Read bassa JƐRƐMIA 31 Bible Online

JƐRƐMIA 31 - bassa bible

JƐRƐMIA 31

¹AGWANGWAMA hiɛŋ, Aka e ci ba ti Ngɛɛ zhɛ ma sha Agwatana alamụ Isrɛl hwɛɛ, aba du kaa zhɛ a sha atwa mi.

²Nụ ụshɛka Ngee hieci inyɛmɛnyɛmɛ ya atwa na benengeni tu'wo tu utokwobi. Na aka na ta atwa Isrɛl a jalakaka ụhinjanụ,

³ibɛ po Ngaa bananɛ aŋ[64] caakwụ taa dụlụ. Mo lubo atwa ata Isrɛl aka elele, iwɛbɛ po Ngaa bu uranjɛ tulubo ti tikpeke tulubo.

⁴N tɛ zhɛ ma bu ma na aka oko sasana. Hi tɛ zhɛ hio sugo shikoko shi ti'nyama sasana aka oko maa hiɛ hiɛbɛ tɛhiɛba tu unyasa tubwada.

⁵Bi tɛ zhɛ ba hwaŋ sasana itimɛ ya afwafwa aka oko nu nshama mu Samaria, ta atwa na hwɛŋ mụ kaa zhɛ a ya tụ'walụ ta afwafwa ata aa bɛrɛ.

⁶Ụjita we ci ba aka na a'iywa zhɛ a suyana ụhiɛŋshɛ ne tikpekwu ti Ifrem, ɛɛ zhɛ ɛ hiɛŋ, Mizha tu munji ma Zayon, no ofwo AGWANGWAMA na shɛ Agwatana tu.

⁷AGWANGWAMA hiɛŋ, Zungangana ma Jekob azunga unyasa, kalana ma agwuma edenji n'ungwa taawụụ. Zunga ma azunga hiŋ ashɛtwa, ananga ma, maa hi hiɛŋ, AGWANGWAMA bicingwo atwa ubwa;[65] bee leshiji atwa elele na ga vwɛ ni Isrɛl.

⁸Hioko, N zhɛ me suje aŋ maa a banɛ nu u'una u tuzuba, N zhɛ ma zanganjɛ aŋ kaa maa a bananjɛ nu uce unyizo maa Mo sotulonu aŋ urubwo uko. To sholubo keeni okwuturu zhɛ a zhagajɛ na aba, te eyikwo na 'yajɛ shifubo keeni anaa na gwumwonu tumata. Ɛ zhɛ e gwure epe, a sha udenji ụ'wụtụ.

⁹Atwa mi zhɛ e gwure nu u'wo-tutwa, na tutabwa[66] gana na tu Ngaa 'yagajɛ aŋ maa e gwure. N zhɛ ma zarɛga aŋ no ohwulwo na 'yajɛ meni, nu uhwaŋna na namɛ gbele gbele, a zha shɛ a twa udukwutwa o. Iwɛnɛ ti yaa shɛ Gamba n shɛ bishi Isrɛl, ge Ifrem kaa shɛ yɛu mi ye eyi ihiiŋ.

¹⁰AGWANGWAMA hiɛŋ, Oo ahiɛba edenji, shɛlaga ma iwe mi, maa hi enenji kaa n-ndumwa mi mi na cɛnjɛ ta apalanụ tu na tụ dụlụmɛ, maa, Bụtụ na gereteji la atwa Isrɛl, ubwa du kaa zhɛ ba zanjɛ aŋ maa 'yagaga aŋ gana na ta bi'iywa-ba-agwụdụ ba 'yagaga agwụdụ ubwa.

¹¹Gamba n jwɛ Jekob na tijama, Ngee gwube kaa Isrɛl ni i'ɛlɛ udenji na uhwuri bu ikɛnyi.

¹²Ɛ zhɛ a zhajɛ ni ishɛmɛ Zayon maa a zụnjɛ azunga unyasa tubwada, amɛ aba zhɛ o lomo na apwaŋ mi, ibɛ shɛ apwaŋ ohiu ne meni ma afwafwa, keeni a na manɛbɛ ma buta, na apwaŋ agwụdụ keeni inɛ. Ɛ zhɛ a sha gana itimɛ nɛ oo zhizhongo meni; ɛ zhɛ a 'yaga iyi elele nɛ ukekeshi ibɛ go to aŋ.

¹³Nazhɛ miaụŋ-mo-o mu na mu ta shɛ asapa mi zhɛ ma hiɛba tɛhiɛba na amɛ-olom, etwenyi, ne esemberi keeni n-nyarɛ zhɛ a bwada unyasa. N zhɛ ma ingatanga aŋ, ma jɛshɛrɛga ụkwụla wa aba tuta maa ụ shɛ unyasa, maa amɛ-tụhaŋtụ aba a shɛ ya amɛ-olom.

