Read bassa JƐRƐMIA 32 Bible Online

JƐRƐMIA 32 - bassa bible

JƐRƐMIA 32

¹Ti gɛ Zɛdɛkia yɛ tugwama tu Juda, yaa namɛ shiywa umpwa, gɛ Nɛbukadnɛza yɛ tugwama tu Babulon, yaa namɛ shiywa umpwa-na-shɛba-shɛ-tụndatụ, nazhɛ AGWANGWAMA m mbishi n-ndumwa mu bwa.

²Na aka ata ibɛ ejeshi agwuma Babulon hweri Jɛrusalɛm, ee n kepi nu ukpogwu umwamwa wa agwuma Juda.

³Agwuma gɛ Zɛdɛkia n kepi apata, bɛɛ hiɛŋ, Iwembe po abɛ jɛmɛ tigesere maa AGWANGWAMA hiɛŋ, N zhɛ mo lonono agwuma Babulon maa ala ụshɛpwụ ga ụ'wụtụ tulashɛga,

⁴maa agwuma gɛ Zɛdɛkia kaa zha shɛ ba bananganaa? Asha ɛ zhɛ a shapa bụ a pana agwuma Babulon; bɛɛ zhɛ ba twa eshe nu bwa, bɛɛ zhɛ kaa ba dumanga n-ndumwa nu bwa.

⁵Bɛɛ zhɛ kaa ba shapa Zɛdɛkia nu Babulon, bɛɛ zhɛ ba nama apata uuwa i ci aka na Ngee hikeni bu. Okwo baa twa ifelu na atwa Babulon, i zha shɛ ya 'yagana bu kaa eshe o. Gamba AGWANGWAMA N dumwa.

⁶Gɛ Jɛrɛmia hiɛŋ, AGWANGWAMA kaa m mbishi,

⁷maa ga Hanamɛl yɛu Shalum na shɛ bishi mi bu ko zhɛ ba zhajɛ pi mi maa ma n lụpa maa ma sa ehilo ata ubwa namɛ na Anatot, asha Gamba n teni cɛŋ maa ma saanana aŋ iwɛ ikɛnyi mi.

⁸Nazhɛ ga Hanamɛl zhajɛ ga pi mi no ofwo ata ukpogwu umwono-ụshɛrɛya, nu gana na ta AGWANGWAMA mbishi bu, bɛɛ hiɛŋ, Sa ehilo ata mi namɛ na Anatot, na cɛnjɛ ti Bɛnjamin, iwɛnɛ ti yaa shɛ gabụ bi teni cɛŋ maa seeneni aŋ maa 'yaga aŋ ni ikɛnyi bu. Ibɛ po Ngee mepi maa n-ndumwa ma ata AGWANGWAMA ga jɛmɛ ne mi mɛ shɛ ga iwɛ tugom.

⁹Ngoo so ga ehilo ata ni i'ɛlɛ Hanamɛl na shɛ yɛu bishi mi bu ko, Ngee menji ulumo ukwuribi na ụ shɛ maa ma tụpa bụ, waa shɛ azụrụfa arinya umpwa-na-ba-ecenje.

¹⁰Ngee shiyeni i'ɛlɛ nu utakada tiseyida, Ngee kepi uŋ, Ngaa suyanɛ eseyida, Ngee menji ukwuribi ata ne bimenji bu ukwuribi.

¹¹Nazhɛ Ngee suji atakada ata tiseyida, tu una ata ee sweni, ugata unu-tutwa na ee 'nyeci zweni nu bwa keeni una ata kapɛshɛngwa,

¹²Ngee peni Baruk yɛu Nɛria nɛ shɛ bụjalụ Maseiya. Ngee peni bu aŋ ne eshe Hanamɛl keeni eshe eseyida ata ge shiyeni i'ɛlɛ nu utakada ata iyi nɛ Ngoo so keeni eshe atwa na jɛjɛ nu ukpogwu ata umwono-ụshɛrɛya.

¹³Ngee mbishi Baruk ne eshe aba hwɛɛ, Ngɛɛ hiɛŋ,

¹⁴AGWANGWAMA na Hwuri Kpaaŋ na shɛ Agwatana Isrɛl, hiɛŋ, Sugo unu-tutwa ga hwɛɛ, tu una unu-tutwa iyi nɛ Ngoo so na e sweni keeni una ata kapɛshɛngwa, maa zweni aŋ ni ikwɛshɛ ɛtɛ oo mo na cɛnjɛ-ti-i'wɛŋnɛ, iwɛ maa o ilogogo shiywa shi ufwugwo geri-be-eshe.

¹⁵Iwɛbɛ po AGWANGWAMA na Hwuri Kpaaŋ na shɛ Agwatana Isrɛl hiɛŋ, Ɛ zhɛ a sa shimwono, ne shihilo keeni ntuma ma shifwafwa sasana na cɛnjɛ tu ga.

