Read bassa JƐRƐMIA 27 Bible Online

JƐRƐMIA 27 - bassa bible

JƐRƐMIA 27

¹Gunu na ti gɛ Zɛdɛkia yɛu Josia yɛ tugwama tu Juda, nazhɛ AGWANGWAMA m mbishi n-ndumwa, bɛɛ hiɛŋ,

²Mama ndanɛ ụ'wụ'wụ-i'ilu[54] na agbadangara u'waba keeni una ụ'wụ'wụ maa hwuŋteni uŋ ni i'ilu bu.

³Nazhɛ AGWANGWAMA m mbishi, bɛɛ hiɛŋ, Tumwanana shɛgwuma shi Idụm, na shɛgwuma shi Moab, na shɛgwuma sha Amon, na shɛgwuma shi Taya keeni shɛgwuma shi Saidụn utumwa[55] tedure na alụkpashɛ aba a na zhajɛ Jɛrusalɛm maa a kwụbɛ agwuma gɛ Zɛdɛkia.

⁴Nazhɛ AGWANGWAMA na Hwuri Kpaaŋ na shɛ Agwatana Isrɛl m mbishi, bɛɛ hiɛŋ, Pana aŋ unu maa ge e mbishi shɛgwuma sha aba maa AGWANGWAMA hiɛŋ,

⁵Tedure nu ukpahiŋ mu keeni ikɛnyi mi i'wɛtwɛ Ngaa karɛ unyizo keeni butugwumwa, keeni isundɛ elele nɛ namɛ na cɛnjɛ tu unyizo. Ngee peni iŋ bụtụ be elele na Ngee teri.

⁶Gamba n zweni edenji ga kpaaŋ ni i'ɛlɛ yɛu mi ugondu gɛ Nɛbukadnɛza agwuma Babulon, Gamba kaa n njɛ maa okwo isundɛ ehilo na ndana bụ iyi.

⁷Edenji elele zhɛ na ndana bụ iyi, ɛɛ zhɛ a ndana yɛu ibwɛ iyi keeni bụjalụ bwa, uuwa i ci aka na tu udenji ukɛnyi ibwɛ zhɛ wa laya. Nazhɛ udenji ubwa zhɛ wa ndana edenji na 'yajɛ ukpahiŋ keeni shɛgwuma shɛ 'wụtụ 'wụtụ iyi du.

⁸Ama yaa shɛ udenji we elele kwo kaa cɛnjɛ-ta-tugwama te elele ti zha shɛ tu momo shilo tuta tu ụhwada ubwa, asha N zhɛ ma pana udenji ata ulwapɛ tedure nu ujasa, ni imunɛ-tiya, keeni ụngwụ ụwɛ, uuwa i ci aka na Ngɛɛ zhɛ mo lonono Nɛbukadnɛza maa iricingo uŋ hwɛ hwɛɛ.

⁹Ta shɛlagana ma egesere hiŋ, na ashɛjɛ hiŋ, ne ewetegeni awalabụ hiŋ, kwo kaa atwa na hiɛŋ maa aba a suyana atwa e'uye kwo kaa anjɛ-tishino hiŋ o. Hwɛɛ aba mo hi mbiso maa to momo shilo ma tuta ta agwuma Babulon o.

¹⁰Aba ma hi halakaka, ɛ zhɛ kaa ma hi nda maa e hi suji taa dụlụ maa hi beni na cɛnjɛ ti hiŋ. N zhɛ ma hi bacɛnga, hi zhɛ kaa hie ilono hwɛɛ hiŋ.

¹¹Ama udenji we elele na meme shiri tuta tụ ụhwada wa agwuma Babulon maa u ndana bụ iyi, nazhɛ Ngɛɛ zhɛ mo lonono uŋ maa u gɛga na cɛnjɛ ti ikɛnyi ibwɛ, maa u na hwaŋ tụ maa u nama apata. Gamba AGWANGWAMA N dumwa.

¹²Ngee mbishi agwuma Juda gɛ Zɛdɛkia iwɛ ɛtɛ ike ike, Ngɛɛ hiɛŋ bụ, Meme shiri tuta tụ ụhwada wa agwuma Babulon, maa na ndana bụ iyi, ta atwa ubwa, maa yɛ uraiŋ.

¹³Iwembe po ɛbi zhɛ bo 'wo nu ujasa keeni imunɛ-tiya keeni ụngwụ ụwɛ ta atwa bụ hwɛɛɛ? Ijɛ ɛtɛ ibɛ AGWANGWAMA jɛmɛ maa i zhɛ yo vwutono udenji we elele na meme shiri shi tuta tụ ụhwada wa agwuma Babulon.

¹⁴Ta shɛlagana egesere ata mo bu mbiso maa, Ta mama gangana bu o. Tigesere tụ ụzagwụ aa ma bụ dumangana.

¹⁵AGWANGWAMA ni ikɛnyi ibwɛ hiɛŋ, Shɛ Gamba n tumwanɛ aŋ maa ahi dumanganɛ tigesere ta ata tụ ụzagwụ ni izeci mi o. Inɛ ɛtɛ i shɛ iwɛ maa Mo hi unzo maa a hiɛ kwụnɛ, ta ahiɛba te egesere ata mo hi mbiso ụzagwụ ga kpaaŋ.

¹⁶Ngee mbishi onongbo keeni atwa ata kpaaŋ, Ngɛɛ hiɛŋ, AGWANGWAMA hiɛŋ, Ta shɛlagana ma egesere ata hiɛŋ, I zha shɛ ye ilogogo ti iyi uhwugwa Umwono wa AGWANGWAMA zhɛ ya banɛ nu Babulon ye gwure o. Tigesere tụ ụzagwụ aa ma hi dumangana.

¹⁷Ta shɛlagana aŋ ma o! Meme shiri ma tuta ta agwuma Babulon maa hiɛ yɛ uraiŋ! Iwɛ maa kede ụshɛpwụ ga shɛ osombo.

¹⁸Yaa shɛ aa shɛ egesere gom yaa shɛ kaa n-ndumwa ma AGWANGWAMA mu namɛ na aba, asha ga a njɛ orogwu no ofwo AGWANGWAMA na Hwuri Kpaaŋ, maa kede lono maa iyi uhwugwa nɛ i vwɛ nu Umwono wa AGWANGWAMA keeni umwono wa agwuma Juda keeni Jɛrusalɛm i zhe ya nu Babulon o.

¹⁹Aka na agwuma Nɛbukadnɛza shepi Jekonia yɛu Jɛhoiyakim agwuma Juda bee zhe Babulon, keeni ehwurembe Juda keeni Jɛrusalɛm,

²⁰bee genji atukpa, no okwokwo itumburɛ, tụ ụhaŋtụ ata cɛnjɛ, keeni iyi uhwugwa Umwono wa Agwatana ike nɛ vwɛ.

²¹AGWANGWAMA na Hwuri Kpaaŋ na shɛ Agwatana Isrɛl jɛmɛ iwɛ iyi uhwugwa nɛ i vwɛ nu Umwono wa AGWANGWAMA keeni umwono wa agwuma Juda keeni Jɛrusalɛm, bɛɛ hiɛŋ,

²²Ɛ zhɛ o sugo iŋ nu Babulon, i zhɛ kaa ya nama apata uuwa i ci aka na Ngee peni abashɛ iwɛ ibɛ. Nazhɛ Ngɛɛ zhɛ me gwuricinje iŋ maa Mo tulono iŋ sasana epe. Gamba AGWANGWAMA N dumwa.