Read bassa U'WO-ỤZHƐLA 3 Bible Online

U'WO-ỤZHƐLA 3 - bassa bible

U'WO-ỤZHƐLA 3

¹Gamba n shɛ bụtụ na mepi gana na ta Agwatana a pana bụtụ ulwapɛ.

²Ubwa n unzhi taa no ofwo tishi, Ngee ni ya na amɛ tuba dongo.

³Ubwa ma n hwalụpa ɛgbɛ ɛgbɛ uzawa inyɛmɛnyɛmɛ mi tihioko tutu ụrụmɛ.

⁴Ubwa gwụcanjɛ tu'waba ti mi, ibɛ po andala mi yabigwa, bee bwereteji to o'umpwo mi.

⁵Ubwa n kepi nu umwono-tishi upo Ama hwuga-ụngwụ, Ama nda tiriri.

⁶Ubwa njɛ maa ma gɛga ne tishi tu uzhizhi tu'wo, nom gana bụtụ na uwo cala.

⁷Ubwa n to ogbo; Ngaa shɛ ya bujama na zasa ashɛlatụ u tubanangana.

⁸N uganɛ taawụụ maa e m mbiyeni, ama Agwatana kepi uhwaŋna adua mi;

⁹Ubwa kepi ihwɛŋnɛ mi i tudulo na atayɛ na ee shebi; boo ontongonu ilɛmu mi.

¹⁰Ubwa n gwubeji gana ucwee; bee n zweni giri gana bizeci.

¹¹Ubwa n urigeni Ngee teni na ambɛ, bee n dwetweji wunzu wunzu, nazhɛ bee n genji.

¹²Ubwa mbo uta ubwa baa n sakanɛ a'inla ubwa maa ma n tagana.

¹³Ubwa n tegeni a'inla ubwa, ee tenenji tutu amɛ mi.

¹⁴Gamba atwa a hinga ilɛtu; tutu ụrụmɛ. Gamba kaa n shɛ iyi ya aba ya asada.

¹⁵Ubwa n sụrɛ meni na mu gagwụmɛ, bee shidinji amɛ mi ni iyimɛyɛ nɛ gagwụmɛ gana bugasa.

¹⁶Ubwa hwumpilenji ụpɛshɛka mu na cɛnjɛ, bee mushenji ene mi nɛ ɛzhɛtɛ.

¹⁷Isɛbwɛ iyi nɛ ɛɛ hiɛŋ, ulapiya, na amɛ-olom, tu unyasa n 'wi hwɛɛ.

¹⁸N zha shɛ ma ya ya uraiŋ te ilegeji o; N zasa ya kaa du ashɛlatụ elele no ofwo AGWANGWAMA o.

¹⁹Ne teyinje ụbaụta mu keeni iwɛ ụngwụ na Ama hwuga[7] keeni iwɛ ihwɛ nɛ Ngaa zasa ụlatụ we elele semi mangayɛ mụ ụgagwụ kiri;

²⁰Iwɛ ibɛ kiri Ama haŋsa nom, iwɛbɛ po ahaŋsa mi zasa ihwungwɛ-tu'waŋ kwukwuŋ.

²¹Ama aka elele Ngee teyinje iyi ike. Ma 'yaganana ashɛlatụ.

²²Ibɛ shɛ tulubo ta ata ta AGWANGWAMA ti tikpeke, inyɛmɛnyɛmɛ ibwɛ kaa zasa uce o.

²³Tulubo ta ata ta sha tu ufwo uvwungwa uvwungwa, tɛcara tụ bụ kaa ti shikeni dimi gana uwaŋna na ngwuri shi tubanɛ.

²⁴AGWANGWAMA ubwa shɛ urobwo mu we elele na Ngaa 'yajɛ, nu bwa du kaa ashɛlatụ mi namɛ.

²⁵AGWANGWAMA zhɛmanɛ atwa elele na a patana bụ rishe, keeni bụtụ na ba hwuga-unu ubwa.

²⁶Iwɛbɛ po yaa shɛ iyi nɛ zhɛmɛ tebiye maa ta 'yaka bụ ni isɛbwɛ-ti'ima, maa ta shɛlana bụ maa mo ti bicingo.

²⁷I zhɛmɛ maa yɛu tisemberi seshi isɛbwɛ gɛ ti'ima na aka na baa ta waŋnɛ.

²⁸Tɛ shɛ ta gɛga saiiŋ ni isɛbwɛ-ti'ima, aka na ata nda ụbaụta.

²⁹Tɛ shɛ ti meme zucinje, nekeshi ashɛlatụ ta namba feye.

³⁰Okwo aa tu pagana iyi na apada, aa ma tu twagaga, tɛ shɛ to lono iŋ hwɛɛ.

³¹AGWANGWAMA 'yajɛ inyɛmɛnyɛmɛ, bu zha shɛ mo tu jinoko unyizo-nom.

³²Bi eri ma tu shapɛrɛganɛ amɛ-tụhaŋtụ, ama tulubo tu na boo tu lubo ti shikeni dimi tee gembi kaa duwa.

³³Bu zasa amɛ-olom tu baa tu pana amɛ-tụhaŋtụ kwo kaa ụngwụ-tuhwuga o.

