Read bassa JƐRƐMIA 25 Bible Online

JƐRƐMIA 25 - bassa bible

JƐRƐMIA 25

¹Ti yaa ulwa shiywa shi neshi ti gɛ Jɛhoiyakim yɛu Josia shɛ agwuma Juda, Ngaa hwụjɛ n-ndumwa mu na mu banɛ no olugwo AGWANGWAMA iwɛ atwa Juda kpaaŋ. (Ibɛ shɛ nu uywa uhiiŋ na ti ga Nɛbukadnɛza shɛ agwuma Babulon.)

²Ngɛɛ hiɛŋ atwa elele na namɛ nu Juda keeni atwa na jɛjɛ nu Jɛrusalɛm,

³I ulwa ya hwayɛ shiywa talacɛ-na-shɛba-shɛ-tatụ te kwune nu uywa u'umpwa-nu-ba-tatụ na tu go Josia yɛu Amon yɛ tugwama tu Juda uuwa i ci hwayɛ ga. AGWANGWAMA mo m mbiso iwɛ, N hi ngwuri shi kaa timbiso ti iyi nɛ baa jɛmɛ kwukwuŋ. Ama hi shiri shi acɛbɛ o.

⁴Okwo ta AGWANGWAMA uranjɛ miaụŋ mu bwa mu ugondu a na shɛ egesere tu tumwanɛ, hi shiri shi acɛbɛ hiŋ ni ibɛ o.

⁵E hi mbishi, ɛɛ hiɛŋ, Gwure ma maa hi genji tugworozwo ti hiŋ keeni iyi iwɛ nɛ ahia nda, iwɛ maa hi nama na cɛnjɛ tu na AGWANGWAMA ihi peni keeni eshi hiŋ maa hi 'yaga tu unyizo-nom.

⁶Ee hi mbishi, ɛɛ hiɛŋ, Ta zhɛba ma tuwa o, ta ndana tu ma iyi o. Tɛ ishicinjɛ ma isɛbwɛ ya AGWANGWAMA tedure na tuwa tu na ahiɛ njɛ ni i'ɛlɛ hiŋ o. Nazhɛ baa zha shɛ ma hi pana ulwapɛ.

⁷Ama AGWANGWAMA jɛmɛ n-ndumwa ni ikɛnyi ibwɛ, bɛɛ hiɛŋ, Hiɛ lacɛ n-ndumwa mu bwa tɛshɛlaga. Ama hiɛ njɛ maa ga 'yaga isɛbwɛ na tuwa ta ata ahiɛ njɛ ni i'ɛlɛ hiŋ, ahiɛba hi meme peteni ulwapɛ ubwa ni ikɛnyi hiŋ.

⁸Iwɛbɛ po AGWANGWAMA na Hwuri Kpaaŋ hiɛŋ,

⁹N zhɛ ma tumwanɛ ụlamụ we elele na namɛ tuzuba keeni yɛu mi ugondu gɛ Nɛbukadnɛza agwuma Babulon. N zhɛ me suje aŋ maa a sukakanɛ atwa na namɛ nu Juda keeni edenji elele na shɛ anya aba. N zhɛ me iricingo udenji ga keeni anya aba maa ma nda aŋ ufwu mbowuu, N zhɛ ma nda maa uriri 'imɛ aŋ keeni tutwa[49] tu unyizo-nom. Gamba AGWANGWAMA N dumwa.

¹⁰Shɛ inɛ ɛtɛ kiri o, N zhɛ ma bacɛnga rụhwụŋ ru unyasa, na rụhwụŋ ra amɛ-olom, na rụhwụŋ ro bwolo be eyikwo keeni biyikwo bu ufwo, keeni rundu ri inɛkɛ, keeni uhioko-uhwaŋna ụsụtụla.

¹¹Cɛnjɛ tu ga ti zhɛ ta sha osombo keeni ubizo, edenji ga zhɛ a ndana agwuma Babulon iyi shiywa dupu-nu-woshi.

¹²Na aba na ta shiywa sha ata dupu-nu-woshi shɛ ulwa, N zhɛ ma pana agwuma Babulon ulwapɛ keeni udenji ata, iwɛ iwɛwɛ ya aba du. N zhɛ me iricingo cɛnjɛ ta ata maa tɛ shɛ osombo unyizo-nom Gamba AGWANGWAMA N dumwa.

