Read bassa IZIKƐL 1 Bible Online

IZIKƐL 1 - bassa bible

IZIKƐL 1

¹Ti yaa ulwa shiywa talacɛ[1] ni ipiɛnɛ ineshi ni ijitɛ itɛ, gana na Ngaa namɛ ne Eju a na namɛ na ti'ima nụ ụpalanụ Urefu Kiba nu Babulon. Tụla tu kapɛshɛngwa, Ngaa kwụbɛ Agwatana no shizobu.

²Aka ga ibɛ agwuma gɛ Jɛhoiyakin ulwa shiywa shɛ ta ni ipiɛnɛ itɛ ta a 'imɛ bụ.

³Tu Ngaa namɛ nu ụpalanụ Urefu Kiba nu Babulon, Ngaa hwụjɛ n-ndumwa mu na AGWANGWAMA jɛmɛ ne mi, Gamba ge Izikɛl yɛu-ye-eyi Buzi, na shɛ du bunongbo, Ngaa hwụjɛ du kaa ukpahiŋ u'ala ubwa na tu'waba ti mi.

⁴Tu Ngaa mbiyanɛ azuba, Ngaa kwụbɛ tu mpiala mụ 'wụtụ me ci tuta. Ɛbɛrɛ a nda nu udomu uko ụ'wụtụ, tụla tu na tu rungwutwonu uŋ ta ta, uhioko-uhwaŋna wa ta gana utumburɛ no ofwo ata ɛbɛrɛ a nda.

⁵Ngaa kwụbɛ iyi-uumwa ineshi na ashashɛ mpiala ma ata mụ 'wụtụ, nɛ shɛ gana butugwumwa,

⁶inɛ inɛ 'yajɛ apɛshɛka eneshi keeni apiambɛ eneshi.

⁷Ivwunɛ ibɛ ndarashangwụ, aa 'yajɛ ogwogwozwo gana yɛu-ye-eyi-buna. A ta gana utumburɛ nɛ aa nyashɛnjɛ.

⁸I 'yajɛ i'ɛlɛ butugwumwa ineshi keeni apɛshɛka keeni apiambɛ. I'ɛlɛ ɛtɛ ya aba cimbengeni tuta ta apiambɛ ata aba.

⁹Inɛ inɛ berishiji apiambɛ ibɛ eyebi yee timengeni inyɛ hwɛɛ ibɛ ineshi. Aka ɛɛ zhɛ no ofwo elele, gana ata oo hwulo mbwụụ, i zasa bu na zhɛ mama jɛshɛrɛga o.

¹⁰Iyi-uumwa ɛtɛ inɛ inɛ 'yajɛ apɛshɛka swoswoswo eneshi: Ụpɛshɛka butugwumwa namɛ nu umbe,[2] una bizeci namɛ nu u'ala ubiye, una buna-be-eyi namɛ nu u'ala ugwulwo, una ugbeji namɛ na aba.[3]

¹¹Iyi-uumwa ɛtɛ inɛ inɛ berishiji apiambɛ ibɛ eyebi ee shepi iŋ na azuba maa i twa na azuba ata, ibɛ tuba apiambɛ eyebi a na ta vwanɛ aŋ urigeni tu'waba ta aba.

¹²Iyi-uumwa gɛ hwɛɛ ngbaracɛ geri geri, iwɛbɛ po yaa shɛ maa geri elele aa jala maa o to, a zha shɛ mama jɛshɛrɛga o, ama ɛ zhɛ o hwulo gana ata mbwụụ.

¹³I 'yajɛ iyi ike nɛ shɛ gana akanga ulwa keeni shimwa shɛ ulwa na ashashɛ[4] iyi-uumwa ɛtɛ nɛ yo gorogo na ashashɛ ibɛ, ijɛ kaa yo rungo aka elele. Ulwa ibɛ wa nda rowu rowu, ɛbɛrɛ kaa a banɛ nu ulwa ata.

¹⁴Iyi-uumwa ɛtɛ du ya nda berere tu umbe te ekwunyi gana ɛbɛrɛ.

¹⁵Gana na tu Ngaa ngbaracɛ iyi-uumwa ɛtɛ ineshi, Ngaa kwụbɛ ikɛgbɛ ineshi[5] inɛɛ nɛ i zwe i to cɛnjɛ, inɛ inɛ zwe ne eririri iyi-uumwa ɛtɛ.

