Read bassa IZIKƐL 2 Bible Online

IZIKƐL 2 - bassa bible

IZIKƐL 2

¹Rɛɛ hiɛŋ, Ɛ-yɛu bụtụ, ishijɛ maa shikono, Ma jala maa ma duma n-ndumwa na bụ.

²Ta rụhwụŋ ra ata ru ta njɛ n-ndumwa, nazhɛ Mpiala ma Agwatana mi teni na amɛ mi, mɛɛ n ishicinjɛ, Ngaa hwụjɛ tu baa njɛ ne mi.

³Bɛɛ hiɛŋ, Ɛ-yɛu bụtụ, N zhɛ ma bu tumwana no ofwo atwa Isrɛl, a na shɛ udenji[11] u tigezhe, a n sukakanɛ, oo to tigezhe gana na to ogwunukwoshi aba to la.

⁴Atwa ga Ngɛɛ zhɛ ma bu tumwana no ofwo aba, a shɛ atwa na hwụjɛ shɛ iwɛ, a m mụnɛ shɛ ụjɛrụma o, iwɛbɛ po Ngɛɛ zhɛ ma bu tumwana ma mbishi aŋ, maa, Iyi nɛ AGWANGWAMA na Hwuri Kpaaŋ ba njɛ na.

⁵Okwo atwa ata tigezhe hwụjɛ kwo kaa a hwụjɛ shɛ iyi nɛ aba njɛ na aba, ɛ zhɛ tuba a mapa maa bigesere namba na ashashɛ aba.

⁶Ama ɛ-yɛu bụtụ, ta nda inyɛsɛ ya aba o, ta nda du kaa inyɛsɛ n-ndumwa ma aba o. Okwo yaa bu shanɛ gana esepi na tɛka tu rungwutwonu, okwo yaa bu shanɛ kaa gana bụtụ na shiyeneni shina. Ta nda waa kaa inyɛsɛ ya atwa ata tigezhe kwo kaa iyi nɛ aa duma o.

⁷Mbiso aŋ iyi elele nɛ Ngee bi mbishi, okwo aa shɛlajɛ okwo aa shɛlajɛ shɛ, teyinje maa atwa tigezhe aa ga shɛwa.

⁸Ɛ-yɛu bụtụ, shɛlaga iyi nɛ Omo bu mbiso. Ta sha bụtụ bi tigezhe gana aba o. Kapɛshɛnga unu bu maa yɛ iyi nɛ Ngɛɛ zhɛ ma bụ pana.

⁹Aka na Ngaa mbiyanɛ, Ngaa kwụbɛ u'ala uko tu waa 'waŋnɛ utakada uko u tukwungwulo,[12] nazhɛ u'ala ata n shɛkanɛ uŋ.

¹⁰Nazhɛ u'ala ata berishiji utakada ata nu umbe mu, Ngaa kwụbɛ tu wee 'nyeci, ta amɛ ta aba, ti'nyeci tu na ee 'nyeci nu bwa tɛ shɛ ti'nyeci tu u'wo-ụzhɛla, keeni ụkwụla keeni adangboo.