Read bassa JƐRƐMIA 51 Bible Online

JƐRƐMIA 51 - bassa bible

JƐRƐMIA 51

¹AGWANGWAMA hiɛŋ, N zhɛ ma tumwananɛ Babulon uvwugo na zhɛ wo iricingo[103] uŋ keeni atwa na jɛjɛ nu bwa.

²N zhɛ ma tumwana agaiŋ maa e iricinji Babulon gana na tu uvwugo wo sugo arɛya ohiu. Aka na tụ ụjita ata ti'iricingo u ci hwuŋ, nazhɛ atwa na zhɛ a tafwulaga aŋ zhɛ a banɛ geri geri, cɛnjɛ ta ata ti zhɛ to tulono ngbalaa.

³Ta pana asaza aba aka maa e keri a'inla aba, kwo kaa maa o urugono i'wɛŋnɛ ya aba ujasa o. Ta waŋpana ma esemberi aba o! Iricingo ma ejeshi aba hwɛɛ!

⁴Ɛ zhɛ a gwụcanga aŋ, ɛɛ zhɛ kaa o 'wo ni ihwɛŋnɛ ụshɛpwụ wa aba.

⁵Gamba AGWANGWAMA na shɛ Agwatana ata na Hwuri Kpaaŋ, N jineci shi atwa Isrɛl keeni atwa Juda o, okwo ta n njɛ iwɛwɛ, Gamba na n shɛ Bụtụ bi Tijilo bi Isrɛl.

⁶Gozhigo ma maa hi beni nu Babulon! Gozhigo ma iwɛ ohiuhiu hiŋ! Kede a hiɛ kwụnɛ iwɛ iwɛwɛ ya atwa Babulon. Aka mi ci ya maa ma nda itɛpwɛ maa ma pana aŋ ulwapɛ unaa na ụ shɛ una aba.

⁷Babulon shɛwa la gana ukwopi wa azhɛnarɛya nu u'ala mu, baa njɛ maa ga mayaga mu bwa mɛ ngbɛ unyizo hwɛ hwɛɛ. Edenji swe mayaga mu bwa ma ngba aŋ e meme mepi shi ya o.

⁸Babulon leyegeji eshigiri wee ileni! Ta ma ụkwụla iwɛ ubwa! Jalakanɛ ma andala ubwa unibi, nekeshi o 'wo.

⁹Agaiŋ na namɛ apata hiɛŋ, Ti mekeni maa to mbiyono Babulon, ama aka keshici ya. Mizha ti genji aŋ ma ya maa ti ji ma na a'una tu. Agwatana ubwa peni Babulon ulwapɛ nu ukpahiŋ ubwa hwɛɛ, bee iricinji uŋ hwɛ hwɛɛ.

¹⁰Nazhɛ AGWANGWAMA hiɛŋ, Ahiɛba atwa mi, ugana ma taawụụ, maa AGWANGWAMA mbiswonuo maa atuba ti teni cɛŋ. Mizha ti zhe ma maa ti mbishi ma atwa Jɛrusalɛm ugondu na AGWANGWAMA na shɛ Agwatana tu njɛ.

¹¹AGWANGWAMA ishicinjɛ shɛgwuma shi Mɛdɛs iwɛnɛ ti bee heŋshi maa bi zhɛ be iricingo Babulon. Gana bɛɛ zhɛ ba nda itɛpwɛ iwɛ ti'iricingo tu Umwono ubwa ta. Ahiɛba angbaracɛ ehiu, a na ɛɛ zhɛ a tafwulaga, Dwa ma a'inla hiŋ, imanga ma shabula shi hiŋ shu ujasa karuko!

¹²Shikicingo ma igɛrigɛ maa hi tefwuleji uba Babulon. Ta ma angbaracɛ ikɛnyi! Shikicingo ma angbaracɛ! Tulogono ma atwa na zhɛ o gwubogogo ne tusweci! AGWANGWAMA nduwa iyi nɛ bɛɛ hiɛŋ bi zhɛ ba nda atwa Babulon.

