Read bassa IZIKƐL 16 Bible Online

IZIKƐL 16 - bassa bible

IZIKƐL 16

¹Nazhɛ AGWANGWAMA jɛmɛ n-ndumwa ne mi sasana, bɛɛ hiɛŋ,

²Ɛ-yɛu bụtụ, nda maa atwa Jɛrusalɛm mepi iyi-tupwaŋ nɛ aa njɛ.

³Mbiso atwa Jɛrusalɛm maa, AGWANGWAMA Mokondo hiɛŋ: Na cɛnjɛ ti Kenan ee hi meci. Ge shibi shɛ Bu'amo, go nobu shɛ Bihit.[43]

⁴Aka na te e bi meci, i zasa bụtụ namba la maa jaja u'wobi bu, kwo kaa maa a bu dụrɛ meni kwo kaa maa ma bụ sụkwụtwa manɛbɛ, kwo kaa maa a bu sụkwụtwa manɛ[44] okwo maa mo bu urugono tugwuno.

⁵I zasa bụtụ be elele hieci inyɛmɛnyɛmɛ bu maa ma bu ndana ijɛ okwo ike o. Aka na te e bi meci, i zasa bụtụ be elele ma bu jala o. E bi keri taa ne ehilo.

⁶Ti Ngɛɛ zhɛ tɛkashɛka, Ngaa bụ kwụbɛ te ebi shiyeni ne mehieŋ abu mama mbata. Abụ sụkwụtwa mehieŋ hwɛ hwɛɛ bụ, ama N eri shi ma bu ganga maa 'wi o.

⁷Gamba m bɛ njɛ maa waŋnɛ[45] gana tububa tu na tu ta bubaga ne ehilo. Abu waŋnɛ nu ukpahiŋ, abɛ njɛshɛ, abɛ shɛ ya biyikwo na waŋnɛ.[46] Osubo bu namɛ lumbwɛ lumbwɛ, tihiŋzhe tụ bụ tɛ njɛsanjɛ, gabụ ta kaa bi shiri mohondo.

⁸Tu Ngaa zhaananɛ tɛkashɛka, Ngaa kwụbɛ maa bu vwulwawa. Ibɛ po Ngee bu urigeni utogwo mu maa kede shilo mohondo, Ngee bi mbishi iwɛ. Ngaa twa-unu na bu maa tɛ njɛ tụmbụla, ibɛ po abɛ shɛ ga bi nee mi. AGWANGWAMA Mokondo ubwa dumwa.

⁹Nazhɛ Ngaa bu nyashanjɛ mehieŋ ma ata mu ga bụ sụkwụtwa la ne meni. Nazhɛ Ngaa bu sụkwụtwa manɛbɛ.

¹⁰Ngee bu urigeni utogwo na ee zweni irikwi. Ngee bu hwuŋtengeni abida na aa njɛ nu u'waba na zhɛmɛ tebiye, to tugwuno ti ilinɛn tu na aa nɛ tebiye. To tugwuno ta ata ɛɛ hiɛŋ ibele-meni.

¹¹Ngaa bu shanɛ odworo, keeni shi'umwo ni i'ɛlɛ bu, ti ikwɛmbɛ nɛ pilanụ ni i'ilu bu.

¹²Ngee bi peni bukanɛ bi inyɛnu, ta atakwụ acɛbɛ, Ngee bi peteni tu udara na pilanụ nu uhiuhiu.

¹³Bi 'yajɛ odworo, ni ikwɛmbɛ nɛ aa njɛ na azhɛnarɛya keeni azụrụfa, tugwuno tu na kaa obo urugono tɛ shɛ tugwuno ti ilinɛn tu na aa nɛ tebiye, tu na ee zweni irikwi keeni ibele-meni nɛ pilanụ. Iyimɛyɛ nɛ aa njɛ ta zhɛmɛ ibɛ aba ya, abi 'yajɛ kaa iswɛ keeni manɛbɛ ma buta maa na ya. Ụzhɛ bụ wa ta, abɛ shɛ ya biyikwo ba agwuma.

