Read bassa IZIKƐL 26 Bible Online

IZIKƐL 26 - bassa bible

IZIKƐL 26

¹Ta atu ulwa shiywa umpwa-nu-boo-ko nụ ụjita uhiiŋ nu upiana ata, na ti'ima, nazhɛ AGWANGWAMA jɛmɛ n-ndumwa ne mi, bɛɛ hiɛŋ,

²Ɛ-yɛu bụtụ, iyi atwa na namɛ nu Taya a nda unyasa iwɛ ibɛ nɛ. A ugaga, ɛɛ hiɛŋ, Eeba, Jɛrusalɛm hwuŋzwo! Shidubo shɛ bwa shɛ n kapɛshɛngwanụ ya: Tu waa shɛ ya du bana osombo! Iyi nazhɛ zhɛ ma n zhɛmana ya.

³Oo gabụ ụshɛpwụ Taya iwɛbɛ po Gamba AGWANGWAMA Mokondo, Ngɛɛ hiɛŋ, N shɛ bụtụ bụ bi i'ime. N zhɛ me suje edenji ofwugwo maa a bu sukakanɛ, ɛ zhɛ a zhajɛ gana adanga itekwu.

⁴Ɛ zhɛ a nda uba ụshɛpwụ ata hiŋ ufwu, ɛ zhɛ o hwuŋzotongo shɛshɛkpa shi hiŋ. Nazhɛ Ngɛɛ zhɛ ma hwaga cɛnjɛ tụ ụshɛpwụ ata hiŋ maa ụ shɛ ya utayɛ ubaba.

⁵U zhɛ wa nama na ashashɛ itekwu, apata ekwuzhi zhɛ na gatagana n-ngwuno ma aba. Gamba AGWANGWAMA Mokondo N dumwa. U zhɛ wa sha iyi nɛ edenji zhɛ o sugo maa ụ shɛ ufwa ujasa.

⁶Ɛ zhɛ a kwụna atwa na namɛ na ashɛpwụ aba a na namɛ ne shilo no otokwobi aba. Nazhɛ Taya zhɛ wa mapa maa Gamba n shɛ AGWANGWAMA.

⁷AGWANGWAMA mokondo hiɛŋ, N zhɛ ma shapɛ agwuma ata ụ'wụtụ na hwuri shɛgwuma shɛ vwɛ hwɛɛ, ubwa shɛ agwuma Babulon, gɛ Nɛbukadnɛza[77] maa sukakana Taya. Bi zhɛ ba banɛ tuzuba ba 'waŋnɛ ejeshi ofwugwo, ni idɛkwɛ, ti ihɛŋtu ujasa, ta asụcɛ idɛkwɛ hwɛɛ.

⁸Ubwa zhɛ ba kwụna atwa na namɛ na ashɛpwu a'wụtụ a'wụtụ no otokwobi nu ujasa ata. Atwa i'ime zhɛ ma hi kalana bụkpagwụ bu ujasa, ɛ zhɛ o shorocongo ihwɛŋnɛ, ɛɛ zhɛ e suje shabula sha aba shɛ ujasa maa a hiɛ sukakanɛ.

⁹Ɛ zhɛ o hwuŋzotongo uba hiŋ ni imbele ya aba, ɛɛ zhɛ a bwarataga shɛshɛkpa shi hiŋ no shigwubo.

¹⁰Ubwodolo na idɛkwɛ ya aba zhɛ yɛ ishicinjɛ zhɛ mo hi ubo gana udomu. Rundu ri ihɛŋtu ujasa keeni ihɛŋtu ɛtɛ ee zwegeni i'wɛŋnɛ ya aba ujasa nɛ idɛkwɛ yo kokwulo zhɛ no zhingoto uba hiŋ tɛ ɛ zhɛ o tono shidubo shi hiŋ gana atwa na o tono ụshɛpwụ na uba ubwa ga bwaratagwụ cebe.