¹³Oo ahiɛba na hiɛ jɛjɛ na apalanụ erefu na gembi ufwugwo keeni aduciya ufwugwo, ama ukwunanga hiŋ ci ya, uhwohwo bizhe uraiŋ hiŋ dwawa ya.

¹⁴AGWANGWAMA na Hwuri Kpaaŋ momo to ni ikɛnyi ibwɛ, bɛɛ hiɛŋ, N zhɛ me suje etwenyi ufwugwo maa e tefwuleji Babulon gana ovworo na sukwurukwo, ɛ zhɛ a kala n'ungwa iwɛnɛ ta a lasụ bụ.

¹⁵AGWANGWAMA ubwa njɛ cɛnjɛ tu unyizo nu ukpahiŋ ubwa; na ti'inta tu bwa kaa baa karɛ unyizo, ne ti'eshicigo tu bwa kaa bee berishiji tụla.

¹⁶Nu unu ubwa tụpana ibɛ po meni mu na mu namɛ na azuba tụla mo ngwulo; ubwa kaa ishicinjɛ uzhikwozhikwo ne ece cɛnjɛ tu unyizo. Ubwa ba nda maa ɛbɛrɛ na baga tụla na aka na eshilo o ngbo; ubwa kaa tumwanɛ uvwugo na banɛ nu umwono ubwa i'wɛŋnɛ.

¹⁷Iwɛ inɛ gɛ ibɛ po atwa incɛ shɛ, aa zasa kaa shihaŋsa o; ezuye shɛ alụma na a nda tuwa, iwɛnɛ tu ntatanuwaŋ ma ata aa njɛ mɛ shɛ iyi tukata maa hwungwa sụ kaa.

¹⁸A shɛ iyi tɛgadaga, ɛ zhɛ a ngbaraka aŋ cwɛŋ; ɛ zhɛ e ilono na aka na ta AGWANGWAMA zhajɛ maa pana aŋ ulwapɛ.

¹⁹Agwatana Jekob shɛ shɛ gana aba o; iwɛnɛ ti yaa shɛ ubwa karɛ iyi elele, ubwa kaa teri atwa Isrɛl maa a shɛ atwa ubwa tugom. Ɛ hiɛŋ izeci ibwɛ AGWANGWAMA na Hwuri Kpaaŋ.

²⁰AGWANGWAMA hiɛŋ, Gabụ Babulon, gabụ bɛ shɛ ụshamụ mu, keeni i'wɛŋnɛ mi ujasa. Gabụ Ngee shepi maa ma bwarataga edenji rukwu rukwu, Gabụ Ngee shepi maa mo irocongo cɛnjɛ cɛnjɛ-ta-tugwama,

²¹na bụ Ama kwusataga idɛkwɛ keeni asụcɛ ibɛ, na bụ Ama kwusataga ihɛŋtu ujasa keeni eheŋteni ibɛ,

²²na bụ Ama kwụna etwenyi te eyikwo, na bụ Ama kwụna esemberi keeni n-nyarɛ, na bụ Ama kwụna miaụŋ-me-eyi keeni miaụŋ-mo-o,

²³na bụ Omo iricingo a'iywa-agwụdụ keeni unyama wa agwụdụ aba hwɛɛ, na bụ Ama kwụna ahwɛŋ itimɛ keeni idɛkwɛ ya aba, na bụ Ama bwarataga egwomina keeni eberezhe.

²⁴AGWANGWAMA hiɛŋ, Hi zhɛ hia kwụba ta Ama tụpana Babulon ta atwa ubwa hwɛɛ iyi elele nɛ aa njɛ la atwa Jɛrusalɛm.

²⁵Gabụ Babulon, bɛ shɛ gana ishɛmɛ nɛ ye iricingo unyizo hwɛ hwɛɛ. Ama Gamba AGWANGWAMA, N shɛ ya tuba bụtụ bụ bi i'ime. N zhɛ ma bụ untangana dimi, ma bụ nangwụcɛnga na cɛnjɛ, aka na abɛ shɛ ma'alụ hwɛɛ, nazhɛ Ngɛɛ zhɛ ma bu ganga.