¹⁴Ebi beni ya urishi nu udenji we elele iwɛ ụzhɛ ga bụ na ulwa, iwɛnɛ ti yaa shɛ Gamba m bɛ njɛ iwɛ maa iwɛ bụ kwulanganɛ atwa. AGWANGWAMA Mokondo ubwa dumwa.

¹⁵Ama iwɛnɛ abụ pilanụ ya tebiye ebi beni du urishi, iwɛbɛ po abu mama njɛ ya buwɛle. Abu mama pana ya bụtụ be elele na zhɛ tɛkashɛka.

¹⁶Ebu suji tugwuno iyiri iyiri abɛ njɛ ofwo bu tɛzhɛba tisemberi, ibɛ shɛ ofwo ata abu namɛ aba nda tuwɛle. Iyi gɛnɛ gɛ i ta njɛ shɛ yebe kwukwuŋ. I ga shɛ shɛ du kaa ya sha gana ata yebe o.[47]

¹⁷Ebu suji odworo, ni ikwɛmbɛ ɛtɛ ya azhɛnarɛya, na azụrụfa ata Ngee bi peni la, abɛ njɛ ntatanuwaŋ me eyi, aba nda ya tuwɛle na muba.

¹⁸Ebu suji tugwuno ta ata tu zweni irikwi Ngee bi peni la, ebu uregeni mu. Aba ta ụrụpɛ nu ntatanuwaŋ ma ata ni iturɛre keeni manɛbɛ ma buta mu na Ngee bi peni.

¹⁹M bi peni iyimɛyɛ nɛ zhɛmɛ tebiye, ti iswɛ, ta manɛbɛ ma buta, ama bu suji iŋ aba ta ụrụpɛ nu ntatanuwaŋ maa ntatanuwaŋ ma ata mu no bu lubo. Iyi nɛ AGWANGWAMA Mokondo jɛmɛ ta.

²⁰Nazhɛ ebu sugeneni miaụŋ-me-eyi na mu na mo o mu na ebi m metenji obu to ụrụpɛ nu ntatanuwaŋ maa mɛ yɛ aŋ. I shɛ shɛ suu iyi iwɛ ta ahiɛ n shanɛ shɛ atwa tɛcara?

²¹Ehi suji miaụŋ ma ata mi mi ehi to ụrụpɛ nu ntatanuwaŋ.

²²Ta abu namɛ bana nu uraiŋ ga u tupwaŋ, ta abɛ shɛ buwɛle, bi teyinji shi kwukwuŋ iwɛ aka tiyɛu tụ bụ okwo kpalụ ko gba o, ibɛ shɛ aka ala ebi shiri la mohondo obo hwuŋpilongwu ne mehieŋ.

²³AGWANGWAMA Mokondo hiɛŋ, Ebe bi meni! Ebe bi meni! Gabụ bɛ njɛ ijɛ i tugworozwo hwɛɛ, nazhɛ

²⁴ebi mengeni sasana ofwo na maa a na zhɛba ntatanuwaŋ keeni ofwo na maa a na nda tuwɛle ni ipɛlu uhwaŋna we elele.

²⁵Bi shepi ụzhɛ bụ ebu hwuŋpilenji nu udwodwo. Bụtụ be elele pushe, bu mama pana bụ, tuwɛle tụ bụ ta kaana tuwumangwụ iyi-heri.

²⁶Gabụ bi leni maa ababɛshɛ ata bụ a na shɛ atwa Ijipti, a gata du ukwedeyi shini shɛmɛ sha aba o woto na bụ, na tuwɛle tụ bụ ɛbɛ ishicinjɛ isɛbwɛ mi.

