Read bassa IZIKƐL 27 Bible Online

IZIKƐL 27 - bassa bible

IZIKƐL 27

¹Nazhɛ AGWANGWAMA n hiɛŋ,

²Ɛ-yɛu bụtụ, dwɛjɛ atwa Taya u'wo-ụzhɛla.

³Mbiso atwa na jɛjɛ no odubo tutono tu ụpalanụ itekwu atwa na a nda tihinya na atwa apalanụ itekwu du maa, AGWANGWAMA Mokondo hiɛŋ, Gabụ Taya, ba busa, ɛbi hiɛŋ, bu ulwa nụ ụzhɛ.

⁴Tugwungwu tụ bụ tu namɛ taa na ashashɛ ntokwu; Atwa na ubu mo, o bu mo ta ulwa nụ ụzhɛ.

⁵Ne eyigo na ɛɛ jwɛ ni Ishɛmɛ Hɛmon, ee shebi ezhibi bu, ni Lebanon kaa ɛɛ jwɛ osobu na ee heji ukogo bu.

⁶Ne ekpekpeshi na ɛɛ jwɛ nu Bashan, kaa ee shebi ụhalam bụ. Eyigo na ɛɛ jwɛ nụ ụpalanụ Saipros, ee shebi ugbogolo na ee ubeni na amɛ bụ. Nazhɛ ee sweni uŋ ene udagba.

⁷No tugwuno ti ilinɛn tu na ee zweni irikwi, tu na tu banɛ ni Ijipti, aa njɛ elema bụ. I zasa iwɛ ta bụtụ mepi tu, tu baa kwụbɛ tụ taa dụlụ o. No tugwuno tu uduhwa ushenje tu na tu banɛ nụ ụdakwụ Saipros oo to ukogo bu.

⁸Atwa na banɛ nu Saidụn keeni Avad, aba shɛ ekwungwuri elema bụ. Eheŋteni bu a shɛ etwenyi na shɛ egwoni ni ihɛŋtɛnɛ.

⁹Atwa Babulon a na shɛ egwoni tebiye, aba shebi ụhalam bụ, Aba a nda ugondu na bụ. O sukwokwonuo ofwo elele na ụhaŋtụ bụ ge teni meni. Eheŋteni ihɛŋtu elele a na zhɛ tɛkashɛka, ɛ vwurɛ aa sa iyi no olugwo bu.

¹⁰Ejeshi na banɛ ni Pɛsia, ti Lidia ti Libia hwɛɛ namɛ na amɛ ejeshi bu aa nda ugondu. Nu urubwo hiŋ ee sweteji shabula sha aba shɛ ujasa ta akata aba hwɛɛ. Aba shɛ atwa na ihi sugeni ụjɛrụma.

¹¹Ejeshi na banɛ nu Avad, aba a 'yaka uba hiŋ, anaa na banɛ nu Gamad, aba a 'yaka shɛshɛkpa shi hiŋ. E sweteji shabula sha aba shɛ ujasa na adatụ hiŋ. Aba ihiɛ njɛ upo ahi pilanụ nụ ụzhɛ.

¹²Hiɛ njɛ tihinya na atwa Tashish na shɛ ya Spain, ni i'wɛŋnɛ nɛ ahiɛ 'yajɛ, aa hiɛ cɛpɛ azụrụfa, no okwokwo keeni ashɛmbɛrɛ iwɛ i'wɛŋnɛ hiŋ nɛ oo so.

¹³Hiɛ njɛ tihinya na atwa Gris, ta atwa Tubal, ta atwa Mɛshɛk, aa hiɛ cɛpɛ ajama keeni i'wɛŋnɛ nɛ aa njɛ nɛ ɛtumburɛ iwɛ i'wɛŋnɛ hiŋ nɛ oo so.

¹⁴Atwa Bɛt-togama so i'wɛŋnɛ hiŋ, aa hiɛ cɛpɛ idɛkwɛ nɛ ya hwaŋ itimɛ, ni inɛɛ nɛ ya nda ujasa, keeni nruhondo.

¹⁵Hiɛ njɛ tihinya na atwa Rodes,[78] atwa gembi ufwugwo a na banɛ nụ ụpalanụ, e hi peni ene adagba keeni i'wɛ'wɛ ya agwugwa ụlụkpashɛ i'wɛŋnɛ hiŋ nɛ oo so.

¹⁶Atwa Siria[79] so i'wɛŋnɛ hiŋ, aa hiɛ cɛpɛ atayɛ ogwumishi a na ɛɛ hiɛŋ ɛmɛrald, ni ihwehwe uduhwa ishenje, no tugwuno tu na ee zweni irikwi, no tugwuno ti ilinɛn tu na aa nɛ tanɛ tanɛ, ti iyi nɛ ɛɛ hiɛŋ coral hwɛɛ, tu utayɛ wo ogwumishi na ɛɛ hiɛŋ rubi.

¹⁷Atwa Juda keeni atwa Isrɛl a hiɛ cɛpɛ iyimɛyɛ wit,[80] nɛ banɛ ni Minit keeni iyi tihinya inyɛ, ti iswɛ, ta manɛbɛ ma buta keeni iturɛre iyiri yiri.

¹⁸Atwa Damaskos njɛ tihinya ne hiŋ, iwɛnɛ ahiɛ 'yajɛ i'wɛŋnɛ keeni uduciya ufwugwo, aa hiɛ cɛpɛ mayaga mu na mu banɛ ni Hɛlbon, ne tihiŋzhe ta agwụdụ tɛ cɛnjɛ tu na tu banɛ nu Zaha.