¹⁴N zhɛ mo shidingo shɛmɛ sho onongbo ni iyimɛyɛ i'wɛtwɛ; maa ge iyi ukekeshi we elele gembi atwa mi. Gamba, AGWANGWAMA N dumwa.

¹⁵Ibɛ AGWANGWAMA hiɛŋ, A hwụjɛ rụhwụŋ nu Rama, Rụhwụŋ ru u'wo u tugboo. Ge Rechɛl ba twa-u'wo iwɛ miaụŋ mu bwa; baa lacɛ ti'ingatanga, iwɛnɛ tu ma zasaba ya.

¹⁶AGWANGWAMA hiɛŋ, Ganga n'ungwa, wafwaga malaba ne eshe bu. Ugondu we elele na abɛ njɛ u zha shɛ wo ngwulo tụtụpa o; ɛ zhɛ a banɛ na cɛnjɛ ta atwa i'ime ya aba e gwure. AGWANGWAMA dumwa.

¹⁷AGWANGWAMA hiɛŋ, Ashɛlatụ ta namba geri-be-eshe iwɛ bụ; miaụŋ mụ bụ mi tɛ zhɛ me jiye nu u'una wa aba. Gamba AGWANGWAMA, N dumwa.

¹⁸N hwụjɛ ta atwa Ifrem jɛmɛ na amɛ-tụhaŋtụ aba, ɛɛ hiɛŋ, AGWANGWAMA, tɛ shɛ gana usunda na zasa ni ihwɛ, ama gabụ bi ti mbisegeni unu-tuhwuga. Utu gwuricinje; tu mama 'imɛ maa te gwure no ofwo bu, na shɛ AGWANGWAMA tu.

¹⁹Iwɛnɛ po na aba na eti bi genji, ti yaa namɛ fwalaa, ata jala maa te gwure. Na aba na ebi ti peni ulwapɛ, nazhɛ yaa tu gwumanɛ otu po shɛgba shi tu iyi. Ezuye keeni ụpụrụsa ɛtɛ 'imɛ, iwɛnɛ atɛ njɛ la iwɛwɛ ne tisemberi tu tu.

²⁰Gabụ ge Ifrem, gabụ bɛ shɛ yɛu mi tugom, yɛu nɛ Omo lubo tebiye. Aka elele na Ngee teyinje izeci bu, asha Ma haŋsa[67] iwɛ bu no tulubo. Ahaŋsa mi namɛ na bụ aka elele; N zhɛ kaa mo hioko inyɛmɛnyɛmɛ bu.

²¹Meme shikecengeni iyi ye eseyida nu uhwaŋna, mama ndanɛ iyi nɛ zhɛ no bu sokokono ihwɛŋnɛ; shiyono ukpekiti ata ụ'wụtụ eshe tebiye, ubwa shɛ uhwaŋna ata ebi ge dure la.

²²Ahiɛba atwa na zasa rishe-tɛtɛtana, i ci ụkwụmbwụ naa ɛhi zhɛ hia ganga tizhingotuu? Ma nda ba iyi ike ifwo keeni iyi nɛ namɛ swooŋ, i shɛ iyi tuswooŋ, maa biyikwo, ubwa ba jilanɛ ya butubwenyi.

²³AGWANGWAMA na Hwuri Kpaaŋ, na shɛ Agwatana Isrɛl hiɛŋ, Aka na Ngee gwuricinje hwuŋ atwa ga na cɛnjɛ ta aba, ɛ zhɛ kaa a duma sasana na cɛnjɛ tu Juda keeni na ashɛpwụ ubwa, ɛ hiɛŋ, Ga AGWANGWAMA peni ishɛmɛ tiririri nɛ namɛ nu Jɛrusalɛm uwebiye, aba shɛ ofwo ata tijilo baa namɛ!

²⁴Atwa zhɛ a nama nu Juda keeni ashɛpwụ ubwa, ahwɛŋ itimɛ zhɛ a nama keeni a'iywa na o rungo iwɛ agwụdụ aba.

²⁵N zhɛ ma nda maa ga atwa ata na lukwumi a 'yaga ukpahiŋ ufwo, maa ga atwa na imunɛ logwecenji shiji ni iyimɛyɛ.

²⁶Nazhɛ atwa ata zhɛ hiɛŋ, N leyi malabụ, Ngɛɛ zhinjɛ Ngaa shaananɛ bu ufwo hwungbɛ.

²⁷Gamba AGWANGWAMA N hiɛŋ, Aka e ci ba ti Ngɛɛ zhɛ mo shidingo cɛnjɛ ti Isrɛl keeni Juda na atwa keeni isundɛ ehilo.

