Read bassa JƐRƐMIA 38 Bible Online

JƐRƐMIA 38 - bassa bible

JƐRƐMIA 38

¹Tu ga Shɛfatia yɛu Matan, nɛ Gɛdalia yɛu Pashu, no Jukal yɛu Shɛlɛmia, keeni Pashhu yɛu Malkia hwụjɛ maa Mo mbiso ba atwa maa,

²AGWANGWAMA hiɛŋ, Ujasa, ni imunɛ-tiya keeni ụngwụ ụwɛ zhɛ wa kwụna bụtụ be elele na jɛjɛ nụ ụshɛpwụ ga. Ama a zha shɛ a kwụna bụtụ be elele na meme gengeni atwa Babulon o; ama uraiŋ ubwa zhɛ wa banangana tilɛɛ.

³Omo mbisonono aŋ, maa AGWANGWAMA hiɛŋ, N zhɛ ma pana ejeshi atwa Babulon ụshɛpwụ ga maa e leshiji uŋ.

⁴Nazhɛ ehiu ata zhe no ofwo agwuma, ɛɛ hiɛŋ bụ, I shɛ tilɛɛ maa ga a kwụnɛ bụtụ ga. N-ndumwa mu na baa duma mo lwogwocongo asaza na zweni nụ ụshɛpwụ ga, gabata du kaa baa ndaanana iŋ no ofwo bụtụ be elele na ta vwɛ nụ ụshɛpwụ ga. Bi mekeni shi gana na maa mbiyono atwa ga o; semi iyi iwɛ kiri baa jala maa bu na nda aŋ.

⁵Nazhɛ agwuma gɛ Zɛdɛkia jishijɛ, bɛɛ hiɛŋ, Iwɛ-tɛkana ga, bu namɛ ni i'ɛlɛ hiŋ, asha nda bu ma gana na ihiɛ kwụlanɛ; N zha shɛ ma hi lakana o.

⁶Ee n shepi ga oo to ihwehwe ee n shiyeni nu u'ibwa meni mi yɛu ya agwuma ga Malkia na namɛ na amɛ ukpogwu umwono-ụshɛrɛya. U'ibwa ata zasa meni o, semi udwodwo kiri, Ngee iri ya nu undwodwo ata.

⁷Okwo ti yaa shɛ gana ata, aka na ti gɛ Ɛbɛd-mɛlɛk na shɛ Butiopia, na shɛ ivwɛlɛ nɛ ya nda ugondu nu umwamwa wa agwuma, hwụjɛ maa bwonu ee n shiyeni nu u'ibwa meni. Agwuma ta kaa jɛjɛ ba duma ụshɛrɛya nu umwono-ụshɛrɛya na namɛ no Odubo Bɛnjamin.

⁸Gɛ Ɛbɛd-mɛlɛk beni ni ihwɛ ya agwuma bee zhe apata, bɛɛ hiɛŋ agwuma,

⁹Agwuma mi igɛhi, iyi nɛ atwa ga njɛ teni shi cɛŋ o. Igɛtɛ ee shiyeni Jɛrɛmia bigesere ata nu u'ibwa meni, no ofwo na imunɛ zhɛ ya kwụna bụ tilɛɛ, iwɛnɛ ti iyimɛyɛ zasaba ya nụ ụshɛpwụ ga.

¹⁰Nazhɛ agwuma peni Ɛbɛd-mɛlɛk unu, bɛɛ hiɛŋ, Sugo etwenyi atatụ[70] epe maa e zhe na bụ maa hi bɛcinjɛ Jɛrɛmia bigesere ata nu u'ibwa ata tobwolo bi te 'wi shi o.

¹¹Ibɛ po gɛ Ɛbɛd-mɛlɛk suji ga atwa ata bee zhe nu umwono i'wɛŋnɛ[71] na namɛ nu umwamwa wa agwuma, bee suje tuzuzu boo to tu ni ihwehwe ɛtɛ bee zucinje tu pi mi ni ihwehwe ɛtɛ.

¹²Gɛ Ɛbɛd-mɛlɛk, Butiopia ata n hiɛŋ, Ruwanɛ tuzuzu ta ata na apalatụ bụ, iwɛ maa kede ihwehwe ɛtɛ ibu bwụranjɛ o. Ngaa njɛ ga gana ata,

¹³Ɛɛ m mbɛ, ɛɛ m bɛcinjɛ nu u'ibwa ata. Na aba ibɛ nazhɛ ee n shiyeni ya na amɛ ukpogwu umwono-ụshɛrɛya.

¹⁴Na aka anya u tukpororo nazhɛ agwuma gɛ Zɛdɛkia tumwanɛ maa a n shapɛ pu bwa no ofwo odubo atatụ Umwono wa AGWANGWAMA. Bɛɛ hiɛŋ, N zhɛ mo bu hoŋtono iheŋtene ike, ma jala kaa maa m mbishi iwɛ-tɛkana hwɛɛ.