¹⁶Na aba na ti Ngee peni Baruk yɛu-ye-eyi Nɛria utakada ata unu-tutwa iyi nɛ Ngoo so, Ngaa njɛ adua pa AGWANGWAMA, Ngɛɛ hiɛŋ,

¹⁷AGWANGWAMA na shɛ Agwatana, gabụ bɛ njɛ tụla, ta cɛnjɛ tedure nu ukpahiŋ bụ ụ'wụtụ; keeni u'ala ata bụ ndarɛshɛngwa. I zasa iyi elele nɛ ibu ngezeni tɛnda o.

¹⁸Gabụ bu mbiswonuo atwa akpakwụ ufwugwo tulubo tụ bụ tụ 'wụtụ, obu pwonuo kaa du atwa ufwugwo ulwapɛ iwɛwɛ nɛ eshi aba njɛ. Gabụ bɛ shɛ Agwatana a'wụtụ keeni bu na bu ukpahiŋ kpaaŋ; ɛ hiɛŋ izeci bu AGWANGWAMA na Hwuri Kpaaŋ.

¹⁹Gabụ ba nda ti'imanganga tu na tɛ incɛ keeni iyi i'wɛtwɛ. Gabụ ba kwụba iyi elele nɛ atwamwa a nda, gabụ kaa ba tụpa aŋ te teni cɛŋ na tɛnda ta aba.

²⁰Gabụ kaa bɛ njɛ la arụhwajɛ keeni iyi tudama ni Ijipti cala cala, gabụ kaa bu ta nda iŋ taa hwayɛ, to ofwo atwa Isrɛl keeni na ashashɛ edenji elele, iwɛbɛ po ee bi mepi no ofwo elele hwɛɛ.

²¹Tedure na arụhwajɛ bụ o tugom keeni iyi tudama ifwugwo nɛ herikeni atwa i'ime tu shihwulu, ibɛ po abɛ njɛ ukpahiŋ bụ ụ'wụtụ ɛbi bɛcinjɛ atwa Isrɛl na cɛnjɛ ti Ijipti.

²²Gabụ kaa bi peni aŋ cɛnjɛ tu ga tuwebiye tu barɛ keeni ugwungwu, nu gana na ebi shileni la eshi aba unu maa bi zhɛ ba pana aŋ.

²³Ama aka na te e teni cɛnjɛ tu ga, ee leshiji tu, a hwụjɛ shɛ ya unu bu okwo maa a na nda iyi nɛ teni cɛŋ nu undwa bụ o; a njɛ shɛ ya iyi elele nɛ ebi eni aŋ tɛnda o. Iwɛbɛ po ebu sugeni aŋ ufwu ga tɛnda kpaaŋ.

²⁴Atwa Babulon momo sutengeni otukwu otukwu oo rungwutwonu ụshɛpwụ ata maa e leshiji uŋ, ee hweri aŋ. Ibɛ po ujasa, ni imunɛ-tiya, keeni ụngwụ ụwɛ zhɛ ya nda maa ụshɛpwụ ata teni ni i'ɛlɛ ya aba. Gabụ du bụ kwụbɛ ya maa iyi elele nɛ abɛ jɛmɛ la kpaaŋ i sɛ.

²⁵Oo AGWANGWAMA Mokondo, okwo ti yaa shɛ gana ata gabụ kaa bi n hiɛŋ ga ma sa la ehilo ata ne eshe eseyida ata, okwo ta atwa Babulon zhɛ a lashɛga ụshɛpwụ ata.

²⁶Nazhɛ AGWANGWAMA n jishijɛ, bɛɛ hiɛŋ,

²⁷Gamba n shɛ AGWANGWAMA na shɛ Agwatana atwa kpaaŋ. I zasa iyi elele nɛ n ngezeni tɛnda o.

²⁸N zhɛ mo utogono Nɛbukadnɛza agwuma Babulon ụshɛpwụ ga keeni ejeshi ubwa; ɛ zhɛ a lashɛga uŋ,

²⁹ɛɛ zhɛ a sapa uŋ ulwa. Ɛ zhɛ o hwoŋzhingo uŋ hwɛɛ, to shimwono sha ata oo hwoŋzhingono Beal iturɛre no okogo shɛ ba keeni arụpɛ tuswa na a 'wanga tuwa ta aba maa ɛ ishicinjɛ isɛbwɛ mi.

³⁰AGWANGWAMA hiɛŋ, te kwuni nu umozhigo mu ụrụkwụkwụ ra atwa Isrɛl keeni atwa Juda, a ma hashɛgana amɛ, ɛɛ ishicinjɛ isɛbwɛ mi tedure ni iyi nɛ aa nda ni i'ɛlɛ ya aba.