¹¹Asụcɛ idɛkwɛ ya aba zhɛ e teni ni ihwɛŋnɛ ya amɛ ụshɛpwụ hiŋ maa a kwụnɛ atwa hiŋ no otokwobi aba. Ɛ zhɛ o hwuŋzotongo atukpa ata hiŋ ga 'yajɛ ikɛnyi hwɛɛ.

¹²Atwa ata i'ime hiŋ zhɛ o sugo uduciya keeni i'wɛŋnɛ hiŋ nɛ ahi ga sanga. Ɛ zhɛ o hwuŋzotongo uba hiŋ to shimwono shi hiŋ shi biye hwɛɛ. Ɛ zhɛ o sugo ta atayɛ, ti i'wɛ'wɛ tɛ ɛzhɛtɛ a 'waŋ ni itekwu hwɛɛ.

¹³N zhɛ ma nda maa rundu ra shɛzunga shi hiŋ, ti i'nyemi hiŋ i shiduma i 'imɛ ilɛmɛ hwɛɛ.

¹⁴Utayɛ tubala na ekwuzhi zhɛ na gatagana n-ngwuno ma aba kiri Ngɛɛ zhɛ ma ganga. A zha shɛ kaa a maanana ya ụshɛpwụ ata kwukwuŋ. Gamba AGWANGWAMA Mokondo N dumwa.

¹⁵AGWANGWAMA Mokondo mbishi atwa Taya, bɛɛ hiɛŋ, Aka na aa hi lasụ hwuŋ, inyɛsɛ zhɛ ya sha atwa na namɛ nụ ụpalanụ itekwu iwɛ tungwulo ta atwa na aa gwụcanjɛ keeni iwɛ n'ungwa ma atwa ata aa shɛrɛ na ashashɛ hiŋ.

¹⁶Shɛgwuma sha ashɛpwụ na namanjɛ nụ ụpalanụ itekwu ɛtɛ shi zhɛ sha bizhangwụ nụ n-ndwụtwụ ma aba. Ɛ zhɛ o ushogo otogwo aba to otogwo ata aba ee zweni irikwi o tulono, nazhɛ a gɛgaga na cɛnjɛ a na zhɛgɛdaga. Inyɛsɛ iyi nɛ ihi jiteni zhɛ ya sha aŋ, ibɛ po ɛɛ zhɛ na zhɛgɛdaga aka elele nom.

¹⁷Ɛ zhɛ mɛ hi dwɛjɛ u'wo-ụzhɛla, ɛ hiɛŋ, Ụshɛpwụ ga beni la urishi njɛ ya ufwu! Gabụ na atwa ụpalanụ itekwu ga datanɛ Gabụ keeni atwa bụ, hi ge zweni atwa na ga namɛ nu bwa inyɛsɛ.

¹⁸Ụpalanụ bwɛ na tɛzhɛgɛda, nụ ụjita na obu hwuŋzwo, Nazhɛ atwa na jɛjɛ na adakwụ itekwu zhɛgɛdanɛ no tuhwuŋzwo tụ bụ.

¹⁹AGWANGWAMA Mokondo hiɛŋ, N zhɛ ma bu nda osombo, i zasa bụtụ zhɛ ba nama ya apata kwukwuŋ. N zhɛ mo bu iricingo no me'ilwo mi itekwu ɛtɛ.

²⁰N zhɛ ma bu kala ne e'uye, maa zhe ci atwa na namɛ la cala cala. N zhɛ ma bu nda maa nama taa na amɛ cɛnjɛ taa tuta no osombo ala namɛ cala cala, maa nama na atwa na 'wi. Iwɛbɛ po abu zha shɛ ba nama ya, bi zha shɛ bo tono ya ohwolu bu na ashashɛ atwa na ta hwungwa kwukwuŋ.

²¹Gabụ Ngɛɛ zhɛ ma nda tusakana ti iyi nɛ zhɛ ya sha atwa inyɛsɛ, bi zha shɛ ba nama ya kwukwuŋ. Atwa zhɛ na bu dwalakaka, ama a zha shɛ ma bụ kwụba ya o. AGWANGWAMA Mokondo ubwa dumwa.