¹⁵Ngɛɛ jishijɛ bụ, Ngɛɛ hiɛŋ, Yaa shɛ Ngee bi mbishi hwayɛ iwɛ-tɛkana, bi zha shɛ bu ma n kwụna hŋ? Okwo Ngee bi peni kaa ahaŋsa, bi zha shɛ ba shɛlaga kwukwuŋ.

¹⁶Nazhɛ agwuma gɛ Zɛdɛkia n shileni-unu ne tusweci, bɛɛ hiɛŋ, N to AGWANGWAMA na njɛ shihwulu shi tu, na ti peni du uraiŋ, maa N zha shɛ ma bụ kwụna o, kwo kaa maa ma bụ pana atwa na a jala maa a bu kwụnɛ o.

¹⁷Nazhɛ Ngee mbishi Zɛdɛkia maa AGWANGWAMA na Hwuri Kpaaŋ, na shɛ Agwatana Isrɛl, hiɛŋ, Yaa shɛ ebi meme gengeni ehiu atwa Babulon, asha uraiŋ bụ zhɛ wo bino, a zha shɛ kaa du o hwoŋzhingo ya ụshɛpwụ ga o. Asha tu gabụ ta atwa umwamwa bụ hi zhɛ hio bino hwɛɛ.

¹⁸Ama yaa shɛ ebi meme gengeni shi aŋ, asha ɛ zhɛ a pana atwa Babulon ụshɛpwụ ga, ɛɛ zhɛ kaa o hwoŋzhingo uŋ, tụ gabụ kaa bi zha shɛ ba banangana aŋ kwukwuŋ.

¹⁹Ama agwuma jishijɛ bụ, bɛɛ hiɛŋ, Ma nda inyɛsɛ ya atwa u'una tu, a na ti genji e zhe no ofwo atwa Babulon. Nekeshi ɛ zhɛ mo n shiyono ni i'ɛlɛ ya aba maa a n njɛ umungwuta.

²⁰Gɛ Jɛrɛmia hiɛŋ bụ, A zha shɛ mo bu shiyono ni i'ɛlɛ ya aba o. Ma bụ lụpa maa hwụjɛ-unu utumwa ga wa AGWANGWAMA; nazhɛ iyi elele zhɛ ma bụ zhɛmana, nazhɛ uraiŋ bụ zhɛ wo bino.

²¹Ama yaa shɛ abu lacɛ maa meme gengeni aŋ, asha iyi nɛ AGWANGWAMA m mbiseni no ozobu na:

²²N kwụbɛ te e suji eyikwo elele na vwɛ nu umwono wa agwuma Juda ee zhe no ofwo ehiu agwuma Babulon. Shɛlaga iyi nɛ aa duma tɛ ɛ zhɛ: ɛ hiɛŋ, Eyejilo ebiye agwuma a inzhɛnjɛ bụ, aba o shilono bu iwɛ. Ibɛ po ɛvwɛvwɛjɛ ubwa iri ya nu udwodwo hwuwayɛ, eyejilo ata ubwa kaa genji bu ya.

²³Nazhɛ Ngee keeni, Ngɛɛ hiɛŋ, Ɛ zhɛ o sugo eyikwo bu hwɛɛ, ta miaụŋ mụ bụ me eyi a pana atwa Babulon, gabụ ni ikɛnyi bu bi zha shɛ kaa ba banangana aŋ o. Agwuma Babulon kaa zhɛ mo bu shiyono nu umwono-tishi, ɛ zhɛ kaa o hwoŋzhingo ụshɛpwụ ga kwunduu.

²⁴Nazhɛ gɛ Zɛdɛkia jishijɛ, bɛɛ hiɛŋ, To lono maa bụtụ be elele mepi ushaura ga tu o, bi zha shɛ kaa du bo 'wo.

²⁵Yaa shɛ ehiu hwụjɛ maa N dumanjɛ n-ndumwa na bụ, ɛ zhɛ a zhajɛ maa e bi heŋteni iwɛ nɛ atɛ jɛmɛ. Ɛ zhɛ mo bu shilono-unu maa a zha shɛ ma bu kwụna o, ti yaa shɛ ebi mbishi aŋ iyi elele hwɛɛ.

²⁶Mbiso aŋ kwakwa maa, N lụpɛ agwuma maa kede mo n gwuricingo nu umwono-tishi Jonatan maa mo 'wo apata o.

²⁷Nazhɛ ehiu ata kpaaŋ aba zhajɛ ga pi mi, ee n heŋteni, Ngee mbishi aŋ ijebe agwuma ge me mbishi gom gom maa ma duma. I zasa inyɛ iyi elele nɛ e eri a nda ya o, iwɛnɛ ti yaa zasa bụtụ be elele na hwụjɛ ushaura ata.

²⁸Nazhɛ aa n untanganɛ nu ukpogwu ata umwono-ụshɛrɛya uuwa i ci aka na te e leshiji Jɛrusalɛm.