Read bassa JƐRƐMIA 50 Bible Online

JƐRƐMIA 50 - bassa bible

JƐRƐMIA 50

¹N-ndumwa mu na AGWANGWAMA m mbishi Gamba bigesere gɛ Jɛrɛmia iwɛ Babulon keeni iwɛ atwa na zweni nu bwa na, bi hiɛŋ,

²Mbiso ma edenji unabarɛ ga! Ananga uŋ ma! Shikicingo ma igɛrigɛ maa hi enenji unabarɛ ata! Ta swaka uŋ ma o! Babulon loyo! O bworotogwo tuwa tu bwa tu na ɛɛ hiɛŋ Maduk! Ezuye shɛwa tuwa tu Babulon, a kwuswatwagwa ntatanuwaŋ ma ata mu bwa mi inyizhi![98]

³Udenji uko banɛ tuzuba wee tefwuleji Babulon, waa njɛ uŋ ụshɛka. Ta atwa, ti isundɛ gezhiji ee beni apata, i zasa bụtụ be elele namba ya na amɛ ubwa o.

⁴Nazhɛ AGWANGWAMA hiɛŋ, Aka na aka ata ci hwuŋ, ta atwa Isrɛl, ta atwa Juda hwɛɛ, ɛ zhɛ a zhajɛ nu u'wo-tutwa maa e n dwelekeci, Gamba Agwatana aba na.

⁵Ɛ zhɛ o hoŋtono iwɛ uhwaŋna na zhɛ Zayon, nazhɛ ɛɛ zhɛ a pana eshe aba geri bwa. Ɛ zhɛ a twa-unu unyizo-nom ne mi,[99] a zha shɛ kaa a bwada uŋ ya kwukwuŋ.

⁶Atwa mi shɛ gana agwụdụ na bi'iywa ba aba genji maa a 'inɛ nu nshama. O rungo bamm, aa zalanga nu nshama keeni tikpekwu, isɛbwɛ 'wi aŋ geri na ihwɛ ya aba namɛ.

⁷Atwa elele na to aŋ ugbe, a ya aŋ. Atwa i'ime ya aba hiɛŋ, A nduwa AGWANGWAMA na ga shɛ ofwo aba tuzwono u tugom iwɛwɛ, ubwa shɛ AGWANGWAMA na eshi aba ga ngbaracɛ, iwɛbɛ po atu zasa tụwụma ti iyi nɛ ata nda aŋ ya.

⁸Ahiɛba atwa Isrɛl, gozhigo ma maa hi beni nu Babulon! Ganga ma cɛnjɛ ta atwa Babulon! Ga shɛ ahiɛba hi beni hiiŋ gana epi na a 'yagaga agwụdụ!

⁹N zhɛ mɛ ishicinjɛ edenji na 'yajɛ ikɛnyi tuzuba ma nda aŋ maa e tefwuleji Babulon. Ɛ zhɛ a kalana u'una ata bụkpagwụ bu ujasa maa a lasụ uŋ. A shɛ ajala na shɛ egwoni a'inla tukala, a na 'wanjɛ shɛ iyi kwukwuŋ.

¹⁰Ɛ zhɛ o sugo Babulon gana ufwa ujasa, atwa na kaa suji uŋ ɛ zhɛ a 'yaga iyi elele nɛ aa jala. Gamba AGWANGWAMA, N dumwa.

¹¹AGWANGWAMA hiɛŋ, Ahiɛba atwa Babulon, hi suji la i'wɛŋnɛ udenji mu. Amɛ hiŋ lemi na aka ata, ahia nda kaa unyasa, ahia gala gana buna na bo rukoto ohiu kwo kaa gana budakwa na ba ugaga,

¹²ama e zucinje ụshɛpwụ ata bụ ụ'wụtụ, ụpụrụsa kaa 'imɛ uŋ. Babulon zhɛ wa sha udenji na 'nyanɛ nu una u tandụ we elele hwɛɛ. U zhɛ wa sha ụshɛka na hweteni, na zasa meni.