³¹Atwa ụshɛpwụ ga njɛ maa gɛ isɛbwɛ mi gereji te kwuni nụ ụjita na ee jwe uŋ. N hoŋswo maa N zhɛ me iricingo uŋ kpaaŋ maa kede Ma kwụba uŋ ya o,

³²iwɛ iyi iwɛ ye elele nɛ atwa Isrɛl na atwa Juda njɛ maa ɛ ishicinjɛ isɛbwɛ mi, ta shɛgwuma sha aba, te ehiu aba, to onongbo aba keeni egesere aba a nda, te etwenyi Juda keeni atwa na jɛjɛ nu Jɛrusalɛm.

³³A m panɛ shɛ ba sha aba; okwo tu Ngaa uranjɛ aŋ timbisogono, a shɛlajɛ shɛ maa e seshi o.

³⁴E suji du tuwa ta ata ta aba tu tupwaŋ e tileni tu na amɛ Umwono na oo mo iwɛ tɛzhɛba ti mi, ee heshigeni uŋ.

³⁵E meni Beal otukwu-ụrụpɛ nu ulomu Hinom, maa a na ta ụrụpɛ na miaụŋ ma aba me eyi keeni mu na mo o na tuwa tu Molɛk. M peni shi aŋ unu maa ga a njɛ ijɛ o, i teni shi okwo na ahaŋsa mi maa ga a njɛ iyi gɛnɛ ɛtɛ maa e eni atwa Juda iwɛwɛ tɛnda o.

³⁶Nazhɛ AGWANGWAMA na shɛ Agwatana Isrɛl m mbishi, bɛɛ hiɛŋ, Ɛ-Jɛrɛmia, atwa hiɛŋ, Ujasa, ni imunɛ-tiya, keeni ụngwụ ụwɛ zhɛ wa nda maa ga ụshɛpwụ ga teni ni i'ɛlɛ ya agwuma Babulon. Shɛlaga hwuwayɛ go inyɛ iyi nɛ Ngɛɛ zhɛ mɛ hiɛŋ.

³⁷N tɛ zhɛ ma zanganjɛ atwa ata maa a bananjɛ na cɛnjɛ te elele tu na Ngee gereteji aŋ la ni isɛbwɛ mi i'wɛtwɛ, N zhɛ me suje aŋ me gwuricinje maa a nama epe nu ulapiya suu.

³⁸Nazhɛ Ngɛɛ zhɛ ma sha Agwatana aba, ɛɛ zhɛ du a sha atwa mi.

³⁹N zhɛ ma pana aŋ ahaŋsa oko gba keeni uhwaŋna uko gba; iwɛ maa a na ma sụma inyɛsɛ unyizo-nom, iwɛ tɛzhɛmana ti ikɛnyi aba keeni iwɛ tɛzhɛmana tu miaụŋ mu na ɛɛ tɛ zhɛ a mata hwuŋ.

⁴⁰N zhɛ ma twa-unu unyizo-nom na aba. N zha shɛ ma ganga aŋ iyi ibiye tɛndana kwukwuŋ. Ngɛɛ zhɛ du ma nda maa a na ma sụma inyɛsɛ na amɛ aba oko, iwɛ maa kede a vwụrɛ ya maa e n genji kwukwuŋ.

⁴¹N zhɛ mu na ndana aŋ iyi ibiye nu unyasa, Ngɛɛ zhɛ kaa mo shikicingo aŋ dimi na cɛnjɛ tu ga, na tɛcara na amɛ mi oko keeni ohwulu mi oko unyizo-nom.

⁴²Gana na Ngee sugeni la atwa ga iyi iwɛ gɛ i'wɛtwɛ kpaaŋ, gabata du Ngɛɛ zhɛ ma ndana aŋ iyi ibiye ye elele nɛ Ngee shileni aŋ unu ibɛ gbaa.

⁴³Atwamwa a duma maa, Cɛnjɛ tu ga ti zhɛ ta sha gana ụshɛka, ofwo na atwa keeni isundɛ elele zha shɛ a nama ya, ɛɛ zhɛ a pana tụ atwa Babulon. Ama ɛ tɛ zhɛ kaa a sa shihilo na cɛnjɛ tu ga sasana na aka oko.

⁴⁴Atwa tɛ zhɛ a sa tụ, ɛɛ tɛ zhɛ o shiyono i'ɛlɛ nu utakada unu-tutwa, ɛ zhɛ a swana uŋ, ne eshe eseyida. Ijɛ zhɛ ya nda no tugwungwu ta cɛnjɛ ti Bɛnjamin, keeni ashɛpwụ na rungwutwonu Jɛrusalɛm, ta ashɛpwụ Juda, ta ashɛpwụ na namɛ na cɛnjɛ ti ishɛmɛ, to ofwo embi ishɛmɛ, keeni tuta tu Juda. N zhɛ me gwuricingeni atwa ata ugwoje wa aba na cɛnjɛ ta aba. Gamba AGWANGWAMA, N dumwa.