Read bassa JƐRƐMIA 18 Bible Online

JƐRƐMIA 18 - bassa bible

JƐRƐMIA 18

¹N-ndumwa mu na AGWANGWAMA m mbishi na, bi hiɛŋ,

²Zhaga zwo maa zhe nu umwono bumo-bu-nkwasha, apata Ngɛɛ zhɛ ma bu kapɛshɛngana utumwa mu.

³Ngee zhe Ngee zwi ga nu umwono bumo-bu-nkwasha, apata Ngaa kwụbɛ to bumo ata bu nkwasha ba nda ugondu nu ugbogolo na baa fwaŋ cɛnjɛ-ti-i'wɛŋnɛ.

⁴Aka elele na ti iyi nɛ bo mo na cɛnjɛ ta ata ti i'wɛŋnɛ bwadanụ bụ ni i'ɛlɛ, ba shapanana cɛnjɛ ta ata ba ma inyɛ iyi nɛ kwụlanɛ bụ.

⁵Nazhɛ AGWANGWAMA m mbishi, bɛɛ hiɛŋ,

⁶Oo ahiɛba atwa Isrɛl, N eri shi suu ma hi nda gana na to bumo ga bu nkwasha njɛ na cɛnjɛ tu ga ti i'wɛŋnɛ? Hiɛ namɛ ni i'ɛlɛ mi gana na ta cɛnjɛ-ti-i'wɛŋnɛ tu namɛ ni i'ɛlɛ bumo ga bu nkwasha.

⁷Yaa shɛ Ngaa jɛmɛ iwɛ aka elele maa, N zhɛ mo mushingo udenji uko kwo kaa cɛnjɛ-ta-tugwama tu ko maa Mo hwuŋzotongo tu, maa Me iricingo tu.

⁸Ama yaa shɛ udenji ata jɛshɛrɛjɛ-ahaŋsa we genji iyi iwɛ nɛ waa ga nda, asha N zha shɛ ma nda uŋ ya iyi nɛ Ngee nge heŋshi maa Ma nda uŋ o.

⁹Yaa shɛ kaa Ngɛɛ hiɛŋ, N zhɛ mo shikicingo kwo kaa Ma ma udenji we elele kwo kaa cɛnjɛ-ta-tugwama tu ko,

¹⁰ama yaa shɛ udenji ata hwụjɛ shɛ unu mu, waa nda kaa iyi iwɛ, asha N zha shɛ ma ndana uŋ iyi nɛ Ngee nge heŋshi maa N zhɛ ma ndana uŋ o.

¹¹Hwuwayɛ go mbiso atwa Juda keeni atwa na jɛjɛ nu Jɛrusalɛm maa, AGWANGWAMA hiɛŋ, M mama imanga ba maa Ma hi pana ulwapɛ. Bụtụ bụtụ ga ganga tunama ni iwɛwɛ maa hi sheyinji masha mi hiŋ keeni iyi nɛ ahia nda.

¹²Ama ɛ zhɛ ɛ jishijɛ, ɛ hiɛŋ, Awo, Inɛ ɛtɛ zasa eshe o? Ti zhɛ ta nama no tuhwotono tu tu. Bụtụ bụtụ tu zhɛ ba 'wa gana na ta ahaŋsa ubwa awɛ a jala.

¹³Iwɛbɛ po AGWANGWAMA hiɛŋ, Hoŋtono udenji we elele okwo iyi gɛnɛ gɛ nduwa la, gaaba hwugwa iyi gɛnɛ gɛ kwukwuuŋ? Atwa Isrɛl njɛ iyi nɛ wumanjɛ tebiye!

¹⁴Uparatayɛ ata u zeci ni Lebanon namwawaŋ kwukwuŋ uzawa tulom ti ticwii suu? Awapa ata lemi cwii nu nshama ma aba, a hwaŋ suu kwukwuŋ?

¹⁵Ama kaa isɛbwɛ mi 'wi atwa mi; aa ta ụrụpɛ iturɛre tuhwoŋzhingo na tuwa. A twa udukwutwa[40] nu uhwaŋna ata ee duri, a 'wa sụ ya uhwaŋna ala ụngwụshɛ o; a zha tahaŋnụ ni ihwɛŋnɛ nɛ henji shi.

¹⁶A njɛ maa ge iyi no holono cɛnjɛ tɛ ga, maa a kwụnanɛ tụ rishe unyizo-nom. Atwa elele na a kashɛka tụ, ɛ zhɛ a zhɛgɛdana iwɛ iyi nɛ aa kwụbɛ; ɛ zhɛ o zhingoto ohiuhiu aba iwɛ iyi nɛ dama aŋ.

¹⁷N zhɛ ma garataga atwa mi nu umbe atwa i'ime ya aba, gana na tu uvwugo uwaŋna-banụ wo sugo upwupwutu. N zhɛ ma panɛ aŋ aba; N zha shɛ mo mbiyono aŋ na aka na tu ufwu tɛnda zhaganɛ aŋ o.

¹⁸Ama atwa ata hiɛŋ, Hwure tɛ njɛ ma Jɛrɛmia iyi ike! Onongbo zhɛ a nama aka elele maa o no tu sokokono iwɛ, atwa na incɛ, aba ma tu pana ahaŋsa, egesere aba a duma utumwa wa Agwatana. Hwure tu twatwaganụ bu ma unu, maa kede tu hwulaga ma ya iyi nɛ baa duma o.

¹⁹Iwɛbɛ po Ngɛɛ hiɛŋ, Oo AGWANGWAMA, Hwuga iyi nɛ Ngɛɛ zhɛ ma duma, shɛlaga kaa du iyi nɛ atwa i'ime mi[41] ma n dumangana.

²⁰Iyi iwɛ suu aa tụpana hwuŋ iwɛ iyi ibiye? Ama kaa e hini u'ibwa maa Ma laya nu bwa. Teyinje aka na Ngaa zhajɛ pụ bụ iwɛ aba, iwɛ maa kede njɛ aŋ iyi iwɛ ni isɛbwɛ bu o.

²¹AGWANGWAMA, iwɛ ecilo ata lono maa gɛ imunɛ-tiya kwụnɛ miaụŋ ma aba; ga a kwụnɛ aŋ nu ujasa. Ge eyikwo aba vwụnjɛ olwo keeni miaụŋ; ga ụngwụ ụwɛ kwụnɛ etwenyi aba, ga a kwụnɛ esemberi aba nu ujasa.

²²Tumwanɛ unyama uko ụ'wụtụ 'wụtụ maa u leshiji nhwaŋ ma aba uzawa timbiso; go uriri 'imɛ aŋ maa a uganɛ. E hini u'ibwa maa Ma laya, ee biteji ogwuru maa a n 'imɛ.

²³Ama oo AGWANGWAMA, gabụ bi mepi unu na aa ma n twatwaganụ maa a n kwụnɛ. Ta gangana aŋ iyi iwɛ ya aba o, kede kaa isɛbwɛ iwɛwɛ ya aba ibu 'wi o. 'Waŋ aŋ na cɛnjɛ, nda aŋ iyi nɛ gwụmɛ na aka na aba nda isɛbwɛ.