¹³N zhɛ me sugeni cɛnjɛ ta ata tuwumana te elele tu na Ngaa jɛmɛ iwɛ tuba, keeni tigesere ta tuwumana te elele tu na gɛ Jɛrɛmia dumanganɛ edenji ata hwɛɛ, tu na kaa ti 'nyeci nu utakada ga hwɛɛ.

¹⁴Edenji ufwugwo keeni shɛgwuma shɛ 'wụtụ 'wụtụ shi zhɛ sha nda aŋ ajama aba. N zhɛ ma tụpana aŋ du tụlụkpashɛ te teni cɛŋ nu ugondu na aa njɛ ni ikɛnyi aba.

¹⁵Ibɛ AGWANGWAMA na shɛ Agwatana Isrɛl m mbishi, bɛɛ hiɛŋ, Lashɛga Ukwopi ga meni mu tụ'walụ ta afwafwa mi isɛbwɛ mi shini nu bwa nu u'ala mu. Shapa uŋ zhaga no ofwo edenji elele na Ngaa bu tumwanɛ no ofwo aba, nda aŋ maa e swe mu.

¹⁶Aka na ee swe mu, ɛ zhɛ na nda golo golo, a zha shɛ a mapa ya ahaŋsa aba iwɛ ujasa na Ngɛɛ zhɛ ma tumwananɛ aŋ.

¹⁷Ngee leshiji ga ukwopi ata nu u'ala wa AGWANGWAMA, Ngee peni uŋ edenji elele na AGWANGWAMA n tumwanɛ no ofwo aba, Ngaa njɛ aŋ maa e swe mu.

¹⁸Ta atwa Jɛrusalɛm keeni atwa ashɛpwụ Juda elele hwɛɛ, ta shɛgwuma shɛ bwa keeni ehiu ubwa, e swe mu ni iji, iwɛ maa a shɛ osombo maa uriri 'imɛ aŋ, iwɛ maa atwa na suyana aŋ ni izeci tutwa gana na ta a nda aŋ tutu hwayɛ ga.

¹⁹Nzeci ma anya atwa elele na zhɛ a swa ukwopi ata na: agwuma Ijipti ga Faro na miaụŋ mu bwa mu ugondu keeni ehiu ubwa keeni atwa ubwa kpaaŋ;

²⁰atwa Ijipti kpaaŋ keeni agaiŋ Ijipti kpaaŋ; ta shɛgwuma shɛ cɛnjɛ tu Uz kpaaŋ; ta shɛgwuma sha ashɛpwụ Filistia, kpaaŋ aba shɛ atwa Ashkɛlon, nu Gaza, ni Ɛkron, keeni atwa na vwɛ na Ashdod;

²¹ta atwa Idụm, nu Moab, keeni miaụŋ-me-eyi mu Amon kpaaŋ;

²²ta shɛgwuma shɛ Taya keeni Saidụn kpaaŋ; na shɛgwuma shu ukwoswo itekwu kpaaŋ

²³na ashɛpwụ Dedan, ni Tema, keeni Buz; keeni atwa elele na a hwaga tihiŋzhe kpende kpende;[50]

²⁴ta shɛgwuma sha Arabia hwɛɛ; ta shɛgwuma shɛ na shi togotogwu na alamụ na jɛjɛ nụ ụshɛka;

²⁵na shɛgwuma shi Zimri kpaaŋ, na shɛgwuma shi Ilam kpaaŋ, keeni shɛgwuma she Midia kpaaŋ;

²⁶ta shɛgwuma shɛ tuzuba kpaaŋ, ta ma shɛ na shɛ dụlụmanjɛ keeni ma shɛ na shi gwumwongonu, na tumama 'wanụ. Udenji we elele na namɛ na cɛnjɛ tu unyizo zhɛ wa swa mu. Na aba hwɛɛ nazhɛ agwuma Babulon zhɛ a swa mu.

²⁷Nazhɛ AGWANGWAMA m mbishi, bɛɛ hiɛŋ, Mbiso atwa ata maa, Gamba AGWANGWAMA na Hwuri Kpaaŋ na shɛ Agwatana Isrɛl, ma pana aŋ unu maa ge e swe mu uuwa i ci aka na maa ngba aŋ aa gbagaga, aa layaga e eri shi ya ti'ishijɛ, iwɛ ujasa na Ngaa tumwanɛ maa u sukakanɛ aŋ.