²⁸Gana na tu Ngaa ngbaracɛ aŋ la Ngee mushenji aŋ, Ngee hwuŋzhi aŋ, Ngee bwereteji aŋ, Ngee iricinji aŋ Ngaa 'waŋtatanjɛ aŋ du, gobwonu du gom Ngɛɛ zhɛ ma ngbaraka aŋ maa ma bila aŋ maa ma ma aŋ.

²⁹Aka na ta aka ata ci hwuŋ, atwamwa zha shɛ ɛ hiɛŋ ya maa, Eshi, aba yɛ tụ'walụ ta afwafwa tu na ti sembi, ene tuba a nda miaụŋ yigwi yigwi o.

³⁰Ama kaa bụtụ be elele na yɛ tụ'walụ ta afwafwa ta ata ti sembi ubwa ene zhɛ na nda yigwi yigwi; bụtụ bụtụ kaa zhɛ bo 'wo iwɛ iwɛwɛ ikɛnyi ibwɛ.

³¹AGWANGWAMA hiɛŋ, Aka e ci ba ti Ngɛɛ zhɛ ma twa-unu ufwo na atwa Isrɛl keeni atwa Juda.

³²U zha shɛ wa sha ya gana una ala Ngaa twa ne eshi aba na aka na ti Ngɛɛ imɛ aŋ u'ala Ngɛɛ bɛcinjɛ aŋ na cɛnjɛ ti Ijipti o. Okwo tu Ngaa shɛ gana bwolo ba aba,[68] a untanganɛ shɛ unu ata tutwa o. AGWANGWAMA dumwa.

³³Gana unu ata ufwo Ngɛɛ zhɛ ma twa na atwa Isrɛl, zhɛ wa sha na: AGWANGWAMA hiɛŋ, N zhɛ mo zwono undwa mu na shɛmɛ sha aba, Ma 'nyata uŋ kaa na shihaŋsa sha aba. N zhɛ ma sha Agwatana aba, aba du kaa zhɛ a sha atwa mi.

³⁴I zasa bụtụ na zhɛ bo mbisogono ya binya bwa AGWANGWAMA tumapa o, iwɛnɛ tɛ ɛ zhɛ ma m mapa hwɛɛ aba, te kwune na atwa na gwụmwatangwụ tutu atwa na gembenji. AGWANGWAMA hiɛŋ, N zhɛ ma gangana aŋ iwɛwɛ nɛ aa ndanjɛ, N zha shɛ kaa du me teyinje ya iwɛwɛ ya aba kwukwuŋ.

³⁵Iyi nɛ AGWANGWAMA hiɛŋ na, ubwa ba pana aŋ uwaŋna na aka bu uwaŋna, maa upiana nu mkpasu mu na ta nụ ụjita. Ubwa vwunji itekwu maa adanga ubwa na ugaga; ɛ hiɛŋ izeci ibwɛ, AGWANGWAMA na Hwuri Kpaaŋ.

³⁶AGWANGWAMA hiɛŋ, Yaa shɛ undwa ga ee shikicinji eri wa ishɛga ne eshe mi, asha nazhɛ ajalalo Isrɛl eri shi a sha ya du udenji ne eshe mi tutu unyizo-nom.

³⁷Iyi nɛ AGWANGWAMA jɛmɛ na, bi hiɛŋ, Gana na e eri shi a manga azuba keeni gana na ee eri shi a dwalakaka ukoshilo u cɛnjɛ tu unyizo, gabata du Ngee eri shi mo jinoko udenji Isrɛl kwukwuŋ iwɛ iyi nɛ aa njɛ. AGWANGWAMA dumwa.

³⁸AGWANGWAMA hiɛŋ, aka e ci ba, tɛ ɛ zhɛ a maanana Jɛrusalɛm hwɛɛ, maa ụ shɛ ụshɛpwụ mu ụ'wụtụ, te kwune na ashɛkpa Hananɛl geri bu tuta tutu i ci Odubo ata Tiringeni.

³⁹Uhwohwo tugwungwu tu bwa zhɛ wa bana apata geri bu uwaŋna-twonuo mbwụụ wa zha ne bikpekwu bu Garɛb maa u ringeni tutu i ci Goa.

⁴⁰Ulomu ata u ma'alụ mu n'wo ma atwa hwɛɛ, keeni cɛnjɛ ta ata oo no n'wo, tu na ti tileni no ofwo shihilo shi Kɛdron nu uwaŋna-banụ tutu i ci tiringeni to Odubo Budakwa, ɛ zhɛ ma n ndana aŋ tijilo. A zha shɛ o hwuŋzotongo ya ụshɛpwụ ata ụ'wụtụ o, a zha shɛ kaa du e iricingo uŋ ya kwukwuŋ.