¹⁶Ikɛgbɛ ɛtɛ ineshi kaa mama sụbanụ hwɛɛ ibɛ. Inɛ inɛ ya ta gana utayɛ wo ogwumishi na ɛɛ hiɛŋ Ukurusoleti, inɛ inɛ 'yagananɛ bukagba na shiyeni na ashashɛ ubwa.

¹⁷Aka elele na to o mwo tahaŋnụ, bukagba be elele cimi tahaŋnụ tizha geri elele[6] na aa ngbaracɛ zawa tɛjɛshɛrɛga.

¹⁸Ewiri[7] cimbengeni na bukagba ata gana una ikengbe tutu rungwutwonu bu, eshe rungwutwonu bukagba ata.

¹⁹Geri elele na iyi-uumwa ɛtɛ mwo tahaŋnu, ikɛgbɛ ɛtɛ du ya 'wa iŋ. Yaa shɛ iyi-uumwa ɛtɛ hiɛrɛ na azuba, ikɛgbɛ ɛtɛ ya hiɛla du ni ibɛ.

²⁰Geri elele na mpiala mi zhɛ ma zha tahaŋnụ, gobwonu du kaa ikɛgbɛ ɛtɛ ya 'wa mụ. Iwɛnɛ po mpiala mi iyi-uumwa ɛtɛ mu namɛ na amɛ ikɛgbɛ ɛtɛ.

²¹Aka elele ti iyi-uumwa ɛtɛ mwo tahaŋnụ na cɛnjɛ, ikɛgbɛ ɛtɛ du yo mwo tahaŋnụ, aka elele na ti iyi-uumwa ɛtɛ shikeni urubwo uko, ikɛgbɛ ɛtɛ du yo shikono urubwo uko, aka elele na ti iyi-uumwa ɛtɛ hiɛrɛ na azuba, ikɛgbɛ ɛtɛ ya hiɛla du. Iwɛnɛ po mpiala mi iyi-uumwa ɛtɛ mu namɛ ni ikɛgbɛ ɛtɛ.

²²Iyi ike namɛ na azuba ohiuhiu iyi-uumwa ɛtɛ i shɛ gana ụpalụ na namɛ kiriri nɛ ya ta gana irɛtɛ.[8]

²³Iyi ike namɛ tuta ti ijɛ ɛtɛ i shɛ gana udomu na namɛ kiriri, ibɛ iyi-uumwa ɛtɛ shikeni yee beresheji apiambɛ aba eyeyebi yaa twa ni inyɛ, ee uregeni tu'waba ta aba na apiambɛ anya eyeyebi.

²⁴Aka na to o mwo uhilwa, Ngaa hwụjɛ gana na ta apiambɛ aba a ugaga gana Urefu ụ'wụtụ na wa zhagajɛ, gana e'inji ejeshi ofwugwo, gana rụhwụŋ ra Agwatana na Hwuri Kpaaŋ. Aka na te e genji uhilwa, o kwungwulongo apiambɛ aba.

²⁵Ama i ta 'yajɛ waa rundu ru na ra banɛ na azuba ijɛ ɛtɛ i tikiriri inɛ i shɛ gana ụpalụ nɛ namɛ na azuba ohiuhiu aba. Aka elele na ee shikeni saiiŋ, e zucenji apiambɛ aba.

²⁶Iyi ike namba na azuba ohiuhiu aba i shɛ gana idwɛtwɛ nɛ oo mo na atayɛ oko na ɛɛ hiɛŋ Safiya,[9] iyi ike nɛ shɛ gana bụtụ jɛjɛ ni idwɛtwɛ ɛtɛ.

²⁷Te kwuni ne embi ubwa u munji, Ngaa kwụbɛ iyi ike gana utumburɛ na shiyeni na ashashɛ ulwa. Te kwuni ne embi ubwa u zwe, Ngaa kwụbɛ iyi ike nɛ ya ta raawụụ gana uhioko-uhwaŋna ti yoo rungwutwonu iŋ.

²⁸Uhioko-uhwaŋna ata ụ tụraawụụ na wa ta u rungwutwonu iŋ,[10] ụ shɛ gana buhwa na ba bata na tụla nụ ụjita na eshilo ngbi. Aka na tu Ngaa kwụbɛ ijɛ, Ngee leyi Ngee ubi ụpɛshɛka mu na cɛnjɛ. Ngaa hwụjɛ rụhwụŋ rụ bụtụ bu ko tu raa njɛ n-ndumwa.