Read bassa JƐRƐMIA 39 Bible Online

JƐRƐMIA 39 - bassa bible

JƐRƐMIA 39

¹Ti gɛ Zɛdɛkia yɛ tugwama tu Juda, yaa namɛ shiywa shi cinjishi ni ipiɛnɛ umpwa, nazhɛ agwuma Babulon gɛ Nɛbukadnɛza zhajɛ ne ejeshi ubwa hwɛ hwɛɛ, ee tefuleji Jɛrusalɛm.

²Ti gɛ Zɛdɛkia yɛ tugwama ta ata yaa namɛ shiywa umpwa-nu-boo-ko ni ipiɛnɛ ineshi ni ijitɛ icinjishi, ee hwuŋzhi uba ụshɛpwụ ata.

³Aka na te e leshiji Jɛrusalɛm, nazhɛ ehiu a'wụtụ a'wụtụ agwuma Babulon, a na hwuri anjɛ-ugondu avwɛ hwɛɛ nụ ụjɛrụma zhajɛ, aa gɛgajɛ na ashashɛ odubo, aba shɛ gɛ Nɛgal-sarɛzɛ, na Samga-nibo, na Sasɛcim, na shɛ Burabsaris keeni Nɛgal-sarɛzɛ unya, na shɛ Burabmag.

⁴Aka na ta agwuma gɛ Zɛdɛkia na asaza ubwa kpaaŋ kwụbɛ aŋ, ee mekeni maa e gezhiji e beni nụ ụshɛpwụ ata nụ ụjita. Ee beni, ee duri uhwaŋna itimɛ ya agwuma, ee duri uhwaŋna ata namɛ na ashashɛ aba eyebi, ee gezhiji ee zhe geri ba Araba.

⁵Ama ejeshi Babulon urigeni aŋ nu usumwa, ee jiteni Zɛdɛkia nụ ụdadarɛ Jɛriko, aa 'imɛ bụ, ee shepi bu no ofwo Nɛbukadnɛza agwuma Babulon ni Ribla no ogwungwu cɛnjɛ tu Hamat, apata gɛ Nɛbukadnɛza jɛmɛ ụshɛrɛya ubwa baa kwunanjɛ.

⁶Ni Ribla ata ibɛ agwuma Babulon kwụnɛ miaụŋ-me-eyi mu Zɛdɛkia ne eshe ubwa, baa kwụnɛ du atwa elele na 'yajɛ ụjɛrụma nu Juda hwɛɛ.

⁷Na aba ibɛ bee hwuceci eshe Zɛdɛkia, boo to bu ashɛnjɛ, ee shepi bu ee zhe Babulon.

⁸Na aka ata, nazhɛ atwa Babulon hwoŋzhinji umwono wa agwuma keeni shimwono sha atwamwa, nazhɛ ee hwuŋzetenji uba Jɛrusalɛm.

⁹Nu ukwunanga ibɛ, gɛ Nɛbuzaradan na shɛ uhiu wa angbaracɛ, suji atwa na ga ta vwɛ nụ ụshɛpwụ ata bee kepi aŋ nu umwono-tishi nu Babulon, medenji atwa na genji la Juda du a na 'wa bụ.

¹⁰Na aka ata gɛ Nɛbukadnɛza genji atwa oko a na shɛ okofwo a na zasa kaa iyi elele na cɛnjɛ tu Juda, bee peni aŋ ntuma ma shifwafwa keeni shihilo.

¹¹Ama gɛ Nɛbukadnɛza agwuma Babulon peni Nɛbuzaradan na shɛ uhiu wa angbaracɛ unu iwɛ Jɛrɛmia, bɛɛ hiɛŋ bụ,

¹²Shapa Jɛrɛmia maa 'imɛ bụ u'ala tebiye. Ta nda bụ iyi iwɛ o, ama na ndana bụ iyi elele nɛ baa bụ lụpɛ.

¹³Iwɛbɛ po gɛ Nɛbuzaradan, te ehiu a na shɛ: gɛ Nɛbushazban na shɛ Burasaris keeni Nɛgal-sarɛzɛ medenji ehiu avwɛ a na shɛ anjɛ-ugondu wa agwuma Babulon hwɛɛ,

¹⁴ɛɛ m bɛcinjɛ nu ukpogwu ata umwono-ụshɛrɛya. Ee n uteji ni i'ɛlɛ Gɛdalia yɛu Ahikam bụjalụ Shafan, a na zhɛ ma ngbaraka maa mo to ihwɛ lapiya. Gabata Ngaa jɛjɛ ya na ashashɛ atwa ata.

¹⁵Aka na tu Ngaa ta namɛ nu umwono-tishi nu ukpogwu umwono ata ụshɛrɛya, ibɛ AGWANGWAMA m mbishi n-ndumwa mu bwa, bɛɛ hiɛŋ,

¹⁶Zhaga mbiso Ɛbɛd-mɛlɛk Butiopia ata maa, AGWANGWAMA na Hwuri Kpaaŋ, na shɛ Agwatana Isrɛl hiɛŋ, N zhɛ ma nda gana na tu Ngaa jɛmɛ gom, N zhɛ mo iricingo ụshɛpwụ ga, shɛ tɛzhɛmana yɛɛ zhɛ ya zhɛmana aŋ o. Ama aka na ti ijɛ zhɛ ya nda, bi zhɛ ba nama apata, ɛbi zhɛ ba kwụba iŋ.

¹⁷Ama Gamba AGWANGWAMA, N zhɛ tuba ma bu jilanɛ, a zha shɛ mo bu shiyono ni i'ɛlɛ ya atwa ata aba nda inyɛsɛ ya aba o.

¹⁸N zhɛ mo bu bicingo tilɛɛ, a zha shɛ kaa ma bụ kwụna o. Uraiŋ bụ zhɛ wa banangana iwɛnɛ a bu m patanɛ-rishe. Gamba AGWANGWAMA, N dumwa.