Read bassa IZIKƐL 21 Bible Online

IZIKƐL 21 - bassa bible

IZIKƐL 21

¹Nazhɛ AGWANGWAMA jɛmɛ n-ndumwa ne mi, bɛɛ hiɛŋ,

²Ɛ-yɛu bụtụ, ngbaraka Jɛrusalɛm maa enengeni ohwolu ata tijilo tuwumana ta aba. Dumangana cɛnjɛ ti Isrɛl tigesere

³maa Gamba AGWANGWAMA n hiɛŋ, N shɛ bụtụ bi i'ime hiŋ. N zhɛ me hwucice utokwobi mu nu ufwutwa maa ma hiɛ kwụna hwɛɛ hiŋ, ta atwa tiririri to ogworozwo.

⁴Iwɛnɛ po nu utokwobi mu na Ngɛɛ zhɛ me hwucice nu ufwutwa, nu bwa Ngɛɛ zhɛ ma kwụna bụtụ be elele, ta atwa tiririri to ogworozwo te kwune tuta uuwa i ci tuzuba.

⁵Bụtụ be elele zhɛ ba mapa maa Gamba AGWANGWAMA n hwucikwo utokwobi mu nu ufwutwa ubwa, N zha shɛ kaa mo gwuricingo uŋ ya o.

⁶Ɛ-yɛu bụtụ, no ngwulo gana bụtụ na amɛ ubwa zhɛ tụbagwụ na amɛ-tụhaŋtụ. No ngwulo na amɛ-tụhaŋtụ no ofwo na bụtụ be elele zhɛ ma bu ngbaraka.

⁷Aka na ee bi heŋteni iwɛ iyi nɛ bɛ njɛ upo obo ngwulo, mbiso aŋ maa, Iwɛ unabarɛ na we ci. Aka na wee ci, inyɛsɛ zhɛ ya ima aŋ na shɛmɛ sha aba, ɛɛ zhɛ o zwono i'ɛlɛ na shɛgba, u'waba zhɛ wa kwuswa aŋ, shilulo sha aba shi zhɛ shɛ bwɛ na tɛzhɛgɛda. Aka ci, o tuwo cebe. AGWANGWAMA Mokondo ubwa dumwa.

⁸Nazhɛ AGWANGWAMA n hiɛŋ,

⁹Ɛ-yɛu bụtụ, Duma tigesere. Mbiso atwa iyi nɛ Ama njɛ, Gamba AGWANGWAMA, N hiɛŋ, Utokwobi, utokwobi na aa lụbwa aa nyashɛnjɛ.

¹⁰A lụbwa uŋ maa a njɛ ikwunɛ, a nyashɛnjɛ uŋ maa u na nda mbaraa mbaraa gana ɛbɛrɛ. Unyasa tubwada eri shi wa nama ya kwukwuŋ, iwɛnɛ ta atwa mi 'wa sụ iwɛ unu-tɛtɛtagana keeni ulwapɛ we elele na ee peni aŋ.

¹¹A nyashɛnjɛ utokwobi ata maa ụ zhɛmɛ ugondu tɛnda A lụbɛ uŋ aa nyashɛnjɛ uŋ, maa e utegeni bụtụ na zhɛ ba nda ikwunɛ.

¹²Ɛ-yɛu bụtụ, ugana na amɛ-tụhaŋtụ; utokwobi ga shɛ iwɛ atwa mi keeni iwɛ ehiu Isrɛl hwɛɛ. Ɛ zhɛ a kwụna aŋ hwɛɛ, ta atwa mi na ta vwɛ. Pa agba bu iyi na amɛ-tụhaŋtụ!

¹³AGWANGWAMA Mokondo hiɛŋ, N zhɛ ma manga atwa mi, yaa shɛ aa lacɛ kaa maa a jɛshɛrɛjɛ-shihaŋsa, asha ijɛ kpaaŋ zhɛ yo jitono aŋ.

¹⁴Ibɛ po, ɛ-yɛu bụtụ, duma tigesere. Puso i'ɛlɛ bu, maa utokwobi u po iyi kpalụ yebi kwo kaa kpalụ tatụ. Ụ shɛ utokwobi na wa kwụna atwa, utokwobi ata wo zwono atwa inyɛsɛ, waa shɛla kaa atwa.

¹⁵Ụ njɛ maa u'waba kwuswa atwa mi, ibɛ po aa twa udukwutwa. N zhɛ mo zwono ụshɛpwụ ata wa aba ụ'wụtụ inyɛsɛ nu utokwobi na wa nda mbaraa mbaraa gana ɛbɛrɛ, u mama imwa maa ụ njɛ ikwunɛ.

¹⁶Utokwobi ata lacɛmɛ tebiye, u zhɛ wa nda ibweleji tu u'ala ubiye, tu u'ala ugwulwo! Geri elele abɛ jɛshɛrɛjɛ uŋ, wa vwala iyi.

¹⁷N zhɛ du mo puso i'ɛlɛ mi, nazhɛ isɛbwɛ mi zhɛ yo hwuwowu. AGWANGWAMA ubwa dumwa.