¹³I zasa bụtụ be elele zhɛ ba nama ya nu Babulon. U zhɛ wo hwuŋzwotongwu hwɛɛ, maa atwa elele na a kashɛka no zhingoto ohiuhiu aba, iwɛ tudama tu na yaa dama aŋ, iwɛnɛ Ama nda isɛbwɛ nu bwa.

¹⁴Ahiɛba ekeri a'inla, kala ma bụkpagwụ bu ujasa hi rungwutwonu Babulon maa hi tefwuleji uŋ. Ta ma Babulon a'inla hiŋ hwɛɛ, ta waŋpana aŋ ma o, iwɛnɛ tu waa n njɛ iwɛwɛ, Gamba na n shɛ AGWANGWAMA.

¹⁵Kalana ma ụshɛpwụ ata n'ungwa mu ujasa tutu rungwutwonu uŋ! Hwuwayɛ go Babulon tulwonuo ya i'wɛŋnɛ. Uba ubwa hwuzwotongwowo, waa 'waŋwaŋ na cɛnjɛ hwɛɛ. Gamba ma nda itɛpwɛ mi na atwa Babulon. Iwɛ ecilo ata nda ma du itɛpwɛ hiŋ na aba, nda aŋ ma gana na ta a njɛ atwa vwɛ du.

¹⁶To lono ma maa a bɛrɛ ya izɛgwu nu u'una ata o, kwo kaa maa e jwe iyimɛyɛ apata o. Agaiŋ elele na ga namɛ apata zhɛ a nda inyɛsɛ ye ejeshi na tefwuleji aŋ, ɛɛ zhɛ e jiyo nu nhwaŋ ma aba.

¹⁷AGWANGWAMA hiɛŋ, Atwa Isrɛl shɛ gana agwụdụ na izeci unzhi; ee gereteji. Bụtụ bi hiiŋ na tefwuleji aŋ, ubwa shɛ agwuma Asiria, bụtụ bu umɛwɛɛ na bwereteji o'umpwo aba ɛ shɛ gɛ Nɛbukadnɛza agwuma Babulon.

¹⁸Iwɛ inɛ ɛtɛ, Gamba na n shɛ AGWANGWAMA, na Hwuri Kpaaŋ na shɛ Agwatana Isrɛl, N zhɛ ma pana Nɛbukadnɛza agwuma ata ulwapɛ keeni u'una ubwa, gana na ti Ngee peni du agwuma Asiria gbaa.

¹⁹N zhɛ mo gwuricingo atwa Isrɛl na cɛnjɛ ta aba. Nazhɛ ɛɛ zhɛ a ya iyimɛyɛ nɛ unshɛ ni Ishɛmɛ Kamɛl keeni geri bu Bashan. Ɛ zhɛ du a ya iyi elele nɛ aa jala ni iyimɛyɛ nɛ aa bɛrɛ no tugwungwu ti Ifrem keeni Giliad.

²⁰Aka na aka ata ci hwuŋ, iwɛwɛ zha shɛ ya nama ya ni Isrɛl, tugworozwo kaa ti zha shɛ ta nama ya du nu Juda o, iwɛnɛ ti Ngɛɛ zhɛ ma gangana atwa ata Ngee genji maa avwɛ apata iwɛwɛ ya aba. Gamba AGWANGWAMA, N dumwa.

²¹AGWANGWAMA hiɛŋ, Tafwulaga ma atwa Mɛrat,[100] ta atwa na jɛjɛ ni Pikod.[101] Kwụna aŋ ma maa hi iricinji aŋ ma hwɛɛ. Nda ma iyi nɛ Ngee hi peni-unu ibɛ. Gamba AGWANGWAMA, N dumwa.

²²A hwugwa rundu ru ujasa na cɛnjɛ ta ata, keeni ti'iricingo tụ 'wụtụ 'wụtụ.

²³Babulon bwereteji unyizo hwɛɛ rukwu rukwu nụ ụshamụ, ụshamụ ata kaa du bwaratagwụ! Edenji elele o zhingoto ohiuhiu aba iwɛnɛ iyi teneni u'una ata.

