Read bassa JƐRƐMIA 24 Bible Online

JƐRƐMIA 24 - bassa bible

JƐRƐMIA 24

¹Na aba na ta agwuma Babulon gɛ Nɛbukadnɛza, 'imɛ agwuma Juda gɛ Jɛhoiyakin yɛu Jɛhoiyakim ee beni nu Jɛrusalɛm ee zhe Babulon hwɛɛ, te ehiu Juda, ta anjɛ-ugondu i'ɛlɛ, keeni alụma, nazhɛ AGWANGWAMA m mbiseni n-ngwumi ma tụ'walụ to owowo mi yebi ti mee sheji nu umbe Umwono wa AGWANGWAMA.

²Igwumi ihiiŋ zweni tụ'walụ to owowo ti biye tu na tɛ nɛ hiiŋ; inyɛ zweni tụ'walụ to owowo tu na tɛ zhɛshɛ tiya okwo cwɛŋ.

³Nazhɛ AGWANGWAMA n heŋteni, bɛɛ hiɛŋ, Gabụ gɛ Jɛrɛmia, Imbe abụ kwụbɛɛ? Ngɛɛ jishijɛ bụ, Ngɛɛ hiɛŋ, tụ'walụ to owowo, ti biye tu na tɛ zhɛmɛ tiya tebiye, keeni tụ'walụ to owowo tụ wɛ, tu na tɛ zhɛshɛ tiya okwo cwɛŋ.

⁴Nazhɛ AGWANGWAMA m mbishi n-ndumwa mu bwa, bɛɛ hiɛŋ,

⁵Gamba AGWANGWAMA na shɛ Agwatana Isrɛl, N zhɛ ma rɛta atwa go Juda aa 'imɛ, a na Ngaa njɛ maa e beni epe e zhe na cɛnjɛ tu Babulon, maa aba shɛ gana tụ'walụ ta ata to owowo ti biye.

⁶N zhɛ mo shiyono aŋ rishe maa me gwuricinje aŋ na cɛnjɛ tu ga. N zhɛ ma ma aŋ, N zha shɛ mo hwuŋzotongo aŋ o; N zhɛ ma bɛla aŋ, N zha shɛ kaa mo mushongo aŋ o.

⁷N zhɛ ma pana aŋ amɛ na 'yajɛ tukwulana ta tumapa maa Gamba n shɛ AGWANGWAMA. Nazhɛ ɛɛ zhɛ a sha atwa mi, Ngɛɛ zhɛ ma sha du Agwatana aba, iwɛnɛ tɛ ɛ zhɛ e gwure no ofwo mi na amɛ aba oko hwɛɛ.

⁸Yaa shɛ inɛ Zɛdɛkia agwuma Juda, keeni shɛgwuma shɛ na shi rungwutwonu bu, keeni atwa Jɛrusalɛm a na ta vwɛ na cɛnjɛ tu ga kwo kaa anaa na ishɛjɛ e zhe ni Ijipti, Gamba AGWANGWAMA N zhɛ ma nda aŋ hwɛɛ aba maa a shɛ gana tụ'walụ ta ata to owowo tɛ zhɛshɛ tiya kwukwuŋ okwo cwɛŋ.

⁹N zhɛ me suje iyi iwɛ mo urugono aŋ maa uriri 'imɛ edenji unyizo ga kpaaŋ. Atwamwa zhɛ na nda aŋ asada, ɛɛ zhɛ na hinga aŋ ilɛtu, ɛ zhɛ a sha iyi tu'waŋshɛ, ɛ zhɛ na kalangana aŋ unu no ofwo elele na Ngee gereteji aŋ.

¹⁰N zhɛ me sugeni aŋ ujasa, ni imunɛ-tiya keeni ụngwụ ụwɛ maa u urigeni aŋ uuwa i ci aka na ee ileni hwɛɛ na cɛnjɛ ta ata Ngee peni aŋ keeni eshi aba.