²⁷Iwɛbɛ po Ngaa mama 'imɛ maa ma bu pana ulwapɛ maa ma lashɛga tuwebiye ti mi tu na tu ga shɛ la urobwo bu. M bi shepi Ngee peni Afilistia, a gata mo bu imo, aa bu twagajɛ iwɛ masha mụ bụ mụ wɛ.

²⁸Bu 'waananụ Asiria, abɛ shɛ buwɛle ba aba, iwɛnɛ ta atwa ata vwɛ ubu twa sụ, ama kaa a ta bụ twa sụ waa o.

²⁹Bɛ shɛ du buwɛle ba atwa Babulon, udenji ata shɛ ahinya, ama a ta bụ twa sụ waa sasana o.

³⁰AGWANGWAMA Mokondo hiɛŋ, Ba nda ijɛ gana buwɛle na zasa ezuye.

³¹Obu mo ofwo na maa a na zhɛba ntatanuwaŋ keeni ofwo na maa na nda tuwɛle nu uhwaŋna we elele na duri amɛ ụshɛpwụ. Ama shɛ ukwuribi kaa aba jalakaka gana awɛle avwɛ o.

³²Bɛ shɛ gana biyikwo na ba nda tuwɛle na agaiŋ, ụlụkpashɛ maa bu no lubo bwolo bwa.

³³Etwenyi, aba a tụpa hwuŋ buwɛle utashɛ, ama tuba inɛɛ bɛ shɛ gabụ ba tụpa atwa na o woto na bụ utashɛ, aba pana aŋ ukwuribi ugworo maa a na bananjɛ no olugwo olugwo maa o no woto na bụ.

³⁴Bɛ shɛ buwɛle na beni swooŋ na awɛle avwɛ. I zasa bụtụ ubu njɛ ni iji maa shɛ buwɛle o. A bɛ cɛpɛ shɛ kaa utashɛ o; ama gabụ ba tụpa aŋ! Iiŋ; bu namɛ ga swooŋ na awɛle avwɛ.

³⁵Iwɛ ecilo ata, oo gabụ buwɛle ga! Hwuga iyi nɛ AGWANGWAMA jɛmɛ.

³⁶AGWANGWAMA Mokondo hiɛŋ, Bu ushiji tugwuno tụ bụ, ebi meme peni atwa elele a na ma bu jalakaka gana buwɛle, tu ntatanuwaŋ ma ata mụ bụ mɛ shɛ iyi-tupwaŋ, abụ kwụnɛ miaụŋ mụ bụ nụ ụrụpɛ na obu to nu ntatanuwaŋ.

³⁷Iwɛ ecilo ga, Ngɛɛ zhɛ me suje atwa na ma bu jalakaka mo sotulonu urubwo uko, ta atwa na aba jala, ta atwa na ebi jeri shi hwɛɛ. N zhɛ me suje aŋ geri elele maa o bu rungwutwonu yworworwo, nazhɛ mo bu tufwurungo tugwuno maa a kwụbɛ mohondo mụ bụ hwɛɛ.

³⁸N zhɛ ma bu pana n-ndumwa-tụwụma na amɛ mi tụhaŋtụ keeni isɛbwɛ mi keeni isɛbwɛngwɛ mi iwɛ tuwɛle keeni atwa tụkwụna, iwɛbɛ po Ngɛɛ zhɛ ma bụ pana ulwapɛ u tu'wo.

³⁹N zhɛ mo bu utogono atwa ata bụ tulubo, nazhɛ ɛɛ zhɛ o hwuŋzotongo ofwo ata aba nda la tuwɛle keeni ofwo ata aba zhɛba ntatanuwaŋ. Ɛ zhɛ o tufwurungo tugwuno tụ bụ, to odworo bụ, ti ikwɛmbɛ bu hwɛɛ, ɛ zhɛ mo bu shilo mohondo cwajwala.

⁴⁰Ɛ zhɛ e suje unyama wa atwa na zhɛ ma bu tagana atayɛ, ɛ zhɛ mo bu wuŋzorongo no otokwobi aba.

