Read bassa IZIKƐL 22 Bible Online

IZIKƐL 22 - bassa bible

IZIKƐL 22

¹Nazhɛ AGWANGWAMA dumananɛ n-ndumwa ne mi, bɛɛ hiɛŋ,

²Ɛ-yɛu bụtụ, bu mama 'imɛ suu ma jɛmɛ ụshɛrɛya ụshɛpwụ ga wa kwụna atwa? Mbiso uŋ iyi-tupwaŋ nɛ waa njɛ kpataa.

³Mbiso ụshɛpwụ ga iyi nɛ Ngaa jɛmɛ Gamba AGWANGWAMA Mokondo, N hiɛŋ, Aka hiŋ ci ya, iwɛnɛ ahiɛ kwụnɛ atwa hiŋ gembi ufwugwo, ehi meme heshigeni du kaa nu ntatanuwaŋ mu na ahia zhɛba!

⁴N-ndumwa mi mehieŋ ma atwa ata ahiɛ kwụnɛ mɛ hiɛ wụmɛ hwɛɛ, ta tumama hashɛgana tu na ehi meme heshigeni nu ntatanuwaŋ mu na ahi mama ndanɛ. Iwɛ ecilo ata ụjita hiŋ we ci ba, aka hiŋ ci ya! Iwɛbɛ po Ngee leneni edenji maa a na hi nda asada, maa a na hi nda ụpụrụsa.

⁵A'una na gwumwongonu, ta a'una na dụlụmanjɛ ma hi nda ụpụrụsa iwɛnɛ te ehi bweji undwa.

⁶Ehiu Isrɛl patanɛ ikɛnyi ya aba rishe, ibɛ po aa shɛ akwụnɛ-atwa.

⁷I zasa bụtụ ba muna emeci ubwa ụjɛrụma nụ ụshɛpwụ ata o. Hia ya agaiŋ imwere, ohio gwushogo ule no olugwo olulo keeni miaụŋ-me-e'weteji.

⁸Hiɛ mụnɛ shɛ ofwo mi tijilo ụjɛrụma o, hi untanganɛ shɛ du kaa Ijitɛ-ụhinjanụ mi o.

⁹Atwa oko namba na ashashɛ hiŋ a shana anya aba iwɛ, iwɛ maa a kwụnɛ aŋ. Atwa oko a ya iyi nɛ oo to ụrụpɛ na tuwa. Atwa oko shɛ iyi nɛ aa nda ukwedeyi ibɛ kiri aa twa ifelu ibɛ.

¹⁰Atwa oko o woto ne eyikwo eshi aba. Atwa oko o woto ne eyikwo na njɛ shɛ iyi ni iji.

¹¹Atwa oko a nda tupwaŋ ne eyikwo anya aba, atwa oko o woto na atashɛ aba, atwa oko o woto na angwụfwụ aba na ee beni shi amɛ oko na aba.

¹²A nda atwa oko na amɛ hiŋ ụgwụ maa e zhe a kwụnɛ bụtụ. Atwa oko a lashɛga tupatana nu ukwuribi na aa unanjɛ anya aba na shɛ atwa Isrɛl, aa shɛ ya azhɛgba nu uhiuhiu wa atwa ata, iwɛnɛ ti isɛbwɛ mi 'wi aŋ. AGWANGWAMA Mokondo ubwa dumwa.

¹³N zhɛ mo dubo i'ɛlɛ mi iwɛ titeni ta ata to orugwusu ahia lashɛga atwa keeni atwa na ahia kwụna.

¹⁴Hi heŋshi maa hi te eri hia 'yaga eshe-hwoo elele kwo kaa ikɛnyi ye elele maa hi suje i'ɛlɛ hiŋ na azuba, na aba na tu Ngaa hiɛ njɛ iyi nɛ Ama jala maa ma hi nda hŋ? Gamba AGWANGWAMA N dumwa, N zhɛ kaa ma nda iyi nɛ Ngaa jɛmɛ.

¹⁵N zhɛ ma hi garataga maa hi zwogono na ashashɛ edenji elele, keeni a'una swoswoswo. N zhɛ ma kwunanga ugondu ata hiŋ u ci'nyɛ ahia nda.

¹⁶Ama aka na ahi hashaganụ[66] na ashashɛ edenji ata, nazhɛ ɛhi zhɛ hia mapa maa Gamba n shɛ AGWANGWAMA.