²⁸Yaa shɛ aa lacɛ kaa maa e leshiji uŋ nu u'ala bụ maa e swe, asha mbiso aŋ maa AGWANGWAMA na Hwuri Kpaaŋ ubwa dumwa, bɛɛ hiɛŋ, Hiɛ shɛ hia swa uŋ tilɛɛ.

²⁹N zhɛ mo kwuno ugondu mu u ti'iricingo tɛnda nụ ụshɛpwụ mu ukɛnyi mu. Hi heŋshi suu maa hi zhɛ hio hwulo uzawa ulwapɛ tụpana? Awo, ɛ zhɛ ma hi pana ulwapɛ. Iwɛnɛ po N zhɛ ma tumwananɛ atwa cɛnjɛ tu unyizo kpaaŋ ujasa. Gamba AGWANGWAMA na Hwuri Kpaaŋ, N dumwa.

³⁰Gabụ, gɛ Jɛrɛmia, bɛ shɛ ba dumangana aŋ tigesere tu na ti zhɛ ta wumana aŋ nu n-ndumwa mu ga kpaaŋ. Mbiso atwa ata maa, AGWANGWAMA zhɛ o ngwulono na azuba, tungwulono ta ata tu bwa ti zhɛ ta banɛ taa na amɛ ofwo ubwa bɛjɛjɛ bi tijilo. Bi zhɛ bo ngwulono atwa ubwa ta 'yajɛ ikɛnyi duwa; bi zhɛ ba ugana gana bụtụ na bo rukoto tụ'walụ ta afwafwa. Bụtụ be elele na namɛ na cɛnjɛ tu unyizo zhɛ ba hwuga mụ.

³¹Uce cɛnjɛ tu unyizo zhɛ wa lashajɛ rụhwụŋ ra ata. AGWANGWAMA 'yajɛ ụshɛrɛya abana ne edenji. Bi zhɛ kaa be suje atwa elele no ofwo tumanga, maa kwụna ogworozwo. AGWANGWAMA dumwa.

³²AGWANGWAMA na Hwuri Kpaaŋ hiɛŋ, Hioko, iyi iwɛ ye ci ba nɛ zhɛ yo vwutono udenji udenji, uvwugo ụ'wụtụ momo sotulonu ba taa nu uce cɛnjɛ tu unyizo.

³³Jita ata n'wo ma atwa na AGWANGWAMA kwụnɛ mi zhɛ ma garatagwụ te kwune nu uce cɛnjɛ tu unyizo geri bu uko i ci unya. I zasa bụtụ na zhɛ ba ta-ụkwụla iwɛ aba o, a zha shɛ kaa o sugo aŋ maa e ni o. Ɛ zhɛ o tulono na cɛnjɛ gana ugwungwu ubizo.

³⁴Ahiɛba ehwurembe, ugana ma, ahiɛba a'iywa atwa mi, ugana ma taawụụ! Ta ma ụkwụla maa hi no jirongono nu upwupwutu. Iwɛnɛ po aka ci ya maa a hiɛ kwụnɛ,[51] ɛ zhɛ kaa ma hiɛ kwụna gana adagba.[52]

³⁵Ahiɛba a'iywa, hi zasa uhwaŋna na maa hi gezhiji o, ahiɛba ehwurembe, hi zasa ofwo elele na maa hi benengeni o.

³⁶Hwuga n'ungwa ma a'iywa-agwụdụ, keeni u'wo u shɛgwangwama shɛ unyama wa agwụdụ! Iwɛnɛ po AGWANGWAMA nduwa ehilo tiyaga ta aba ufwu,

³⁷amɛ-olom aba kaa kwu iwɛ isɛbwɛ ya AGWANGWAMA nɛ vwengenji.

³⁸AGWANGWAMA kaa jinokwo atwa ubwa[53] gana bizeci na genji ụpangwụ ubwa. Tuholono tu ujasa keeni isɛbwɛ ya AGWANGWAMA nɛ vwengenji jɛshɛrɛjɛ cɛnjɛ tu ga maa tɛ shɛ ụshɛka.