⁴¹Ɛ zhɛ o hwoŋzhingo shimwono shɛ bụ, ɛɛ zhɛ o lono maa unyama we eyikwo kwụbɛ ulwapɛ bụ. N zhɛ ma bụ nda maa genji ya tuwɛle tụ bụ tɛnda maa genji ya du atwa na o woto na bụ utashɛ tụtụpa.

⁴²Nazhɛ amɛ mi tụhaŋtụ zhɛ o hwuwowu maa ma nama ya suu. N zha shɛ ma nda ya isɛbwɛ na bụ o, N zha shɛ du kaa ma nda ya isɛbwɛngwɛ kwukwuŋ.

⁴³Isɛbwɛ ibu 'wi, gana na Ngaa bɛ njɛ la ta abu ta shɛ yɛu, ibɛ po abɛ njɛ maa amɛ mi hashɛganụ ni iyi nɛ abu ndanjɛ. Iwɛbɛ po Ngaa bɛ njɛ maa cɛpɛ iŋ hwɛɛ. Iwembe kwuŋ po ebi shepi tuwɛle tɛnda ebi keeni ni iyi-tupwaŋ nɛ abu ga na ndanganaa? AGWANGWAMA Mokondo, ubwa dumwa.

⁴⁴AGWANGWAMA hiɛŋ, Gabụ ge Jɛrusalɛm, atwa zhɛ no bu shono ushi ga, ɛ hiɛŋ, To bino shɛ, ti yɛu-yo-o shɛ.

⁴⁵Bɛ shɛ ga yɛu-yo-o bino bu gom gom. Bi imi bwolo bwa; ta miaụŋ mu bwa. Bɛ shɛ gana atagwụ bụ gom, a gata imi olwo aba ta miaụŋ ma aba. Ge Hit ubwa shɛ bino hiŋ, ga Amo ubwa shɛ bishi hiŋ.

⁴⁶Ga Samaria ata namɛ tuzuba tụ bụ, ta miaụŋ mu bwa mo o hwɛɛ, ubwa shɛ batagwụ bụ. Ga Sụdụm ata namɛ tuta tụ bụ, ta miaụŋ mu bwa mo o hwɛɛ, ubwa shɛ buhongwu bu.

⁴⁷I ta bụ gwumwa sụ suu waa maa 'wa avwuna aba, maa na nda iyi-tupwaŋ nɛ aa ndangana? Awo, na aka ticwɛŋ bana bu wumangwụ ebu hwuri aŋ ni iyi elele nɛ aba nda.

⁴⁸AGWANGWAMA Mokondo hiɛŋ, Gana na tu Ngaa shɛ Agwatana uumwa, buhongwu ata bụ ga Sụdụm, ta miaụŋ mu bwa mo o, a ta njɛ shɛ iyi ci'nyɛ nɛ abɛ njɛ ta miaụŋ mụ bụ mo o.

⁴⁹Ubwa ata na miaụŋ mu bwa mo o ma busa iwɛnɛ iyimɛyɛ balanɛ aŋ, aa namɛ na amɛ-olom suu, ama a 'wa sụ iwɛ okofwo keeni atwa na meme eri shi o.

⁵⁰A shɛ atwa na mama sata, aa shɛshɛpanɛ, aa nda iyi nɛ Omo imo, iwɛbɛ po Ngaa njɛ aŋ ufwu gana na te ebi mepi.

⁵¹Iwɛwɛ nɛ ga Samaria njɛ ci shi okwo ashashɛ iwɛwɛ nɛ abɛ njɛ o. Bɛ njɛ iyi-tupwaŋ uhwuri gana na tu baa njɛ. Iyi tugworozwo nɛ abɛ njɛ hwɛɛ leni maa i shɛ gana maa batagwụ ata bụ shɛ bụtụ bi tiririri ti yaa shɛ ee menji iŋ.