¹⁸Nazhɛ AGWANGWAMA jɛmɛ n-ndumwa ne mi, bɛɛ hiɛŋ,

¹⁹Ɛ-yɛu bụtụ, nda ihwɛŋnɛ iyebi nɛ agwuma Babulon eri be dure nu utokwobi ubwa useyida. Gɛ ihwɛŋnɛ ɛtɛ iyebi i kwune nu u'una uko. Shɛnda ugbogolo na ti'nyeci ti 'nyeci ne eseshi ihwɛŋnɛ ɛtɛ.

²⁰Una uko zhɛ wo mbisono agwuma ata maa uhwaŋna na zhɛ Raba, na shɛ ụshɛpwụ A'amon ata, una uyebi zhɛ Juda, ubwa zhɛ Jɛrusalɛm ata 'yajɛ ijilɛni.

²¹Agwuma ata Babulon zhɛ o shikono ne eseshi uhwaŋna ata ba yalaga ti'nyeci tu ugbogolo ata shikeni ne eseshi ihwɛŋnɛ ɛtɛ, maa ta uhwaŋna na shɛ una ubwa ugbe. Bee zhingeci a'inla ubwa, baa njɛ ushaura na tuwa tu bwa, bɛɛ bwɛ asụbwụ usunda[63] na oo to ụrụpɛ bee yelegeji.

²²Bu 'waŋnɛ i'ilɛ nɛ aa njɛ useyida Jɛrusalɛm nu u'ala ubwa ubiye! Ibɛ mbishi bu maa ga zha maa shɛnda ezhibi adatụ tuhwuŋzo, maa kala ukwuruwa ujasa,[64] maa shorocongo ihwɛŋnɛ ɛtɛ, maa hino du ashapa.

²³Atwa Jɛrusalɛm zha shɛ a tɛtana ijɛ rishe o, iwɛ unu na aa twawa la. Ama tigesere tɛ ga tɛ shɛ iwɛ maa e teyingeni aŋ iwɛwɛ nɛ aa njɛ, maa e mbishi aŋ sasana maa ɛ zhɛ ma hi ima.

²⁴Iyi nɛ Ngaa jɛmɛ Gamba AGWANGWAMA Mokondo na, N hiɛŋ, Iwɛwɛ hiŋ banɛ upeje. Bụtụ be elele mepi ya gana na tu n-ndumwa mụ bụ wụmɛ. Bɛ bɛcinjɛ iwɛwɛ bu ni iyi elele nɛ aba nda. N-ndumwa mụ bụ wụmɛ, iwɛbɛ po Ngɛɛ zhɛ ma bu shapa maa mo bu utogono atwa i'ime bu.[65]

²⁵Oo gabụ ugworozwo na shɛ yɛu tugwama ni Isrɛl, ụjita na ɛbi zhɛ ba lashɛga ulwapɛ bụ umɛwɛɛ we ci ba.

²⁶Gamba AGWANGWAMA Mokondo n dumwa, Ngɛɛ hiɛŋ, Pashɛnga udara bụ, tu ureweni bu. I zha shɛ ya sha gana ala ya kwukwuŋ. Ishicinjɛ bukofwo maa 'yaga ụhwada! Bizhanga ma atwa na ga untanganɛ ofwo!

²⁷Osombo! Osombo! Iiŋ, N zhɛ ma nda ụshɛpwụ ata ụ'wụtụ osombo! Ama ijɛ ta zha shɛ ya nda o, semi aka na bụtụ ata Ngee teri maa pana ụshɛpwụ ata ụ'wụtụ ulwapɛ pushe. Nazhɛ Ngɛɛ zhɛ mo sugo iŋ ma pana bụ.

²⁸Ɛ-yɛu bụtụ, duma tigesere, maa enengeni A'amon iyi nɛ Gamba AGWANGWAMA Mokondo jɛmɛ, N hiɛŋ, O hwucikwo utokwobi maa a njɛ ikwunɛ; a nyashɛngwa uŋ maa a njɛ ikwunɛ, maa u na nda mbaraa mbaraa gana ɛbɛrɛ.

²⁹Shizobu shɛ na aa kwụba iwɛ bụ shɛ shɛ ụzagwụ, tigesere tu na aa duma iwɛ bụ tɛ shɛ ụzagwụ hwɛɛ. A shɛ ogworozwo keeni atwa ci'nyɛ, ụjita wa aba we ci ba, ibɛ shɛ ụjita na ɛɛ zhɛ a pana aŋ ulwapɛ umɛwɛɛ. Utokwobi zhɛ wa shɛla aŋ nu urworwo.

³⁰Gwuricingo utokwobi nu ufwutwa ubwa! N zhɛ ma duma ụshɛrɛya bu no ofwo ata aa bu karɛ, na cɛnjɛ ta ata ee bi meci.

³¹Bi zhɛ ba hwuga-ụngwụ ni isɛbwɛ mi ti Ngee duduje iŋ maa i zhɛ pụ bụ gana ulwa na wo gorogo. Nazhɛ Ngɛɛ zhɛ mo hi utogono atwa shimiaụŋ, atwa na shɛ egwoni ni iyi ufwu tɛnda.

³²Ulwa ata zhɛ mo hi hwoŋzhingo. Nu u'una bu kaa ɛɛ zhɛ a 'waŋ mehieŋ mụ bụ, i zasa bụtụ be elele tɛ zhɛ me bi teyinje ya kwukwuŋ. Gamba AGWANGWAMA N dumwa.