²⁴A-Babulon, bu n kepengeni ni ifelu, ama ugwuru na Ngee bi biteni kaa ubu 'imɛ, okwo ti yaa shɛ bwonu bi mepi shi iŋ kaa.

²⁵N kopishingwo umwono na i'wɛŋnɛ mi ujasa tileni, Ngɛɛ bɛcinjɛ iŋ ni isɛbwɛ mi. Iwɛnɛ po Gamba na n shɛ AGWANGWAMA na shɛ Agwatana na Hwuri Kpaaŋ, N 'yajɛ ugondu tɛnda nu Babulon.

²⁶Tafwulaga uŋ ma geri geri, maa hi bwereteji uŋ, maa hi kepishinji ofwo na shihiu sha aba shi sutengeni! Ta ma itulu ni i'wɛŋnɛ nɛ ehi sweji[102] nu ujasa gana budakwa bo ohiu! Iricingo ma u'una ata, ta waŋpana ma iyi elele kwukwuŋ!

²⁷Kwụna ma asaza aba hwɛɛ! Iricingo ma unyama wa aba hwɛɛ! Ga atwa Babulon njɛ adangboo! Aka na maa e peni aŋ ulwapɛ i ci ya!

²⁸(Atwa na beni nu Babulon a na gezhiji maa a swaka nu Jɛrusalɛm, a duma gana na ta AGWANGWAMA a nda itɛpwɛ iwɛ iyi nɛ atwa Babulon njɛ la Umwono ubwa.)

²⁹Mbiso ma atwa na 'waŋnɛ itɛ maa ge tefwuleji Babulon. Tumwana ma atwa elele na 'yebi a'inla tukala nu uta. Hwala ma ụshɛpwụ ata hi rungwutwonu. To lono ma maa bụtụ be elele benengeni o. Tụpana aŋ ma iyi elele nɛ a njɛ la, nda aŋ ma du gana na ta a njɛ la anya atwa, iwɛnɛ te e meme seci pi mi, Gamba Bụtụ bi Tijilo bi Isrɛl.

³⁰Iwɛbɛ po ɛɛ zhɛ a kwụna esemberi aba ni ihwɛŋnɛ ụshɛpwụ, maa e iricinji asaza aba hwɛɛ jita ata. Gamba AGWANGWAMA, N dumwa.

³¹Gabụ ga Babulon, bi shiji na tumama sata, iwɛbɛ po Gamba AGWANGWAMA na shɛ Agwatana na Hwuri Kpaaŋ Ama bu sukakana! Aka ci ya maa ma bụ pana ulwapɛ.

³²Unyangana na udenji bu wa nda zhɛ wa twa udukwutwa maa u leyi, i zasa kaa bụtụ zhɛ mɛ bi ishicinjɛ. N zhɛ ma bụ sapa ulwa, iyi elele nɛ kaa ibu rungwutwonu zhɛ ye ilono hwɛɛ.

³³AGWANGWAMA na Hwuri Kpaaŋ hiɛŋ, A njɛ atwa Isrɛl keeni atwa Juda umungwuta. Atwa elele na kaa 'imɛ aŋ a untanganɛ aŋ dimi dimi, e leneni shi aŋ maa e hwuri o.

³⁴Ama tuba bụtụ na zhɛ be gwube aŋ 'yajɛ ikɛnyi, ɛ hiɛŋ izeci ibwɛ, AGWANGWAMA na Hwuri Kpaaŋ. Ubwa zhɛ ba nda orogwu iwɛ aba ni ikɛnyi ibwɛ, maa pana cɛnjɛ tu unyizo amɛ-olom, ama amɛ-tụhaŋtụ tuba bɛ zhɛ ba pana atwa na jɛjɛ nu Babulon.