³⁴AGWANGWAMA mepi aka na oo tu rukoto nɛ evwɛvwɛjɛ nu umwono-tishi;

³⁵Bụtụ ata na Hwuri Kpaaŋ mepi gana na taa tɛ nyashɛ ohwolu ata bee ge ti peni.

³⁶Agwangwama mepi aka na te e ubi tishiriri nu umwono-ụshɛrɛya hwɛɛ.

³⁷I zasa bụtụ be elele eri ba nda maa iyi elele njɛ o,[8] semi ti yaa banɛ nu ukwulana wa AGWANGWAMA.

³⁸Tedure nu unu na Bụtụ ata na Hwuri Kpaaŋ ba pana, ibɛ po iyi ibiye keeni iyi iwɛ ya ndangana hwɛɛ.

³⁹Iwembe po bụtụ[9] na ta ya uraiŋ bɛ shɛ ba gagwuma ta a pana bụ ulwapɛ iwɛ iwɛwɛ nɛ baa njɛɛ?

⁴⁰Mizha ti menji ma ihwɛŋnɛ atu ne ndanjɛ iyi maa tu gwuri ma no ofwo AGWANGWAMA!

⁴¹Mizha ti kepishingeni ma Agwatana na namɛ na azuba shɛmɛ shi tu maa tɛ njɛ ma adua.

⁴²Oo AGWANGWAMA, tu bweji undwa bụ, eti bi teni tigezhe, bi ti gengeni shi kaa o.

⁴³Isɛbwɛ nɛ aba nda no tu ibi shishingeni maa ụtụ kwụnɛ uzawa inyɛmɛnyɛmɛ tihioko,

⁴⁴Amɛ bụ na hashɛganụ a shɛ gana udomu na ubu kwungwuri, e leni shi maa adua tu munje pụ bụ o.

⁴⁵Gabụ bɛ tɛ njɛ ubizo wa aswala no ofwo atwa unyizo.

⁴⁶Atwa i'ime tu kpaaŋ ma tu twaga, aa ma tu nda asada.

⁴⁷Tu zweni na Abara-ne-ebe keeni ụbaụta; tu namɛ na mazhanga keeni inyɛsɛ.

⁴⁸Malaba mi mi ma fwunga gana erefu ne eshe mi iwɛ ufwu na aa njɛ atwa mi.

⁴⁹Malaba mi mi mi zhɛ mu na fwunga gana uhwulwo na hwɛŋ shɛ,

⁵⁰uuwa i ci aka na AGWANGWAMA na namɛ na azuba utu mbiyanɛ baa tụ kwụbɛ.

⁵¹Amɛ mi hashɛganụ tu Ngaa kwụbɛ iyi nɛ jiteni eyikwo ụshɛpwụ ata.

⁵²Atwa i'ime mi ma n shɛka gana bụtụ na ba nda tijala ụnụnụ tụ uzawa iyi elele tɛnda.

⁵³E n keri nu u'ibwa buumwa buumwa, ee urigeni unu u'ibwa ata nu utayɛ.

⁵⁴Meni mɛ mɛcɛ uhiuhiu mu, Ngɛɛ hiɛŋ, Inee mi petenji ya.

⁵⁵Oo AGWANGWAMA, taa nu ukwunanga u'ibwa Ngaa namɛ Ama bu suyana,

⁵⁶Bụ hwụjɛ aka na Ngaa bụ lụpɛ, to utogo acɛbɛ bụ nu n'ungwa mi mi, maa m mbiyeni o.[10]

⁵⁷Gabụ kaa bi n jishijɛ, ɛbi n hiɛŋ, Ta nda ya inyɛsɛ o.

⁵⁸Oo AGWANGWAMA, gabụ kaa bɛ jɛmɛ n-ndumwa mi mi, ebu gwube kaa uraiŋ mu.

⁵⁹Oo AGWANGWAMA, nda maa n-ndumwa mɛ n zhɛmɛ; iwɛnɛ ta abụ kwụbɛ du iyi iwɛ nɛ aa n njɛ,

⁶⁰Gabụ kaa bụ kwụbɛ itɛpwɛ ye elele nɛ teni cɛŋ na atwa i'ime mi, iwɛ iyi iwɛ ye elele nɛ aa ma imangana tɛnda.

⁶¹Oo AGWANGWAMA, bụ hwụjɛ ta a ma n twaga, ebi mepi du kaa gana na ta a imanganga maa a n kwụnɛ.

⁶²Gamba aa untangana nu n-ndumwa ma aba te kwuni nu uvwungwa tutu ụrụmɛ, aa imanganga iyi nɛ aa jala maa a n njɛ.

⁶³Hioko, okwo aa jɛjɛ, okwo oo rungo, Gamba aa na zunga.

⁶⁴Oo AGWANGWAMA, pana aŋ ulwapɛ te teni cɛŋ ni iyi nɛ aa njɛ.

⁶⁵Kalana aŋ unu maa a nama no tusukwutogwu.

⁶⁶Oo AGWANGWAMA, shishingono aŋ ni isɛbwɛ bu maa iricinji aŋ maa becinji aŋ nu unyizo hwɛ hwɛɛ![11]