Read bassa JƐRƐMIA 20 Bible Online

JƐRƐMIA 20 - bassa bible

JƐRƐMIA 20

¹Aka na to Bunongbo ga Pashhu yɛu-ye-eyi Ima, na shɛ uhiu wa anjɛ-ugondu nu Umwono wa AGWANGWAMA, hwụjɛ ta Ma duma tigesere tu ga,

²bee n jibi, boo n to ashɛnjɛ maa e n shiri to dongonu odubo Bɛnjamin nu Umwono wa AGWANGWAMA.

³Ti iyi heri nu uvwungwa, na aba na tu ga Pashhu n tufwurinji ashɛnjɛ ata, Ngɛɛ hiɛŋ bụ, AGWANGWAMA ubu pe shi ya izeci ti ga Pashhu. Ɛ hiɛŋ izeci nɛ boo bu po ya, go Tuholono-tu-namɛ-geri-elele.

⁴AGWANGWAMA jɛmɛ ni ikɛnyi ibwɛ, bɛɛ hiɛŋ, N zhɛ ma bu nda maa no momo holono te eyejilo bu hwɛɛ. Bi zhɛ kaa ba ngbaraka tu utokwobi wa atwa i'ime ya aba zhɛ wa kwụna aŋ kpaaŋ. N zhɛ mo zwono atwa Juda kpaaŋ nụ ụhwada wa agwuma Babulon. Bi zhɛ bo sugo aŋ bo zwono nu umwono-tishi na cɛnjɛ tu bwa, maa tuba shɛla aŋ nu utokwobi.

⁵Shɛ inɛ ɛtɛ kiri o, N zhɛ du mo lonono atwa i'ime maa e suji uduciya we elele na ga namɛ nụ ụshɛpwụ ga, maa e jinji iyi elele keeni i'wɛŋni'wɛŋni we elele nɛ aa ga 'yajɛ, tu uduciya shɛgwuma shu Juda, maa e suji iyi elele e hwuri nu Babulon.

⁶Gabụ ga Pashhu, ɛ zhɛ du ma bu ima ta atwa umwamwa bụ hwɛɛ, maa e zhe Babulon. Apata ɛbi zhɛ bo 'wo, ɛ zhɛ mo bu no medenji eyejilo ata bụ elele a na ebi mbishi tigesere tụ ụzagwụ tu ufwugwo.

⁷Oo AGWANGWAMA, gabụ bu n helekeci, ibɛ po ee n helekeci du. Bi 'yajɛ ikɛnyi ebu n hwuri, ikɛnyi bu kaa hwuri inee mi. N shɛ ya iyi ilɛtu pa bụtụ be elele; aa ma n nda asada uuwa gụ ụrụmɛ.

⁸Iwɛnɛ po aka elele na Ama ananga iwɛ, mu na kala n'ungwa maa, Abwagara! Keeni Ti'iricingo tu ta te e ci o! Iwɛnɛ po aka na Ama duma n-ndumwa ma AGWANGWAMA, a na ma n nda asada, a na ma twaga aka elele.

⁹Ama aka na Ngɛɛ hiɛŋ, N zha shɛ me teyinje ya AGWANGWAMA o, N zha shɛ kaa du ma duma ya iwɛ ni izeci ibwɛ o, utumwa bụ kaa shɛ gana ulwa no wo hwoŋno taa tuta ta amɛ mi. Ma makana ta 'yajɛ ikɛnyi maa Ma ima-isɛbwɛ, ama N zha shɛ kaa ma ala maa Mo gwuricingo uŋ o.

¹⁰N hwụjɛ ta atwa ofwugwo a duma swɛɛ swɛɛ, ɛɛ hiɛŋ, Iyi tuholono namɛ geri elele! Eyejilo mi tugom kpaaŋ, ɛ hiɛŋ, Mizha ti mbishi ma atwa ụhwada iwɛ ubwa, mizha tɛ jɛmɛ ma iwɛ ubwa! A ngbaracɛ uhwaŋna maa ga Ma laya. Ɛɛ hiɛŋ, Nekeshi ɛ zhɛ a halakaka bụ, nazhɛ ɛti zhɛ ta ala bụ, ti zhɛ kaa ta tụpa itɛpwɛ uhiuhiu tu nu bwa.

¹¹Ama gabụ AGWANGWAMA, bu namɛ geri mi, bi 'yajɛ ukpahiŋ ebi gembi kaa, atwa elele na kaa ma n shɛka, ɛ zhɛ o kwu hwɛɛ. Ụpụrụsa kaa zhɛ wa ima aŋ unyizo-nom, iwɛnɛ ti yaa zha shɛ ya 'yagana aŋ eshe. Isɛbwɛ ụpụrụsa wa aba kaa zha shɛ yo 'wo aŋ kwukwuŋ.

¹²Oo AGWANGWAMA, gabụ na bu Hwuri Kpaaŋ, gabụ ba manga atwa ne tiririri; bi mepi iyi nɛ namɛ na shɛmɛ keeni shihaŋsa sha aba. Iwɛ ecilo ata, lono maa ma kwụba tɛ ɛbi zhɛ ba nda itɛpwɛ mi no ofwo atwa i'ime mi, iwɛnɛ ti yaa shɛ gabụ Ngee utegeni iwe mi.

¹³Zungangana ma AGWANGWAMA azunga! Shɛtana ma AGWANGWAMA! Ubwa ba lashaga atwa na aa nda alaacɛ ni i'ɛlɛ ya atwa na a nda aŋ iyi iwɛ.

¹⁴Go unu-tukalana 'imɛ ụjita na ee m meci. Kede e peni ụjita na bino mi m meci uwebiye o!

¹⁵Go unu-tukalana 'imɛ bụtụ na 'waŋnanɛ bishi mi unabarɛ maa, E bi metenji yɛu-ye-eyi, baa njɛ maa ga 'yaga unyasa duwa!

¹⁶Ga bụtụ ata shɛ gana ashɛpwụ ata AGWANGWAMA iricinji uzawa inyɛmɛnyɛmɛ. Ga hwuga n'ungwa mụ ụngwụ-tuhwuga nu uvwungwa, maa hwuga urishi rundu ru ujasa nu uwaŋna,

¹⁷iwɛnɛ tu baa n kwụnɛ shɛ taa ni igwune tumata i bino mi, maa igwune tumata i bino mi i shɛ yebe u'uye mu.

¹⁸Iwembe kwuŋ po Ngaa banɛ ni igwune tumataa? Iwɛ maa Ma 'yaga amɛ-tụhaŋtụ keeni ụngwụ-tuhwuga, maa Ma kwunanga uraiŋ mu tiya nụ ụpụrụsa kiri hŋ?