²⁶I zasa utayɛ we elele na ɛɛ zhɛ ɛ bwɛ no tuhwuŋzwotongwu tụ bụ maa e shiri ukoshilo, i zasa kaa utayɛ na ɛɛ zhɛ ɛ bwɛ maa o to umwono uhiuhiu kwukwuŋ. Bi zhɛ ba sha gana ụshɛka unyizo-nom. Gamba AGWANGWAMA, N-dumwa.

²⁷Shikicingo ma igɛrigɛ maa hi tefwuleji uŋ! 'Nyamana ma utiitidi iwɛ maa edenji hwụjɛ! Imanganga ma edenji maa e tefwuleji Babulon nu ujasa! Mbiso ma cɛnjɛ cɛnjɛ-ta-tugwama ta Ararat, keeni Mini, keeni Ashkɛnaz maa e tefwuleji uŋ. Tala ma uhiu na zhɛ wo hwulo umbe na tutafwulaga ta ata. Suje ma idɛkwɛ gana unyama wo ovworo.

²⁸Imanganga ma edenji maa a sukakanɛ Babulon nu ujasa. Tumwangana ma shɛgwuma shɛ Mɛdɛs, te egwomina aba, te ehiu aba, keeni ejeshi a'una elele na namɛ nụ ụhwada wa aba.

²⁹Cɛnjɛ tu unyizo ta zhɛgɛda too zhingotu iwɛnɛ ta AGWANGWAMA a ụrɛcɛnga tuhaŋsa tu bwa maa nda Babulon osombo, ofwo na bụtụ be elele zha shɛ ba nama ya.

³⁰Asaza Babulon genji ya ifelu tutwa ee zweni ya na tukapanga ta aba. A zasa ya ohwulu tishito, a shɛ ya gana eyikwo. Akpa ụshɛpwụ ata bwaratagwụ, ulwa hwoŋzhenji shimwono shɛ bwa.

³¹Atumwa mama 'wanụ nu usumwa maa e mbishe agwuma Babulon maa o loshigwo ụshɛpwụ ubwa geri elele.

³²Atwa i'ime loshigwo ofwo ata aa ga kasha Urefu, o sopwo ikepi ibwɛ ulwa. Asaza Babulon zweni tuwiŋ-rogo.

³³I zha shɛ ye ilogogo ta atwa i'ime zhɛ o logo aŋ, ɛ zhɛ kaa o kwukwubo aŋ gana ohiu na oo dubo na akpakpata. Gamba AGWANGWAMA na Hwuri Kpaaŋ, na shɛ Agwatana Isrɛl, N dumwa.

³⁴Agwuma Babulon gɛ Nɛbukadnɛza jeji Jɛrusalɛm baa yɛ. Bee shiri ụshɛpwụ ata bohondo gana ikwɛshɛ; bee tweri uŋ gana na buduwo ba twala iyi. Bee suji iyi nɛ baa jala, baa 'wɛŋ inɛ vwɛ.

³⁵Ga atwa Zayon hiɛŋ, Ga Babulon njɛ ụbaụta iwɛ abwagara na baa tɛ njɛ! Ga atwa Jɛrusalɛm hiɛŋ, Ga Babulon njɛ ụbaụta iwɛ ụbaụta na bee ti peni!

³⁶Iwɛbɛ po du AGWANGWAMA mbishi atwa Jɛrusalɛm, bɛɛ hiɛŋ, N zhɛ ma lashɛga ụshɛrɛya hiŋ, N zhɛ ma tụpana atwa i'ime hiŋ iyi nɛ aa hiɛ njɛ. N zhɛ ma hwuŋcɛnga olugwo na meni mu Babulon mɛ zhinjɛ maa erefu aba hwɛŋ du.

³⁷U'una ata zhɛ wa sha gana obizo osombo na isundɛ ehilo kiri zhɛ ya nama. Ɛ zhɛ a sha ofwo uriri; za bụtụ be elele zhɛ ba nama apata o. Uriri kaa zhɛ wa ima atwa elele na kwụbɛ uŋ.

³⁸Atwa Babulon kpaaŋ zhɛ no ngwulo zhiaaŋ gana izeci, ɛ zhɛ nɛ hwɛ idu gana oywoywo izeci.