³⁵AGWANGWAMA hiɛŋ, Go tu'wo ti zhegeni Babulon! Go tu'wo ti zhegeni du atwa ubwa, ge ti zhegeni du ehiu na untanganɛ uŋ, ge ti zhegeni ta atwa ubwa na intanjɛ.

³⁶Go tu'wo ta ata ti zhegeni egesere ubwa tukata, iwɛnɛ ta a lagwụmanjɛ! Go tu'wo ta ata ti zhegeni asaza ubwa, go ohwulu horukono aŋ!

³⁷Iricingo ma idɛkwɛ keeni ihɛŋtu ujasa ubwa hwɛɛ! Go tu'wo ti zhegeni asaza na aa njɛ ụgwụ iwɛnɛ te e lwegeji duwa! Iricingo ma uduciya ubwa; maa hi suji i'wɛŋnɛ ya aba hiɛ yɛ.

³⁸Karɛ ubata na cɛnjɛ ta ata, maa hwuŋcɛnjɛ erefu ubwa. Tuwa tu hwuleji na cɛnjɛ tu Babulon, tuba tɛ njɛ atwa ata shɛlagwụ.

³⁹Ama iyi nɛ zhɛ na nama ya nu Babulon i shɛ isundɛ nɛ namɛ nu ụshɛka keeni aka, keeni shanụnụ shɛ na shɛ hashɛganụ. Atwamwa zha shɛ a nama ya apata kwukwuŋ tutu awaŋnɛ na te e ci.

⁴⁰Iyi nɛ teneni la Sụdụm keeni Gụmụra, ibɛ du zhɛ ye teneni Babulon gbaa, na aka na ti Ngee iricinji aŋ keeni ashɛpwụ na gwumwongonu na aba. Za bụtụ be elele zhɛ ba nama ya apata kwukwuŋ. Gamba AGWANGWAMA, N dumwa.

⁴¹Atwa na banɛ nu u'una na dụlụmɛ tuzuba a shɛ udenji na 'yajɛ ikɛnyi; shɛgwuma shɛ na shi gembi ufwugwo shi mama imanga ba iwɛ ujasa.

⁴²A 'waŋnɛ ba itɛ keeni otokwobi aba; a 'yajɛ shimiaụŋ, a zasa inyɛmɛnyɛmɛ o. Rundu ra aba ta a suka idɛkwɛ ya aba, rɛ shɛ gana itekwu nɛ ye ngwulo. A mama 'imɛ maa abu sukanɛ nu ujasa gabụ ga Babulon.

⁴³Aka na ta agwuma Babulon hwụjɛ unabarɛ wa aba, ibɛ po i'ɛlɛ ibwɛ 'wegeni. Tiriri tɛ 'imɛ bụ gana biyikwo na ụngwụ tumata to.

⁴⁴Gana na te bizeci ba banɛ na tụ'wụ tu na ti inshi nụ ụpalanụ Jodan, maa mungo na cɛnjɛ tu na ambɛ olom tiyaga namɛ, gobwonu du Ngɛɛ zhɛ ma zhajɛ Gamba AGWANGWAMA maa ma nda atwa Babulon maa e gezhiji eshigiri maa e beni nụ ụshɛpwụ wa aba. Na aka ata nazhɛ bi'yagajɛ na Ngee teri zhɛ ba untangana udenji ata. Gaaba shɛ gana mii? Gaaba zhɛ ba kara maa ma sapa-unuu? Agwuma naa zhɛ ba ala maa ma sukakanaa?

⁴⁵Iwɛ ecilo ata shɛlaga iyi nɛ Ama imangana Babulon keeni iyi nɛ Ngee heŋshi maa ma nda atwa ubwa. Okwo yaa shɛ miaụŋ ma aba, ɛ zhɛ o kokwulo aŋ, uriri kaa zhɛ wa ima bụtụ be elele.

⁴⁶Aka na tu Babulon 'waŋtatangwụ, cɛnjɛ tu unyizo ti zhɛ ta nda bulama na tɛlashajɛ to rundu ru bwa, edenji kaa zhɛ a hwuga n'ungwa mi inyɛsɛ ya aba.