Read bassa JƐRƐMIA 22 Bible Online

JƐRƐMIA 22 - bassa bible

JƐRƐMIA 22

¹Nazhɛ AGWANGWAMA m mbishi, bɛɛ hiɛŋ, Zhaga no ofwo agwuma Juda, mbiso aŋ n-ndumwa mu ga, maa,

²Oo gabụ agwuma na jɛjɛ ni idwɛtwɛ Devid, ta anjɛ-ugondu bu keeni atwa na e teni no shidubo shɛ ga, shɛlaga ma iyi nɛ AGWANGWAMA jɛmɛ.

³Iyi nɛ AGWANGWAMA jɛmɛ na, bi hiɛŋ, Na duma ma ụshɛrɛya u tishiriri, maa hi na nda iyi nɛ namɛ ririri. Lashɛga ma bụtụ na aa nda umungwuta ni i'ɛlɛ bụtụ na ba nda bụ umungwuta. Ta nda ma bugaiŋ, ne bu'weteji keeni bululo umungwuta kwo kaa alaacɛ o, ta kwụna ma kaa bụtụ na i'ɛlɛ ibwɛ zasa na tijama epe o.

⁴Yaa shɛ ahia nda gana na Ngee hi peni-unu ga gom, asha nazhɛ shɛgwuma shɛ na shɛ jɛjɛ ni idwɛtwɛ Devid shi zhɛ shi nɛ sucɛ ihɛŋtu ya aba ujasa keeni idɛkwɛ ya ba maa o no dulo no shidubo shu ukpogwu ga. Ta aba, ta anjɛ-ugondu aba keeni atwa aba hwɛɛ.

⁵AGWANGWAMA hiɛŋ, Ama yaa shɛ ahiɛ 'wa sụ unu ga tụpana, asha N hi teji uhiuhiu mu maa umwono ga zhɛ wa sha osombo.

⁶Gamba AGWANGWAMA, N hiɛŋ, Okwo ihwɛ tugwama tu Juda i n shanɛ iyi nɛ pilanụ gana ta cɛnjɛ ti Giliad keeni gana tu nshama mu Lebanon; ama kaa N tɛ zhɛ ma nda iŋ maa i shɛ osombo gana ofwo na bụtụ be elele zha shɛ ba nama.

⁷N zhɛ ma tumwanɛ atwa na zhɛ a nda apata ufwu. Ɛ zhɛ a 'waŋnɛ shigwubo hwɛɛ aba, maa e leji atukpa ata osobu a na pilanụ, maa a 'wɛŋ aŋ nu ulwa.

⁸Na aba ibɛ agaiŋ ofwugwo a na a kashɛka apata zhɛ no momo hoŋtongonu, ɛ hiɛŋ, Iwembe po AGWANGWAMA njɛ ụshɛpwụ ga maa ụ shɛ ya gana gaa?

⁹Nazhɛ ɛɛ zhɛ ɛ jishijɛ, ɛ hiɛŋ, Iwɛnɛ te e jineci unu-tutwa wa AGWANGWAMA na shɛ Agwatana aba, aa zhɛba ya tuwa tu na aa ndana iyi.

¹⁰Ahiɛba atwa Juda, Ta twana ma bụtụ na 'wi u'wo; ta ta ma kaa du ụkwụla iwɛ tu'wo tu bwa o. Ama twana ma bụtụ na aa 'imɛ, ee shepi na cɛnjɛ ti nya u'wo gboo; iwɛnɛ te e shepi bu, baa zha shɛ be gwure ya kwukwuŋ, baa zha shɛ kaa ba kwụba ya cɛnjɛ tu na ee meci bu na tuba kwukwuŋ.

¹¹AGWANGWAMA jɛmɛ iwɛ Joahaz, (ubwa atata shɛ ga Shalum) yɛu Josia, agwuma Juda na yɛ tugwama na ajɛjɛ bishi bwa, bɛɛ hiɛŋ, Bu bwonuo epe, bi zha shɛ kaa be gwure ya epe kwukwuŋ.

¹²Bi zhɛ kaa bo 'wo na cɛnjɛ ta ata ee shepi bu, bi zha shɛ kaa ba kwụba ya cɛnjɛ tu ga Kwukwuŋ.

¹³Bụtụ na mo umwono ubwa nu uzawa tiririri, na kaa mo umwono ubwa wa azuba no orugwusu; na kaa ba ana atwa cɛnjɛ tu bwa ugondu wa arahaŋ, na kaa cɛpɛ shɛ aŋ utashɛ wa aba, bi zhɛ ba nda hwuŋ adangboo!

¹⁴Bụtụ na hiɛŋ, N zhɛ m mama mana umwono uko ụ'wụtụ, unaa na shɛmɛ shɛ bwa sha azuba shi zhɛ sho holongo. Bee zweni umwono ata ubwa ewundu, baa njɛ akwurwa ubwa ni i'wɛ'wɛ yo osobu, baa njɛ uŋ tisemberi ne meni mi shenje; bi zhɛ ba nda hwuŋ adangboo!

¹⁵Bi heŋshi suu maa yaa shɛ obu mo umwono bu ni i'wɛ'wɛ yo osobu, waa zhɛmɛ kaa tebiye wo hwuri ma shɛ shɛ atwa vwɛ, ibɛ suu i zhɛ ma bu nda maa shɛ agwuma ebiye? Bishi bu yɛ la uraiŋ ubiye tebiye. Aka elele kaa ba nda la iyi tiririri keeni iyi ibiye, iyi elele nɛ baa nda kaa ya zhɛmana bụ.