³⁹A nda suu tudundo ti iyimɛyɛ? N zhɛ ma ndana aŋ iyimɛyɛ unyasa maa mayaga mɛ 'imɛ aŋ. Ɛ zhɛ a laya malabụ mu na aa zha shɛ ɛ zhinjɛ ya kwukwuŋ.

⁴⁰N zhɛ mo sugo aŋ no ofwo tụkwụna gana miaụŋ-ma-agwụdụ, ne epi, keeni adagba. Gamba AGWANGWAMA, N dumwa.

⁴¹AGWANGWAMA jɛmɛ iwɛ Babulon, bɛɛ hiɛŋ, O loshigwo ụshɛpwụ ata unyizo hwɛ hwɛɛ wa dumanga! Babulon shanɛ ya edenji iyi uriri!

⁴²Itekwu bwadụ, adanga ubwa ubi Babulon.

⁴³Ashɛpwụ ubwa shɛ ya iyi uriri aa shɛ gana ụshɛka na zasa meni, ofwo na bụtụ be elele zasaba kwo kaa atwa duri shi ya na tahaŋnụ.

⁴⁴N zhɛ ma pana Beal ɛtɛ shɛ itɛtɛnuwɛŋ Babulon ulwapɛ, maa ganga ya ntatanuwaŋ ma ata bo zundo. Edenji zha shɛ a zhɛba bụ ya kwukwuŋ. Uba Babulon leyegeji.

⁴⁵Ahiɛba atwa Isrɛl, gozhigo ma hi beni apata! Gozhigo ma iwɛ ohiuhiu hiŋ maa hi benengeni isɛbwɛ mi nɛ 'yajɛ ikɛnyi.

⁴⁶Kede u'waba uhi kwuswa o, ta nda ma kaa inyɛsɛ iwɛ ɛhiɛŋ ɛhiɛŋ na ahiɛ hwụjɛ o. Ɛhiɛŋ ɛhiɛŋ zhɛ no mburusonu uywa uywa. Ibɛ shɛ ɛhiɛŋ ɛhiɛŋ abwagara na namɛ na cɛnjɛ ta ata keeni a na agwuma ata zhɛ na twa ifelu na binya.

⁴⁷Aka e ci ba ti Ngɛɛ zhɛ ma pana ntatanuwaŋ mu Babulon ulwapɛ. Ezuye zhɛ a sha u'una ata hwɛ hwɛɛ, ɛ zhɛ kaa a kwụna atwa kpaaŋ.

⁴⁸AGWANGWAMA hiɛŋ, Iyi elele nɛ namɛ na cɛnjɛ tu unyizo keeni inɛɛ nɛ namɛ na tụla zhɛ ya kala n'ungwa mu unyasa tubwada, na aka na tu Babulon 'waŋ ni i'ɛlɛ ya atwa na banɛ tuzuba maa e iricinji uŋ.

⁴⁹Babulon kwụnɛ atwa unyizo kpaaŋ, iwɛbɛ po Babulon leyi iwɛnɛ tu wa kwụnɛ la atwa Isrɛl ufwugwo.

⁵⁰AGWANGWAMA mbishi atwa ubwa iwɛ nu Babulon, bɛɛ hiɛŋ, Hi benengeni tu'wo tu utokwobi! Ta nda ma ya ti'insu o! Okwo ta ahiɛ dụlụmɛ nu nhwaŋ mi hiŋ, haŋsa ma iwɛ mi na shɛ AGWANGWAMA hiŋ, maa hi teyinje iwɛ Jɛrusalɛm.

⁵¹Hi hiɛŋ, Ezuye tɛ shɛ, ụpụrụsa kaa tɛ 'imɛ; ti ge heŋshi maa tu zasa ya iyi elele nɛ tɛ zhɛ mo tu mbiyono, iwɛnɛ ta agaiŋ loshigwo ofwo tijilo na namɛ nu Umwono wa AGWANGWAMA.

⁵²Iwɛbɛ po Ngɛɛ hiɛŋ, Aka e ci ba ti Ngɛɛ zhɛ ma pana tuwa tu Babulon ulwapɛ, n'ungwa mu tụgwụcɛnga tu tuba mi zhɛ mo rungwutwonu cɛnjɛ ta ata kpaaŋ.

