Read bassa JƐRƐMIA 43 Bible Online

JƐRƐMIA 43 - bassa bible

JƐRƐMIA 43

¹Aka na ti Ngee hwuwi n-ndumwa me elele mu na AGWANGWAMA na shɛ Agwatana atwa ata n tumwanɛ maa mo mbiso aŋ tụdụma kpaaŋ.

²Nazhɛ ga Azaria yɛu Hoshia keeni Johanan yɛu Karia keeni atwa abwagara hwɛɛ, n hiɛŋ, Ụzagwụ ebu jwe. AGWANGWAMA na shɛ Agwatana tu ubu tumwanɛ shɛ maa mɛ ti hiɛŋ, Ta zhaga ma Ijipti maa hi nama o.

³Ga Baruk yɛu Nɛria ubwa ubu ishicinjɛ maa utu sukakanɛ, iwɛ maa atwa Babulon e ti teni u'ala maa a tụ kwụnɛ kwo kaa maa e tu suji nu Babulon.

⁴Ibɛ po yaa zasa bụtụ be elele na hwụjɛ-unu wa AGWANGWAMA maa a gɛga na cɛnjɛ tu Juda, tu go Johanan, te eberezhe ejeshi keeni atwa ata hwɛɛ.

⁵Nazhɛ go Johanan yɛu Karia keeni eberezhe ejeshi kpaaŋ suji atwa elele na ga vwɛ nu Juda ee hwuri ni Ijipti, medenji atwa elele na ga garatagwụ la no ofwo edenji anya a na ge gwuleji.

⁶E suji atwa elele te etwenyi, te eyikwo, ta miaụŋ-me-eyi keeni miaụŋ-mo-o ma agwuma, a na gɛ Nɛbuzaradan na shɛ bungbaracɛ be ehiu atwa ge utegeni la Gɛdalia yɛu Ahikam, na shɛ bụjalụ Shafan, ti ga Baruk yɛu Nɛria tu Gamba du na n shɛ bigesere.

⁷A hwụjɛ shɛ unu na AGWANGWAMA peni aŋ o, ibɛ po ee hwuri ni Ijipti tutu ụshɛpwụ ata ụ'wụtụ ɛɛ hiɛŋ izeci ubwa Tapanhis.

⁸Nazhɛ AGWANGWAMA m mbishi n-ndumwa mu bwa nu Tapanhis ata, bɛɛ hiɛŋ,

⁹Sugo atayɛ oko a'wụtụ maa ni aŋ na cɛnjɛ no ofwo idwɛtwɛ[75] yo odubo ata oo tono nu umwamwa ihwɛ Faro nụ ụshɛpwụ ga, lono maa atwa Isrɛl oko kwụbɛ ta aba nda iŋ.

¹⁰Nazhɛ mbiso aŋ maa, Gamba AGWANGWAMA na Hwuri Kpaaŋ na shɛ Agwatana Isrɛl hiɛŋ, N zhɛ ma shapɛ yɛu mi ugondu gɛ Nɛbukadnɛza agwuma Babulon no ofwo ga, maa u patana[76] idwɛtwɛ ibwɛ na atayɛ ga ebi ni epe, nazhɛ bɛɛ zhɛ ba barɛshɛga umwono tugwuno wa agwuma na azuba aba.

¹¹Gɛ Nɛbukadnɛza zhɛ ba zhajɛ ba lasụ atwa Ijipti. Atwa na ụngwụ ụwɛ shɛ wa kwụna, ɛ zhɛ o 'wo nụ ụngwụ ụwɛ, atwa na kaa shɛ aa ima, ɛ zhɛ a ima aŋ maa e kepi aŋ nu umwono-tishi, atwa na kaa ujasa shɛ wa kwụna, ɛ zhɛ o 'wo nu ujasa.

¹²N zhɛ kaa ma sapa nsumo ma tuwa ti Ijipti ulwa.[77] Nazhɛ agwuma ata Babulon zhɛ bo hwoŋzhingo tuwa ta ata ta aba kwo kaa maa sugo tu. Gana na ta bi'iywa-ba-agwụdụ ba bwaga akwarukwata no tugwuno tu bwa hwɛɛ, gabata du agwuma Babulon zhɛ ba lasụ cɛnjɛ ti Ijipti maa lasatagwụ tụ hwɛ hwɛɛ, maa hwulo kwakwa na amɛ-olom.

¹³Bi zhɛ ba bwarataga atukpa ata tijilo oo mo na atayɛ agata namɛ no ofwo ụsụbwa ata uwaŋna, na namɛ ni Ijipti, bi zhɛ kaa bo hwoŋzhingo nsumo mu tuwa ta atwa Ijipti.