaa ne eshe mi o.

¹⁸N zhɛ ma nda maa e leshiji itɛpwɛ iwɛwɛ ya aba keeni tugworozwo ta aba kpalụ yebi, iwɛnɛ te e heshigeni cɛnjɛ ti mi nu ntatanuwaŋ mu na mu zasa uraiŋ gana n'wo ma atwa, ee shidinji tu na tuwa ta aba tu tupwaŋ.

¹⁹Oo AGWANGWAMA, gabụ bu ma n jilanɛ, gabụ kaa bu ma m pana ikɛnyi; gabụ bu mo m mbiyono na aka amɛ-tụhaŋtụ mi. Edenji zhɛ a bananjɛ nu ukwunanga cɛnjɛ tu unyizo, ɛɛ zhɛ ɛ hiɛŋ, Eshi tu zasa iyi elele semi tuwa tu tukata keeni ntatanuwaŋ mu na mi te shi eshe kiri.

²⁰Bụtụ suu eri mama ndana Agwatana? Awo, okwo baa njɛ, e eri shi a sha Agwatana ma Agwatana o.

²¹Asha iwɛbɛ po AGWANGWAMA hiɛŋ, N zhɛ ma nda maa edenji mepi ukpahiŋ mu keeni ugombo mu, na aka ga keeni na aka elele; maa e mepi maa Gamba N shɛ AGWANGWAMA.