¹⁹Adan ne Egrik a na banɛ nu Uzal, o so i'wɛŋnɛ hiŋ; aa hiɛ cɛpɛ ashɛmbɛrɛ na ee hiŋtetenji swoswoswo ee jibi keeni iturɛre iyiri yiri.

²⁰Adidan so i'wɛŋnɛ hiŋ, aa hiɛ cɛpɛ, tugwuno tu na aa nɛ cinji iwɛ ufiridi idɛkwɛ tusuka.

²¹Arabia keeni ehiu cɛnjɛ ti Kida so i'wɛŋnɛ hiŋ, aa hiɛ cɛpɛ oywoywo agwụdụ, na adagba keeni iyweywe iwɛ i'wɛŋnɛ hiŋ nɛ oo so.

²²Ahinya Shiba keeni Rama a hiɛ cɛpɛ shidworo shɛ na shi ngezeni nụ uzhɛ, na azhɛnarɛya keeni iyiri iturɛre swoswoswo nɛ zhɛmɛ.

²³Ashɛpwụ a'wụtụ a'wụtụ a na ɛɛ hiɛŋ: Haran, nu Canɛ keeni Idɛn, na ahinya aba, nụ ụshɛpwụ na ɛɛ hiɛŋ, Ashu keeni Cilmad hwɛɛ aba njɛ tihinya na bụ.

²⁴Aba bi sengeni i'wɛŋnɛ i tu'urugono ibiye, no tugwuno tu uduhwa ushenje keeni i'wɛŋnɛ nɛ ee zweni irikwi, ta shidugwa shɛ tubala nu umwono, shɛ na aa njɛ na aduhwa iyiri yiri, ti ihwehwe nɛ aa hiɛŋshɛ tanɛ tanɛ.

²⁵Ihɛŋtu nɛ gembi ufwugwo nɛ du gembenji, ibɛ 'waŋnɛ i'wɛŋnɛ bu i tihinya. I'wɛŋnɛ nɛ zhinengeni barɛ no ofwo bu, na ashashɛ itekwu kaa ɛbi zhɛ.

²⁶Aka na atwa na e zucinje elema bu ubu bwɛ no olugwo na iri, ama uvwugo uwaŋna-banụ tuba ubwa zhɛ mo bu wuŋzorongo wunzu wunzu na ashashɛ itekwu ɛtɛ.

²⁷Uduciya bu, ni i'wɛŋnɛ bu i tihinya, eheŋteni bu ụhaŋtụ, na atwa na a nda ugondu nụ ụhaŋtụ, ta ananganganɛ ụhaŋtụ hwɛɛ, ta ahinya bụ, te ejeshi bu hwɛɛ, ta bụtụ be elele na namɛ nụ ụhaŋtụ, ɛ zhɛ o ilo na amɛ itekwu ɛtɛ nụ ụjita na ụhaŋtụ bụ zhɛ wo ubwo.

²⁸Aka na atwa bu a na a nda ugondu nụ ụhaŋtụ uganɛ, ụpalanụ Urefu zhɛ wa nda bulama.

²⁹Atwa na untanganɛ elema zhɛ a kala ụhaŋtụ wa aba; eheŋteni ụhaŋtụ, ta atwa na a nda ugondu nụ ụhaŋtụ zhɛ o shikokono nu uhaŋsa hwɛɛ aba.

³⁰Ɛ zhɛ a ugana, a ma bu twana-u'wo gboo. Ɛ zhɛ a dụla upwupwutu no ohiuhiu o no jirongono na ma'alụ.

³¹Ɛ zhɛ a 'nyanga tukpala iwɛ bụ, ɛɛ zhɛ o urogono tugwuno tụ ụcɛnjɛ tɛnda. Ɛ zhɛ ma bu twana-u'wo gboo na tugwumana ta shɛmɛ sha aba, ɛ zhɛ a ta-ụkwụla.

³²Gana na ta a namɛ nụ ụkwụla-tuta, ɛ zhɛ mɛ hi dwɛjɛ u'wo-ụzhɛla, ɛ hiɛŋ, Gaaba kwuŋ aa nduwa ufwu[81] gana Taya, na itekwu rungwutwonuu?

³³Aka na i'wɛŋnɛ bu tihinya teni ntokwu, aba lashaga edenji ofwugwo; nu uduciya ụ'wụtụ na abu 'yajɛ, ti i'wɛŋnɛ; ni ibɛ abɛ njɛ shɛgwuma shu unyizo azhɛgba.

³⁴Hwuwayɛ go gabụ ta bu hwuŋzwo ya ni itekwu ne me'ilwo me meni; ti i'wɛŋnɛ bu hwɛɛ ta atwa na ga bụ 'wa, e zwi na bụ.

³⁵Iwɛ bu dama atwa elele na namɛ nụ ụpalanụ; shɛgwuma sha aba sha zhɛgɛdaga na amɛ-tụhaŋtụ, apɛshɛka aba zhimwongonu ni inyɛsɛ nɛ shɛ aŋ.

³⁶Ahinya na namɛ ne edenji ma bu ta ashɛshɛrụwụŋ, ukwunanga bụ shɛ na mazhanga, bu zha shɛ kaa ba nama ya kwukwuŋ.