⁵³Okwo yee ge cimi maa Babulon munji na tụla maa o mo ofwo ikepi nɛ 'yajɛ ikɛnyi apata, N ngɛ zhɛ ma tumwana waa atwa maa e iricinje uŋ. Gamba AGWANGWAMA, N dumwa.

⁵⁴AGWANGWAMA hiɛŋ, Shɛlaga ma rụhwụŋ ru n'ungwa mu Babulon, mu na mụ ụkwụla-tuta iwɛ ti'iricingo tu na tu namɛ na cɛnjɛ ta ata.

⁵⁵N zhɛ me iricingo Babulon, maa u nama shiruu. Ejeshi teni nu bwa ni izɛlɛgwu gana adanga na o ngwulo, ee tefwuleji uŋ no rundu ru n'ungwa.

⁵⁶A zhajɛ maa e iricinji Babulon; ee suji asaza ubwa, itɛ ya aba dwotwogonu Gamba n shɛ Agwatana na ma pana iyi iwɛ ulwapɛ, N zhɛ kaa ma nda Babulon iyi nɛ wee meme teleji.

⁵⁷N zhɛ ma nda maa mayaga mɛ 'imɛ ehiu ubwa keeni atwa ti'inta, te egwomina ubwa, te eberezhe ubwa keeni asaza ubwa. Nazhɛ ɛɛ zhɛ a 'waŋ malabụ mu na aa zha shɛ ɛ zhinjɛ ya kwukwuŋ. Gamba Agwuma, N dumwa, Gamba Agwuma na ɛɛ hiɛ izeci ibwɛ AGWANGWAMA na Hwuri Kpaaŋ na.

⁵⁸Uba ata Babulon mo'inswo mụ 'wụtụ zhɛ wa 'waŋ na cɛnjɛ, shidubo sha ashɛkpa ubwa shɛ na shi zeteji shi zhɛ sho hwoŋno. Ugondu we elele na edenji njɛ hwɛɛ ụ shɛ bohondo; bụratụ bu ulwa 'imɛ ugondu ata aa njɛ ni ikɛnyi tishana. Gamba AGWANGWAMA, na Hwuri Kpaaŋ, N dumwa.

⁵⁹Inɛ gɛ ibɛ shɛ n-ndumwa mu na gɛ Jɛrɛmia sekekeni Sɛraya, yɛu Nɛria bụjalụ Mesɛya, na shɛ bụtụ bu ko na ashashɛ ehiu, na aka na tu baa 'wa Zɛdɛkia maa e zhe Babulon tu baa yɛ tugwama tu Juda, yaa namɛ shiywa shi neshi.

⁶⁰N 'nyeci iwɛ ti'iricingo te elele tu na tɛ shɛ to vwutono Babulon nu utakada, medenji iyi inyɛ nɛ i shɛ iwɛ Babulon hwɛɛ.

⁶¹Ngee mbishi Sɛraya, Ngɛɛ hiɛŋ, Aka na ee ci Babulon, rɛtanga atwa ata n-ndumwa me elele na mi 'nyeci epe kpataa.

⁶²Na aba ibɛ nazhɛ nda adua, hiɛŋ, Oo AGWANGWAMA, gabụ bi hiɛŋ bi zhɛ be iricingo ofwo ga, iwɛ maa kede iyi-uumwa ye elele nama ya nu bwa o, ta bụtụ tu usunda, maa ụ shɛ gana ụshɛka unyizo-nom.

⁶³Gabụ gɛ Sɛraya, aka na ebu hwuwi utakada ga tɛrɛtanga atwa ata, nazhɛ umpo utayɛ nu bwa maa keri uŋ nu Urefu Yufretis.

⁶⁴Nazhɛ hiɛŋ, Gana ga du Babulon zhɛ wo ilo, u zha shɛ kaa we mwe ya kwukwuŋ, iwɛ ti'iricingo tu na AGWANGWAMA zhɛ o iricingo uŋ.[104] Ukwunanga n-ndumwa mi Jɛrɛmia ta.