⁵²Hwuwayɛ go bɛ shɛ ba ima-isɛbwɛ maa 'waŋna ụpụrụsa bụ. Iwɛwɛ nɛ abu ndanjɛ wumanjɛ yee hwuri inɛ ya atagwụ bụ, iwɛbɛ po aa shɛ gana atwa tiririri no ofwo bu. Hwuwayɛ go, mama njɛ hwungbɛ maa 'waŋna ezuye bu, gabụ bɛ njɛ maa atagwụ bụ a shɛ gana maa a namɛ rụmbɛɛ.

⁵³AGWANGWAMA hiɛŋ, N zhɛ me gwuricingeni Sụdụm ugwoje ala ubwa keeni ekpekpe na rungwutwonu uŋ, tu Samaria ugwoje ala ubwa keeni ekpekpe na rungwutwonu uŋ. N zhɛ du me bu gwuricingeni ugwoje ala bụ,

⁵⁴iwɛ maa 'waŋna ụpụrụsa bụ maa ezuye bɛ shɛ iwɛ iyi elele nɛ abɛ njɛ maa ingatanjɛ aŋ.

⁵⁵Ga Sụdụm na shɛ buhongwu bu ta miaụŋ mu bwa mo o, keeni Samaria na shɛ batagwụ bụ na miaụŋ mu bwa mo o zhɛ e gwure a shaanana gana na aa shɛ la cala. Gabụ du bi zhɛ ba shaanana gana na abɛ shɛ la cala keeni miaụŋ mụ bụ mo o.

⁵⁶Okwo titeyinje bi teyinji shi la iwɛ Sụdụm ga shɛ buhongwu bu na aka na abu mama sata la,

⁵⁷tobwolo iyi tugworozwo nɛ abu ndanjɛ te beni shi la upeje o. Okwo ti yaa shɛ gana ata, hwuwayɛ go bɛ shɛ ya iyi ya asada no ofwo atwa Idụm,[48] to ofwo Afilistia hwɛɛ, to ofwo ababɛshɛ bụ a na bu ngbaracɛ cwɛŋ.

⁵⁸Bi zhɛ ba hwuga-ụngwụ iwɛ iyi elele nɛ tuwɛle tụ bụ, keeni iyi-tupwaŋ nɛ abu ndanjɛ ubu 'waŋnanɛ. AGWANGWAMA, ubwa dumwa.

⁵⁹AGWANGWAMA Mokondo hiɛŋ, N zhɛ ma bụ nda teteni cɛŋ ni iyi nɛ abɛ njɛ, iwɛnɛ ta abụ ta 'wa sụ iwɛ onu na ebi shileji la, ebu bweji kaa unu-tutwa.

⁶⁰Ama okwo ti yaa shɛ bwonu, N zhɛ ma untangana unu na Ngaa twa la na bụ aka na abu ta waŋnɛ. N zhɛ du kaa ma twa-unu na zhɛ wa nama unyizo-nom na bụ.

⁶¹Bi zhɛ be teyinje iyi nɛ abu ndanjɛ la, aka na ebi leshiji[49] batagwụ bụ, no buhongwu bu te e gwure, ezuye ibɛ kaa zhɛ ma bu sha. N zhɛ ma nda maa abu shanɛ gana miaụŋ-mo-o, okwo ti yaa shɛ maa shɛ iyi nɛ Ngaa twa-unu ibɛ na bu ta o.

⁶²N zhɛ ma nangana unu mu tutwa na bụ maa ụ shɛ ufwo, nazhɛ ɛbi zhɛ ba mapa maa Gamba n shɛ AGWANGWAMA.

⁶³N zhɛ ma bu gangana iyi iwɛ ye elele nɛ abu nduwa, ama bi zhɛ be teyinje iŋ, ezuye ibɛ kaa zhɛ ma bu sha, bi zha shɛ ba ala maa dumanɛ okwo iwɛ o. AGWANGWAMA Mokondo, ubwa dumwa.