¹⁶Ba shana baa duma ụshɛrɛya wo okofwo tu na wa atwa na mama zasa te teni cɛŋ, iyi elele kaa zhɛmanɛ bụ la hwɛɛ. Iyi nɛ ɛɛ hiɛŋ, AGWANGWAMA tumapa ta.

¹⁷Ama inɛɛ bu shɛ ule wo orugwusu tiya kiri eshe bu ngbaracɛ; aba kwụna bụtụ na zasa tijama, aba nda atwa bụ umungwuta keeni abwagara. AGWANGWAMA dumwa.

¹⁸Iwɛbɛ po AGWANGWAMA jɛmɛ iwɛ Jehoiyakim yɛu Josia agwuma Juda, bɛɛ hiɛŋ, I zasa bụtụ be elele na zhɛ ba ta-ụkwụla iwɛ tu'wo tu bwa kwo kaa na zhɛ hiɛŋ, Adooyi, ɛyɛu-bino mi, iwɛ gɛ wumanjɛ o! I zasa kaa bụtụ be elele na zhɛ ba twana bụ u'wo kwo kaa zha ugana iwɛ ubwa, zhɛ bɛ hiɛŋ, Oo agwuma-ihwɛ mi! Agwuma-ihwɛ mi oo!

¹⁹Tukokwulo ɛɛ zhɛ o kokwulo bu maa e becinji bu no odubo Jɛrusalɛm maa e keri bu no tupohondo, gana izhinyɛcɛ, ɛɛ zhɛ o no bu.

²⁰Ahiɛba atwa Jɛrusalɛm, zhaga ma ni Lebanon maa hi uganɛ, zhaga ma na cɛnjɛ tu Bashan maa hi keri n'ungwa; na suyana maa ụhiɛŋshɛ nu nshama mu Abarim, iwɛnɛ ta a lasawa atwa na go bu lubo hwɛɛ.

²¹AGWANGWAMA jɛmɛ iwɛ na bụ, na aka na ti yaa ta bụ zhɛmanɛ la, ama bu lacɛ la acɛbɛ tishilo. Gana aba nda ta te kwuni na cɛnɛnɛ tụ bụ; maa bi zha shɛ ba hwuga-unu wa AGWANGWAMA kwukwuŋ.

²²Uvwugo zhɛ wo sugo a'iywa bụ hwɛɛ, ujasa zhɛ wa ya eyejilo bu ebiye, ezuye keeni ụpụrụsa zhɛ wa sha ụshɛpwụ bụ iwɛ tugworozwo tụ bụ te elele.

²³Gabụ ta ba ta ụhinjanụ suu na ashashɛ i'wɛ'wɛ yo osobu nɛ ee suje nu Lebanon;[43] ama i'nye nɛ ɛbi zhɛ bo 'nyongo na aka na tụ ụngwụ-tuhwuga ubu zhaganɛ zhɛ yo hwulogo, ụngwụ ata tuhwuga zhɛ wa sha gana una biyikwo na tumata tu to.

²⁴Ibɛ po AGWANGWAMA mbishi agwuma Jehoiyakin[44] yɛu ya agwuma Juda, ge Jehoiyakim, bɛɛ hiɛŋ, M momo to, Ngɛɛ hiɛŋ, Okwo yaa shɛ abu ga shɛ bukanɛ bu useyida na shanɛ nu u'ala ubiye mu, N ngɛ zhɛ mo bu hwuciko waa,

²⁵maa ma bu pana atwa na aba nda inyɛsɛ ya aba, aba shɛ atwa na ma bu jala tụkwụna. N zhɛ ma bu pana Nɛbukadnɛza agwuma Babulon keeni asaza ubwa.

²⁶N zhɛ ma hi nda maa e hi suji na ti'ima ni iji, tu go nobu. Ɛ zhɛ mo hi sugo na cɛnjɛ tu na ee hi meci shi, apata ɛhi zhɛ hio 'wo hwɛɛ ba ehieyebi.

²⁷I zhɛ na hi dwa eshe maa hi kwụbananɛ cɛnjɛ tu ga, ama hi zha shɛ kaa hie gwure ya na tuba kwukwuŋ.

²⁸N hiɛŋ suu, Agwuma go Konia (ubwa atata shɛ gɛ) Jɛhoiyakin i shɛ gana ikwɛshɛ nɛ bwadụ aa 'wɛŋ, inɛɛ nɛ bụtụ be elele jeri shi ya? Iwembe po aa 'imɛ bụ, ta miaụŋ mu bwa ee zhe na cɛnjɛ tu na ee mepi shii?

²⁹Oo a-cɛnjɛ, a-cɛnjɛ, a-cɛnjɛ! Shɛlaga iyi nɛ AGWANGWAMA a duma;

³⁰Gamba AGWANGWAMA N dumwa, Ngɛɛ hiɛŋ, 'Nyata iwɛ bụtụ ga, gana bụtụ na zasa yɛu, gana bụtụ na iyi elele zha shɛ ya 'yagana eshe. Bi zha shɛ ba 'yaga ajalalo a na zhɛ a gɛga ni idwɛtwɛ Devid maa ya tugwama tu Juda o.