¹⁷Nazhɛ AGWANGWAMA n hiɛŋ,

¹⁸Ɛ-yɛu bụtụ, atwa Isrɛl a n zasana ya uhwara o, a shɛ gana tiri ta azụrụfa. A shɛ gana bundala, na azụrụfa, nu ukwokwo, nu ụshɛmbɛrɛ na aa bwa nu ulwa na aa nyashɛnjɛ azụrụfa.

¹⁹Iwɛbɛ po Ngaa jɛmɛ Gamba AGWANGWAMA Mokondo, Ngɛɛ hiɛŋ, Gana na ta ahi zasa ya uhwara, ahiɛ shɛ gana tiri ta azụrụfa. N zhɛ me hi suje mo sotulonu urubwo uko nu Jɛrusalɛm,

²⁰gana na te e suje azụrụfa na aa ta nanganɛ shɛ, na bundala, nụ ụshɛmbɛrɛ keeni ukwokwo, oo zwono nu ulwa na wa nyashɛnga iŋ. N zhɛ me hi nicingo gana na tu ulwa wo nicingo azụrụfa.

²¹N zhɛ mo hi sotulonu urubwo uko nu Jɛrusalɛm, maa ma hi shaanana ulwa, maa Mo hi nicingo na amɛ ubwa tedure ni isɛbwɛ mi nɛ Ngaa 'yajɛ.

²²Hi zhɛ hio no nu bwa gana na oo nicingo azụrụfa nu ulwa, aka ata nazhɛ ɛhi zhɛ hia mapa mazhanga mi isɛbwɛ mi Gamba AGWANGWAMA.

²³Nazhɛ AGWANGWAMA dumananɛ n-ndumwa ne mi, bɛɛ hiɛŋ,

²⁴Ɛ-yɛu bụtụ, mbiso atwa Isrɛl maa cɛnjɛ ta aba tɛ shɛ shɛ ya cɛnjɛ tu na tu namɛ shɛshɛshɛ o, iwɛbɛ po Ngɛɛ zhɛ ma pana tụ ulwapɛ na amɛ isɛbwɛ mi maa kede eshilo ngbi ya na tuba o.

²⁵Ehiu[67] cɛnjɛ tu ga a shɛ gana izeci nɛ yo ngwulo iwɛ usunda na aa kwụnɛ. A kwụnɛ atwa, ee suji uduciya wa aba hwɛɛ ti i'wɛŋnɛ ya aba nɛ ee eri o sugo na atwa na aa kwụnɛ; olulo ta barɛ ya.

²⁶Onongbo bweji undwa mu, ee heshigeni iyi mi tijilo. A njɛ shɛ iyi tijilo ni inɛɛ nɛ shɛ shɛ iyi tijilo swoswoswo. A njɛ shɛ du kaa iyi nɛ shɛ iyi tiri swoswoswo ni inɛɛ nɛ zasa tiri o, aa ngbaracɛ du Ijitɛ-ụhinjanụ mi cwɛŋ bana. Iwɛbɛ po atwa Isrɛl n mụnɛ shɛ ya ụjɛrụma na ashashɛ aba.

²⁷Atwa na untanganɛ shihwolu a shɛ gana ogwusu na a dwatwaga usunda na aa kwụnɛ. O dudwogo mehieŋ, aa shɛ akwụnɛ-atwa maa a 'yaga titeni to orugwusu.

²⁸Egesere aba sweci iwɛwɛ gɛ, gana atwa na a sụkwụtwa ụdatụ ụhwụla. Shizobu shɛ ụzagwụ aa kwụba, aa duma du tigesere tụ ụzagwụ. Ɛ hiɛŋ, AGWANGWAMA Mokondo ubwa jɛmɛ, Gamba AGWANGWAMA N dumanɛ shɛ kaa iwɛ ye elele na aba o.

²⁹Atwa cɛnjɛ tu ga a ya atwa imwere, aa lashaga atwa iyi na tɛshɛrɛ. A nda okofwo keeni atwa na mama zasa tuhwulo, oo gwushigo titeni nu uhiuhiu wa agaiŋ no orugwusu.

³⁰N dwelekeci bụtụ na eri ma m mana uba, na zhɛ ba ala maa shikono no ofwo na uba bagatagwụ maa lashaga hwuŋ cɛnjɛ tu ga na aka na Ngɛɛ zhɛ ma nda tu ufwu na aka na ta amɛ mi hashɛganụ, ama N kwụbɛ shɛ bụtụ okwo bu ko.

³¹Iwɛbɛ po Ngɛɛ zhɛ mo zwono aŋ isɛbwɛ mi gana ulwa, Ngɛɛ zhɛ ma nda aŋ ufwu iwɛ iyi nɛ aa njɛ. AGWANGWAMA Mokondo ubwa dumwa.